बीड — पोलीस अधीक्षकांच्या घरात गांजा ओढत बसलेल्या बाळू गहिनीनाथ बहिरवाळ तसेच वाळू माफियाला पळून जाण्यास मदत करणारा रामप्रसाद शिवनाथ कडूळे या दोन पोलीस कर्मचाऱ्यांना बडतर्फ करण्यात आले आहे. पोलीस अधीक्षक नवनीत कांवत यांनी ही कारवाई केली.
बाळू गहिनीनाथ बहिरवाळ हा पोलीस अधीक्षक नवनीत कावत यांच्या निवासस्थानी सुरक्षारक्षक म्हणून नियुक्त करण्यात आला होता. तो एका खोलीत गांजा ओढत बसलेला असताना रविवारी रात्री साडेआठच्या सुमारास पकडला गेला. याप्रकरणी शिवाजीनगर पोलीस ठाण्यात बहिरवाळ विरोधात गुन्हाही दाखल करण्यात आला आहे. याबरोबरच रामप्रसाद कडूळे हा कर्मचारी पिंपळनेर पोलीस ठाण्यात कार्यरत होता. लाच स्वीकारताना जालना लाचलुचपत प्रतिबंधक विभागाने त्याला पकडले होते. याप्रकरणी त्याला निलंबित करण्यात आले होते. निलंबन कालावधी संपल्यानंतर पोलीस मुख्यालयात कडूळेस नेमणूक दिली. या काळात पिंपळनेर पोलीस ठाणे हद्दीतील वाळू चोरीच्या गुन्ह्यात पाहिजे असलेला आरोपी गोरख काळेच्या संपर्कात राहून त्यास पोलिसांच्या गोपनीय हालचालींची माहिती पुरवली. त्याला पळून लावण्यात सहकार्य केल्याचे पोलीस तपासात निष्पन्न झाले होते. त्यास कलम 49 ,303 (2),3(5) अन्वये कलम 130 /177, 39/192 प्रमाणे गुन्हा दाखल करण्यात येऊन अटक देखील करण्यात आली होती सध्या तो पोलीस कोठडीत आहे. रामप्रसाद कडूळे यांचे वर्तन गुन्हेगारी स्वरूपाचे असून पोलीस खात्यास न शोभणारे आहेत. पोलीस दलाची प्रतिमा त्याच्यामुळे मलीन झाली असल्याने पोलीस अधीक्षक नवनीत कावत यांनी सेवेतून बडतर्फ केले आहे. पोलीस हे कायद्याचा रक्षक आहेत त्यामुळे पोलिसांच्या कोणत्याही बेकायदेशीर गुन्हेगारी कृत्यास खपवून घेतले जाणार नाही कोणताही पोलीस अधिकारी किंवा अंमलदार कोणत्याही बेकायदेशीर किंवा गुन्हेगारी कृत्यांमध्ये सहभागी आढळून आल्यास त्याच्यावर कठोरात कठोर कारवाई करण्यात येईल असा इशारा पोलीस अधीक्षक नवनीत कावत यांनी दिला आहे.

बीड —  शहरातील गजबजलेल्या आणि मध्यवर्ती ठिकाण असलेल्या सारडा कॅपिटलमधील एका तळघरात स्पा सेंटरच्या नावाखाली वेश्याव्यावसाय चालू होता. ही माहिती मिळताच बीड शहर पोलिसांनी डमी ग्राहक पाठवून मंगळवारी रात्री ८ वाजेच्या सुमारास कारवाई केली. यामध्ये चालकाला बेड्या ठोकल्या असून नाशिकच्या पीडित महिलेची सुटका करण्यात आली आहे.
प्रमोद सदाशिव शेळके रा.नेकनूर ता.बीड असे पकडलेल्या आरोपीचे नाव आहे. बीड शहरातील सारडा कॅपिटल परिसरात एका कोपऱ्यातील तळघरात ब्लीस नावाचे स्पा सेंटर आहे. याच ठिकाणी मागील काही दिवसांपासून वेश्या व्यावसाय सुरू असल्याची माहिती होती. मंगळवारी सायंकाळी बीड शहर पोलिसांनी डमी ग्राहकाला एक हजार रूपये देत स्पा सेंटरमध्ये पाठविले. आतमध्ये वेश्याव्यवसाय चालत असल्याची माहिती मिळताच पोलिसांनी छापा मारला. यात एका पीडितेची सुटका करण्यात आली. रात्री उशिरापर्यंत गुन्हा दाखलची प्रक्रिया सुरू होती.

ही कारवाई पोलिस अधीक्षक नवनीत काँवत, अपर पोलिस अधीक्षक सचिन पांडकर यांच्या मार्गदर्शनाखाली बीड शहरचे पोलिस निरीक्षक शितलकुमार बल्लाळ, मनोज परजणे, अशपाक सय्यद, सुशेन पवार, सचिन अलगट, रेश्मा कवळे आदींनी केली.

चौसाळा — पवनचक्की कंपन्यांची गुलामगिरी करताना कर्तव्यदक्षतेचा आव आणून खाकीचा धाक दाखवत शेतकरी ठाण्यात बसवून ठेवले, पत्रकारांनाही दमदाटी केली. त्याच नेकनूर पोलिसांची इज्जत वेशीवर टांगली गेली. चौसाळा पोलीस चौकीपासून हाकेच्या अंतरावर असलेल्या हॉटेलमधील वेश्या व्यवसायावर पोलीस निरीक्षक देविदास गात व अनैतिक मानवी वाहतूक प्रतिबंधक विभागाच्या वर्षा शिंदे यांनी छापा मारून दोन महिलांना ताब्यात घेतले आहे. या कारवाईनंतर मटका ,देशी दारू ,हातभट्टी यावर कारवाई कधी होणार याकडे जनतेचे लक्ष लागले आहे.
पोलीस यंत्रणेचा धाक काय असतो? धमकावलं तरी अनेकांची हवा टाईट कशी होते? कशी केली जाते?कर्तव्यदक्ष पणा कसा असतो? शेतकरी तर सोडाच माध्यम प्रतिनिधी देखील पोलिसांच्या दादागिरी पुढे हतबल होतो. हे चित्र पवनचक्की कंपन्यांच्या माध्यमातून नेकनूर पोलिसांनी निर्माण केलं होतं.जमिनीची मालकी असूनही शेतकरीच कसा परागंदा करता येतो. याचा रजाकारी अनुभव चौसाळ्यातील शेतकऱ्यांना आला. पवनचक्की कंपन्यांना बंदोबस्त देऊन पोलीस यंत्रणेला अधिकृतरित्या कितपत आर्थिक फायदा झाला हा संशोधनाचा विषय बनला आहे.पण पवनचक्की कंपन्यांसाठी वर्दीचा धाक दाखवणारी नेकनूर पोलीस किती बरबटलेली आहे याचं उदाहरण आज चौसाळ्यात पाहायला मिळालं. हिंदू देवताचं नाव वापरून चक्क या ठिकाणी वेश्या व्यवसाय तेही चौसाळा चौकीपासून दोनशे फूट अंतरावर याची कूणकूण ठाणे प्रमुखांना लागली नाही. लागली असली तरी हिंदू देवतेच्या नावाला कलंक लागतो आहे याच्याशी त्यांना सोयर सुतक नाही. शेवटी लक्ष्मी दर्शन महत्त्वाचं असतं हे यावरून सिद्ध झालं. 29 एप्रिल रोजी “सह्याद्री माझा” ने “देशी हातभट्टीचा गुटखा,मटक्याचा खटका; ललनांच्या झटक्यात गरिबांचा संसार थोटका”या मथळ्याखाली वृत्त प्रकाशित केले होते. आज पोलीस अधीक्षक नवनीत कांवत यांच्या आदेशावरून
पोलीस निरीक्षक देविदास गात व अनैतिक मानवी वाहतूक प्रतिबंधक विभागाच्या वर्षा शिंदे यांनी “जानकी हॉटेल” मध्ये चालत असलेल्या वेश्या व्यवसायावर छापा मारला. सोमवारी सायंकाळी 5 च्या सुमारास जानकी हॉटेलवर डमी ग्राहक पाठवून खात्री केल्यानंतर दोन महिलांना पोलिसांनी ताब्यात घेतले.यावेळी हॉटेलचा व्यवस्थापक देखील पोलिसांच्या ताब्यात असून नेकनूर पोलीस ठाण्यात गुन्हा दाखल करण्याची प्रक्रिया सुरु आहे. याच “जानकी हॉटेल“मध्ये पंकज कुमावत यांनी छापा मारून या धंद्याचा भांडाफोड केला होता.
चौसाळा शहरात जि प शाळेच्या आवारात मटका घेतला जातो. बस स्थानका समोर अवैध देशी दारू विक्री केली जाते. शहरात अशी बरीच दुकान आहेत. तीच स्थिती हॉटेल मधून देखील पाहायला मिळते. भरवस्तीत रसायन युक्त ताडी देखील विक्री केली जात आहे यामुळे तरुण पिढी बरबाद होत आहे
एवढं होऊन देखील मूग गिळून नेकनूर पोलीस ठाणे प्रमुख गप्प आहेत. अशा ठाणे प्रमुखामुळे पोलीस अधीक्षक नवनीत कांवत यांच्या पोलीस यंत्रणेतील सुधारणेला खिळ बसत आहे. या अवैध धंद्यावर देखील बीड पोलिसांनीच कारवाई करावी अशी मागणी जोर धरू लागली आहे.

गेवराई — पोटच्या मुलाने गळफास घेऊन आत्महत्या केल्याची माहिती मिळताच दुःख सहन न झाल्याने आईनेही विष पिऊन आपली जीवन यात्रा संपवली. ही घटना गेवराई तालुक्यातील वाहेगाव आमला येथे घडली.
अभिमन्यू भागवत खेत्रे वय- 45 वर्ष व कौशल्या भागवत खेत्रे वय-70 वर्ष रा. वाहेगाव -आमला, ता. गेवराई, जि. बीड असे आत्महत्या केलेल्या माय लेकराचे नाव आहे.सोमवारी सकाळी अभिमन्यू याने घरातील आडूला गळफास घेऊन आत्महत्या केली.आपल्या मुलाने आत्महत्या करुन जीवन संपविल्याने आई कौशल्या खेत्रे यांना दुःख सहन न झाल्याने त्यांनी देखील विष घेतले. आधीच मुलगा गेला त्यातच आईने विष घेतल्याने कुटुंबीयाने कौशल्या खेत्रे यांना तात्काळ बीडच्या जिल्हा रुग्णालयात उपचारास दाखल करण्यात आले. मात्र, आज सकाळीच आई कौशल्या खेत्रे यांचा उपचार सुरु असताना मृत्यू झाला.या दोन्ही घटना घडल्यानंतर तलवाडा पोलीस घटनास्थळावर दाखल होऊन अभिमन्यू खेत्रे याचा मृतदेह शवविच्छेदन जातेगाव प्राथमिक आरोग्य केंद्रात दाखल करण्यात आला. तर आई कौशल्या खेत्रे यांच्या मृतदेहाचे बीड जिल्हा रुग्णालयात आज शवविच्छेदन करण्यात आले. दरम्यान याप्रकरणी पोलिसांनी आकस्मिक मृत्यूची नोंद केली असून पोलीस पुढील तपास करत आहेत.

बीड — बीड जिल्ह्यात कधी काय घडेल याचा नेम नाही.चोरीचा नवा धक्कादायक पॅटर्न उघडकीस आला असल्याने नव्या चर्चेला उधाण आले आहे. एका शेतकऱ्याच्या विहिरीतील सहा टँकर पाणी चोरीला गेल्याची खळबळजनक घटना घडली आहे. त्यामुळे ऐन उन्हाळ्यात जनावरांना पाणी कोठून आणायचं? आंब्याची झाड कशी जगवायची? असा प्रश्न शेतकऱ्यांने विचारला आहे. ही घटना साक्षाळ पिंपरीत घडली आहे.
चोरीच्या घटना सामान्य बनलेल्या आहेत. पैसे दाग दागिने किमती वस्तू चोरीला गेल्याचे प्रकार आजपर्यंत ऐकल्या गेले. मात्र बीडच्या साक्षाळ पिंपरीत त्रिंबक काशीद या शेतकऱ्याच्या विहिरीमधील चक्क सहा टँकर पाणी चोरीला गेलं आहे. जिल्ह्यामध्ये भयंकर दुष्काळ आणि पिण्याच्या पाण्याची भासत असलेली टंचाई या अनुषंगाने त्रिंबक काशीद या शेतकऱ्याने गेल्या दोन महिन्यांपूर्वी आपल्या शेतातील असलेल्या विहिरीमध्ये अडीच परस पाणी साठवून ठेवलं होतं.हे पाणी त्यांच्या गुरा-ढोरांसाठी त्याचबरोबर त्यांनी वीस गुंठ्यामध्ये आंब्याचे झाड लावले आहेत, ते जगवण्यासाठी साठवून ठेवलं होतं. मात्र पाणी चोरण्याचा उद्योग काही चोरट्यांनी केला आहे. तसेच काही पाणी शेतामध्ये वाया घालवले आहे.
शेतकरी त्रिंबक काशीद व पत्नी रंभा काशीद हे दोन दिवस आपल्या नातेवाईकांकडे लग्नाच्या कार्यक्रमासाठी गेले होते. याचाच फायदा घेऊन हे कृत्य केल्याचं त्यांनी सांगितलं आहे. घटना घडल्यानंर महिला शेतकऱ्याला अश्रू अनावर झाले होते. जाणून-बुजून कोणीतरी खोडसाळपणा केल्याचा शेतकऱ्याचा आरोप आहे.
”मला पाणी मागितलं असतं तर आम्ही दिला असतं. मात्र कोणीतरी जाणून-बुजून हे केलं आहे. आमचे जनावर त्याचबरोबर आंब्याची झाडं आम्ही जगवायची कशी? असा प्रश्न रंभा काशीद यांनी उपस्थित केला. संबंधित पाणी चोरणाऱ्यावर कारवाई करण्याची मागणी जोर धरू लागली आहे. दरम्यान पाण्याची चोरीला गेल्याची चर्चा जिल्ह्यात वाऱ्यासारखी पसरली आहे.