मुंबई — अंगणवाडीतील बालके, गरोदर महिला, स्तनदा माता आणि आकांक्षित जिल्ह्यांतील किशोरवयीन मुलींना देण्यात येणाऱ्या घरपोच आहारात (THR) आता पोषणमूल्यांसोबत चवीलाही महत्त्व देण्यात आले आहे. लाभार्थ्यांना अधिक रुचकर आणि पौष्टिक आहार मिळावा यासाठी नवीन पाककृतींचा समावेश करण्यात आल्याची माहिती महिला व बालविकास मंत्री आदिती तटकरे यांनी दिली.
एकात्मिक बाल विकास सेवा योजना (ICDS) अंतर्गत देण्यात येणाऱ्या घरपोच आहाराचा आढावा घेण्यासाठी मंत्रालयात बैठक आयोजित करण्यात आली होती. यावेळी मंत्री आदिती तटकरे यांनी स्वतः पोषण आहाराच्या गुणवत्तेची तपासणी केली.
घरपोहोच (THR) आहारात नवीन बदल
केंद्र शासनाच्या निकषानुसार सध्या लाभार्थ्यांना प्रीमिक्स स्वरूपात घरपोच आहार दिला जातो. मात्र, लाभार्थ्यांचा प्रतिसाद, क्षेत्रीय अधिकाऱ्यांच्या सूचना आणि तज्ज्ञांच्या शिफारशी लक्षात घेऊन आहाराच्या गुणवत्तेत बदल करण्यात आले आहेत.
‘एनर्जी डेन्स मूग डाळ खिचडी प्रीमिक्स’मधील घटकांच्या मिश्रणात सुधारणा करण्यात आली असून आता चव आणि दर्जा टिकवण्यासाठी मसाल्याचे पाकीट स्वतंत्रपणे उपलब्ध करून दिले जाणार आहे.
‘व्हेज पुलाव’ आणि ‘मल्टीग्रेन पफ’चा समावेश
नवीन बदलांमध्ये आहारात दोन नवीन पाककृतींचा समावेश करण्यात आला आहे.
व्हेज पुलाव
मल्टीग्रेन पफ
याशिवाय आरोग्यासाठी उपयुक्त असलेली ‘मल्टी मिक्स सिरियल्स अँड प्रोटीन्स’ ही पाककृती कायम ठेवण्यात आली आहे.
पोषणमूल्यांची गुणवत्ता कायम
नवीन पाककृतींमध्ये केंद्र शासनाने निश्चित केलेल्या प्रमाणानुसार उष्मांक, प्रथिने आणि आवश्यक सूक्ष्म पोषकतत्त्वांचा (Micronutrients) समावेश करण्यात आला आहे. त्यामुळे लाभार्थ्यांना चविष्ट आहारासोबत योग्य पोषण मिळणार आहे.
कुपोषण कमी करण्यासाठी सरकारचा प्रयत्न
राज्यात कुपोषण कमी करण्यासाठी शासनाकडून विविध उपाययोजना राबवण्यात येत आहेत. मागील काही वर्षांत कुपोषणाच्या प्रमाणात घट झाल्याचा दावा करण्यात आला असून नवीन पाककृतींमुळे लाभार्थ्यांची आहाराबाबतची स्वीकार्यता वाढेल, असा विश्वास महिला व बालविकास विभागाने व्यक्त केला आहे.
आहारातील बदल करण्यापूर्वी राज्यभर सर्वेक्षण करण्यात आले होते. तसेच वैद्यकीय अधिकारी, आहारतज्ज्ञ आणि तज्ज्ञ संस्थांचे मत घेण्यात आले असल्याची माहिती डॉ. अनुपकुमार यादव यांनी दिली.
