केज — धारूर आगारात कार्यरत असलेल्या बसचालकाने केज तालुक्यातील धनेगाव येथील मांजरा धरणाच्या रॅम्पच्या लोखंडी अँगलला गळफास घेऊन जीवन संपवले.
या बाबतची माहिती अशी की,केज तालुक्यातील धनेगाव येथील रहिवाशी असलेले आत्मलिंग नामदेव गुजर यांनी दि.७ फेब्रुवारी रोजी सायंकाळी ६.४५ वाजण्याच्या सुमारास धनेगाव येथील मांजरा धरणाच्या डाव्या कालव्याच्या रॅम्प च्या लोखंडी अँगलला दोरीने गळफास घेऊन आत्महत्या केली आहे.या घटने मागील कारण अद्याप स्पष्ट झालेले नाही. मयत आत्मलिंग गुजर यांचे चुलत भाऊ विश्वनाथ रामलिंग गुजर यांच्या फिर्यादी वरून युसुफवडगाव पोलिस ठाण्यात अकास्मिक मृत्यूची नोंद दाखल करण्यात आले आहे. सहाय्यक पोलिस निरीक्षक मच्छिंद्रनाथ शेंडगे यांच्या मार्गदर्शनाखाली पोलिस जमादार डोंगरे हे तपास करीत आहेत.

बीड — आमच्या गाडीला तू कट का मारला? असे कारण पुढे करत एका शिक्षकाला रस्त्यात अडवून त्याच्या गळ्याला चाकू लावला; त्याच्या हातातील दोन अंगठ्या, एक मोबाईल, नगदी पाच हजार असा एकूण ६२ हजाराचा ऐवज काढून घेतल्याचा प्रकार खालापूरी-राजुरी या रस्त्यावर घडला. या प्रकरणी बीड ग्रामीण पोलिस ठाण्यात तीन जणांविरोधात गुन्हा दाखल करण्यात आला आहे.

रविसिंग भगवान खांभेकर हे कमळेश्वर धानोरा केंद्र खालापुरी या ठिकाणी शिक्षक म्हणून कार्यरत आहेत. ७ तारखेला ते शाळेतून घरी मोटार सायकलवरून येत होते . यावेळी खालापुरी राजुरी रस्त्यावर त्यांना अभिजीत शरद पवार व अन्य दोन जणांनी रस्त्यावर अडवले. तू आमच्या गाडीला कट का मारला ? असं विचारत शिक्षकाला मारहाण केली. त्यांच्या गळ्याला चाकू लावून दोन अंगठ्या, एक मोबाईल, नगदी पाच-हजार, आधार कार्ड, एटीएम कार्ड असा ६२ हजाराचा ऐवज जबरदस्तीने काढून घेतला. या प्रकरणी शिक्षक खांबेकर यांच्या तक्रारीवरून अभिजीत पवार व अन्य दोघा जणांविरोधात बीड ग्रामीण पोलीस ठाण्यात गुन्हा दाखल करण्यात आला आहे. पुढील तपास पोलीस करीत आहेत.

जामखेड — तु मला फोनवर का बोलत नाही? माझा नंबर ब्लॉक का केला? असे म्हणत रागातून नर्तिकेवर कोयत्याने वार करत गंभीर जखमी केले. जखमी महिलेवर जामखेड येथील एका खासगी रुग्णालयात उपचार सुरू आहेत. घटनेनंतर हल्लेखोर आरोपी घटनास्थळावरून पसार झाला आहे.जख्मी महिला जामखेड येथील कलाकेंद्रात नृत्यांगना म्हणून काम करीत आहे. या घटनेने खळबळ उडाली आहे.या प्रकरणी पिडीत महीलेचा मित्राविरोधात दिलेल्या फिर्यादीवरुन आरोपी राहूल अशोक कचरे याच्या विरोधात जीवे मारण्याचा प्रयत्नाचा गुन्हा दाखल करण्यात आला आहे.

याबाबत सविस्तर असे की, जामखेड शहरातील तपनेश्वर भागात राहणाऱ्या आणि सांस्कृतिक कला केंद्रातील नृत्यांगनेचे या गुन्ह्यातील आरोपी राहूल अशोक कचरे याचे सोबत मागील पाच वर्षांपासून मैत्रीचे संबध होते. यापुर्वी देखील त्रास देत असल्याने महिलेने कचरे विरोधात गुन्हा दाखल केलेला आहे.
याच त्रासातून गुरुवार दि. ५ फेब्रुवारी रोजी रात्री १० वाजण्याच्या सुमारास फिर्यादी महीलेस आरोपी राहुल कचरे याने फोनवरून् तु माझ्याशी फोनवर बोल, माझे तुझ्यावर प्रेम आहे. तु जर बोलली नाही तर मी तुला मारून टाकीन अशी धमकी दिली होती. त्यावेळी फिर्यादी महीलेने त्याचा फोन कट केला. त्यानंतर दुसऱ्या दिवशी रात्री २ वाजण्याच्या सुमारास फिर्यादी महिला ही आपल्या रूमवर असताना तिची मैत्रिण बाल्कणीत गेली असता तेथे दबा धरून बसलेला आरोपी राहूल कचरे याने नर्तीकेच्या रूममध्ये येत तु माझ्याशी का बोलत नाही? माझा नंबर का ब्लॉक केला? असे म्हणून फिर्यादी महीलेच्या बोटांवर, हातावर व डोक्यावर कोयत्याने वार करून जखमी केले आहे. त्यावेळी तिच्या मैत्रिणीने त्यास मारू नको अशी विनंती केली होती. मात्र मी तुला संपवून टाकणार आहे अशी धमकी देत आरोपी निघून गेला. या प्रकरणी २६ वर्षीय नृत्यांगनेच्या फिर्यादीवरुन आरोपी राहुल अशोक कचरे, रा. खळेगाव ता. गेवराई जि. बीड याच्या विरोधात जामखेड पोलीस स्टेशनला गुन्हा दाखल करण्यात आला असून सध्या आरोपी हा फरार आहे. पुढील तपास पोलीस निरीक्षक दशरथ चौधरी यांच्या मार्गदर्शनाखाली सहाय्यक पोलीस निरीक्षक वर्षा जाधव या करीत आहेत.

अंबाजोगाई — शहरातील रविवार पेठ तसेच बाराभाई गल्ली परिसरात झालेल्या घरफोडीचा पोलिसांनी कसून तपास केला.या प्रकरणातील दोन आरोपींना पोलिसांनी शनिवारी अटक केली.त्यांच्याकडून ६ लाख १० हजार रुपयांचा ऐवज हस्तगत करण्यात आला आहे.

याबाबत माहिती अशी की काझी मोहम्मद अलीमुद्दीन करीमुद्दीन रा. बाराभाई गल्ली अंबाजेगाई यांच्या बंद घरात २९ जानेवारी रोजी मध्यरात्री सव्वा एकच्या सुमारास दोन चोरट्यांनी प्रवेश केला. त्यानंतर त्यांनी चार लाखाची रोख रक्कम व सोन्या चांदीचे दागिने असा ११ लाख ७ हजार रुपयांचा ऐवज चोरून नेला होता. ही चोरीची घटना लक्षात आल्यानंतर काजी मोहम्मद यांनी अंबाजोगाई पोलिसांत धाव घेत गुन्हा दाखल केला. त्यानुसार पोलिसांनी तपासाची चक्रं फिरवित पठाण मोहम्मद रियाज खान वय २५ वर्ष, रा. बाराभाई गल्ली व सलमान मुस्तफा शेख वय ३१ वर्ष, रा. झारेगल्ली, अंबाजोगाई या दोघांना शिताफिने पकडले त्यांच्याकडून ६ लाख १० हजार रुपयांचा मुद्देमाल पोलिसांनी जप्त केला आहे

गेवराई — चकलांबा पोलीस ठाणे हद्दीतील बोरगाव फाटा येथील गोदापात्रातून अवैध वाळूची वाहतूक होत असल्याची माहिती स्थानिक गुन्हे शाखेला मिळताच शुक्रवारी दोन हायवावर कारवाई केली. पोलिसांनी यावेळी ५० लाख ६० हजारांचा मुद्देमाल जप्त केला असून चकलांबा पोलिस ठाण्यात गुन्हा दाखल करण्यात आला आहे.

चकलांबा पोलीस ठाणे हद्दीतून अवैध वाळू उपसा केला जात असल्याची चर्चा मोठ्या प्रमाणावर होते आहे. बोरगाव परिसरात शुक्रवारी रात्री ८ च्या सुमारास स्थानिक गुन्हे शाखेच्या टिमने पाठलाग करून दोन वाळूने भरलेल्या हायवावर कारवाई करत एकूण ५० लाख ६० हजाराचा मुद्देमाल जप्त केला असून सर्फराज राजू पठाण वय २९ वर्ष रा. महारटाकळी ता. गेवराई जी. बीड व अशोक दत्तात्रय रकटे वय ३६ वर्ष रा.मुंगी ता. शेवगाव जि. आहिल्यानगर या दोघांवर चकलांबा पोलिस ठाण्यात गुन्हा दाखल करण्यात आला आहे. सदरील कारवाई पोलिस अधीक्षक नवनित कॉवत, अप्पर पोलिस अधीक्षक सचिन पांडकर, स्थानिक गुन्हे शाखेचे पोनि शिवाजी बंटेवाड, यांच्या मार्गदर्शनाखाली पोउपनि खटावकर, श्री. यादव, बबन सलगर, विकास राठोड, अंकुश वरपे यांनी केली असून पुढील तपास सुरु आहे.

अंबाजोगाई — राजमा बियाणे पुरवठा करण्याच्या नावाखाली अंबाजोगाई येथील एका बियाणे व्यापाऱ्याची १२ लाख ८० हजार २०० रुपयांची फसवणूक झाल्याचा प्रकार उघडकीस आला आहे. या प्रकरणी अंबाजोगाई शहर पोलीस ठाण्यात साताऱ्यातील ‘येस फ्रेश फार्मर प्रोड्युसर कंपनी’च्या ६ संचालकांविरुद्ध गुन्हा दाखल करण्यात आला आहे.

अंबाजोगाई येथील सुयश प्रेमचंद मुथा रा. गुरुवार पेठ, अंबाजोगाई हे बियाणे व्यवसायाचे काम पाहतात. जुलै २०२५ मध्ये साताऱ्याच्या ‘यश फ्रेश फार्मर प्रोड्युसर कंपनी’चे संचालक संजय बाबासाहेब भगत आणि ओंकार संजय भगत यांनी मुथा यांची भेट घेऊन त्यांना राजमा बियाण्याचे उच्च दर्जाचे नमुने दाखवले होते. त्यानुसार मुथा यांनी २१ जुलै २०२५ रोजी एकूण ८५ टन राजमा खरेदीचा करार केला आणि आरटीजीएसद्वारे वेळोवेळी रक्कम जमा केली. करारानुसार ठरलेला माल तपासण्यासाठी मुथा साताऱ्याला गेले असता, तिथे दाखवल्याप्रमाणे चांगल्या दर्जाचा माल उपलब्ध नव्हता. तडजोड म्हणून त्यांनी २५ टनाची नवीन ऑर्डर दिली आणि एकूण २६ लाख ३१ हजार रुपये जमा केले. मात्र, आरोपींनी ३० ऑगस्ट २०२५ रोजी केवळ १२ टन माल पाठवला,जो अत्यंत निकृष्ट दर्जाचा होता. त्यामध्ये भेसळ, माती आणि पेरणीसाठी अयोग्य साहित्य मोठ्या प्रमाणात होते. उर्वरित मालासाठी किंवा पैसे परत मिळवण्यासाठी मुथा यांनी वारंवार संपर्क केला असता, आरोपींनी पैसे देण्यास नकार दिला आणि अर्वाच्य भाषेत उत्तरे दिली. आपली फसवणूक झाल्याचे लक्षात आल्यानंतर सुयश मुथा यांनी अंबाजोगाई शहर पोलीस ठाण्यात तक्रार दिली. पोलिसांनी संजय बाबासाहेब भगत, ओंकार संजय भगत, अरविंद सोपान विधाते, सारीका सोमनाथ शिंदे, बालुताई सोमनाथ जगताप आणि बालकृष्ण पंढरीनाथ चव्हाण या ६ संचालकांविरुद्ध गुन्हा नोंदवला आहे. पोलीस निरीक्षक शरद जोगदंड या प्रकरणाचा अधिक तपास करत आहेत.