माजलगाव — शेतातील वळण रस्त्यावर ट्रॅक्टर पलटी होऊन त्याखाली तो दबल्यामुळे तरुणाचा मृत्यू झाला. ही घटना हिवरा बुद्रुक गावात गुरुवारी पहाटेच्या सुमारास घडली
गणेश भारत गाडे वय 28 वर्ष असं मृत तरुणाचं नाव आहे.
गणेश गाडे हा गुरवारी पहाटे 2 वाजता शेतातील कामासाठी ट्रॅक्टर घेऊन जात होता.यावेळी शेत वळण रस्त्यावर ट्रॅक्टरला टर्न मारत असताना ट्रॅक्टर पलटी झाला. या झालेल्या अपघातात ट्रॅक्टर अंगावर पडल्याने गणेश गाडे हा गंभीर जखमी झाला. अपघात झाल्यानंतर स्थानिक लोकांनी तात्काळ घटनास्थळी धाव घेतली जखमी तरुणाला उपचारासाठी रुग्णालयात दाखल केले. मात्र डॉक्टरांनी त्याला मृत घोषित केले. मृत तरुण शेतमजुरी करून आपल्या कुटुंबाचा उदरनिर्वाह करत होता.या घटनेमुळे तरुणाच्या गावात शोककळा पसरली आहे. या घटनेची नोंद माजलगाव ग्रामीण पोलीस ठाण्यात करण्यात आली असून पुढील तपास पोलीस करत आहेत

नेकनूर — नेकनूर पोलिसांना गांजा तस्करीचे रॅकेट उघडकीस आणण्यात यश मिळाले आहे.सिमेंटच्या गोणीतून गांज्याची तस्करी कांहीं जण करत असल्याची गूप्त माहिती सहाय्यक पोलीस निरीक्षक चंद्रकांत गोसावी यांना मिळाली. त्यांनी माहिती मिळताच तात्काळ कारवाई करत एका शेतात छापा मारुन फर्दाफ़ाश केला.या कारवाईत तीन लाखांचा गांजा जप्त करत दोघांना ताब्यात घेण्यात यश मिळवले.
नेकनूर पोलीस ठाणे हद्दीतील हिंगणी बुद्रुक येथील एका उसाच्या शेतात सिमेंटच्या गोणीत गांज्या भरून ठेवण्यात आला होता.याची माहिती नेकनूर पोलिसांना झाल्यानंतर सहाय्यक पोलीस निरीक्षक चंद्रकांत गोसावी व त्यांच्या टीमने छापा मारला.यावेळी शेतात दोन सिमेंटच्या गोणीत 11 किलो 150 ग्रॅम गांज्या पोलिसांना सापडला.याची किंमत 2 लाख 78 हजार 750 रुपये इतकी आहे ‌या गांज्याची तस्करी होणार असतानाच पोलिसांनी गुमानसिंग शिवराम पावरा वय-35 वर्ष,रा.बोरमल्ली पाडा,ता.शिरपूर,जि. धुळे व मनोज सीताराम मेहता वय19 वर्ष,रा.बाखरली,ता.वरला,जि.बडवानी राज्य.मध्यप्रदेश या दोघांना ताब्यात घेण्यात आले आहे.नेकनूर पोलीस ठाण्यात दोन्ही आरोपीवर गुन्हा दाखल करण्यात आला असून या प्रकरणाचा पुढील तपास पोलीस उपनिरीक्षक आहेर हे करीत आहेत.

बीड — चौसाळा येथील महाविद्यालयात विद्यार्थ्यांना कॉपी पुरवल्याचा ड्रोन व्हिडिओ शिक्षण अधिकाऱ्यांच्या कॅमेऱ्यात कैद झाल्याची बातमी समोर आली आहे.काही पालक खिडक्यांमधून चढून कॉपी पुरवताना दिसले. हा ड्रोन व्हिडिओ समोर आल्याने एकच खळबळ उडाली होती. जिल्हाधिकाऱ्यांनी संबंधित लोकांविरुद्ध गुन्हा दाखल करण्याचे आदेश दिले आहेत. याप्रकरणी केंद्र संचालकासह 17 शिक्षकाविरोधात नेकनूर पोलीस ठाण्यात गुन्हा दाखल करण्यात आला आहे.
चौसाळा येथील बारावी परीक्षेदरम्यान कॉपी पुरवतानाचा प्रकार ड्रोन कॅमेऱ्यात कैद झाला होता.शिक्षण विभागाने हा व्हिडिओ जारी केला असून त्यात परीक्षेच्या वेळी कोणत्याही प्रकारची बाहेरून मदत किंवा साहित्य पुरवणे हे नियमांचे उल्लंघन असल्याचं स्पष्ट केले आहे. असं असूनही, काही लोक नियमांकडे दुर्लक्ष करून त्यांच्या मुलांना कॉपी पोहोचवताना दिसले आहेत. या संपूर्ण प्रकरणाचं गंभीर्य लक्षात घेऊन जिल्हा दंडाधिकाऱ्यांनी अशा लोकांवर कठोर कारवाई करण्याचे निर्देश दिले आहेत.ड्रोन व्हिडिओच्या आधारे, परीक्षा केंद्राचे सीसीटीव्ही फुटेज महसूल अधिकारी आणि शिक्षण अधिकाऱ्यांनी रात्री तपासले. जिल्हा दंडाधिकारी विवेक जॉन्सन यांनी या प्रकरणात शिक्षक, केंद्रप्रमुख आणि इतर संबंधित लोकांविरुद्ध गुन्हा दाखल करण्याचे आदेश दिले आहेत. दरम्यान या प्रकरणात बीडचे. प्रभारी गटशिक्षणाधिकारी समंदर हमीद खान पठाण  यांनी नेकनूर पोलीस ठाण्यात तक्रार दाखल केली. याप्रकरणी केंद्र संचालक संजय घाडगे,भागवत बब्रुवान कुरुंद दोन्ही कला व विज्ञान कनिष्ठ महाविद्यालय,चौसाळा ता.जि. बीड, गोरोबा धोंडीराम बचुटे, श्रीमती राजेश्री गोविंद माने, वसीम शेख,आर.जी करडकर
एस.आर दांगट सर्व रा.प्रमीलादेवी कनिष्ठ महाविद्यालय नेकनुर ,विनायक अशोकराव वजे, ताराचंद रेवा राठोड , ए.बी अघाव, पी. के. रसाळ, जी. बी चक्रे सर्व रा. डाॅ. पारनेरकर महाराज विद्यालय मांजरसुंबा, सी.एस मुळीक बी. बी. सुपेकर, यु डी उगले, एम.एस गवई
बालासाहेब दामो पवार सर्व रा.भालचंद्र माध्य उच्य मा. विद्यालय लिंबागणेश यांच्या नावाचा तक्रारीत समावेश असल्याची माहिती मिळत आहे.

बीड — येथे 174 पदांसाठी पोलीस भरती प्रक्रिया सुरू आहे. सोळाशे मीटर धावण्याच्या चाचणी दरम्यान बुधवारी (दि.11) दुपारी एका तरुणाचा मृत्यू झाल्याची घटना घडली. दीपक भास्कर वाव्हळ रा. मांडेखेल.ता. परळी असे मृत तरुणाचे नाव आहे. तो मूळचा मांडेखेल येथील रहिवासी आहे. दीपक सकाळी परळीहून बीड येथे पोलीस भरतीसाठी दाखल झाला होता. भरती दरम्यान कवायत, धावणे आदी शारीरिक चाचण्या पूर्ण झाल्यानंतर त्याची वैद्यकीय तपासणी सुरू असतानाच अचानक मैदानावर भोवळ येऊन कोसळला त्याला उपचारासाठी जिल्हा रुग्णालयात हलवण्यात आले मात्र वैद्यकीय अधिकाऱ्यांनी त्याला मृत घोषित केले. डीहायड्रेशन मुळे हार्ट अटॅक आला असावा असा प्राथमिक अंदाज डॉक्टरांनी व्यक्त केला आहे ‌

दीपकचे आई-वडील ऊसतोड कामगार असून कुटुंबाची आर्थिक परिस्थिती अत्यंत हालाखीची आहे. मयत युवक दीपक याचे प्राथमिक व बारावीपर्यंतचे शिक्षण गावातच झाले आहे. उपजीविकेसाठी दीपक पुण्याला काम करत होता. मात्र पोलीस होण्याचे स्वप्न उराशी बाळगून तो गेल्या दोन महिन्यांपासून गावाकडे येऊन पोलीस भरतीची तयारी करत होता. त्याचा एक लहान भाऊ असुन तो ऑटो रिक्षा चालवतो. ऊसतोड मजूर असलेल्या या कुटुंबात कुटुंबाचा आधार होण्याची धडपड करणाऱ्या या युवकावर नियतीने अशा पद्धतीने घाला घातल्याने मांडेखेल गावात शोक व्यक्त केला जात आहे. या दुर्दैवी घटनेमुळे मांडेखेल व परळी परिसरात हळहळ व्यक्त होत असून या कुटुंबावर शोककळा पसरली आहे.

पीडित कुटुंबाविरोधात पोलिसांकडून गुन्हा दाखल

बीड — धावज्याची वाडी येथील अल्पवयीन मुलीच अपहरण केल्याची घटना दोन महिन्यापूर्वी घडली होती. या प्रकरणात तक्रारदाराच्या नातेवाईकांना मारहाण करून गुन्हे दाखल करण्याचा प्रकार नेकनूर पोलिसांनी केला. याचा व्हिडिओ समाज माध्यमावर व्हायरल झाला होता. या प्रकरणात पोलिसांनी सात जणांसह इतर अज्ञात इसमावर गुन्हे दाखल केले आहेत. या प्रकरणाच्या चौकशीचे आदेश पोलीस अधीक्षकांनी दिले आहेत.
याबाबत अधिक माहिती अशी की, धावज्याची वाडी येथील अल्पवयीन मुलगी एक डिसेंबर 2025 पासून गायब आहे. या प्रकरणात नातेवाईकांनी तक्रारही दाखल करून दोन महिन्याहून अधिक काळ उलटला आहे. मुलीच्या वडिलांनी संशयितांची नाव देखील सांगितली आहेत. मात्र पोलिसांच्या हाती अजून काहीच लागले नाही. पीडित कुटुंबाने पोलीस ठाण्यात ठिय्या दिला. ठाण्याचे उंबरे झिजवले मात्र पोलिसांनी समाधानकारक उत्तर कधीच दिले नाही. दरम्यान मंगळवारी पीडित कुटुंब नातेवाईकांसोबत पोलीस ठाण्यात आले असता नातेवाईकांना पोलिसांनी मारहाण केली. पोलीस ठाण्यात बसवून ठेवले. वार्तांकन करण्यासाठी आलेल्या पत्रकाराला ही दमदाटी करण्यात आली. एवढ्यावरच हे प्रकरण थांबलं नाही तर गुन्हे देखील दाखल करण्यात आले. मात्र पोलिसांनी दाखल केलेल्या एफ आय आर मध्ये संशयित आरोपीचे नातेवाईक रुक्मिण पांडुरंग चोबे, धर्मा रघुनाथ खिल्लारे या दोघांना चौकशीसाठी पोलीस ठाण्यात बोलावले होते. मात्र अपहरण झालेल्या मुलीचे पीडीत कुटुंब न बोलवता पोलीस ठाण्यात त्याच वेळेत हजर झाले. पीडित कुटुंबाला तपासाची माहिती देण्यात आली. दरम्यान फिर्यादीचे व आरोपीचे कुटुंब बाहेर पडत असताना एकमेकांना शिवीगाळ करू लागले. एकमेकांना मारहाण देखील करू लागले. हा प्रकार पोलिसांनी सोडवला. या प्रकारामुळे सामाजिक शांतता भंग झाली. पोलीस ठाणे परिसरात दहशतीचे वातावरण निर्माण झाले. परिणामी पोलिसांनी रुक्‍मीन पांडुरंग चोबे, कृष्णा गोविंद चोबे, पांडुरंग बाबासाहेब चौबे, धर्मा रघुनाथ खिल्लारे, बब्रुवान नवनाथ गायकवाड, गवळण बाई बब्रुवान गायकवाड, बिभीषण हरिदास भोसले व इतर अन्य यांच्या विरोधात पोलीस हवालदार सतीश राऊत यांच्या फिर्यादीवरून कलम 194 (2) बीएनएस प्रमाणे गुन्हा नोंद करण्यात आला आहे.
दरम्यान या प्रकरणाच्या चौकशीचे आदेश पोलीस अधीक्षक नवनीत कांवत यांनी दिले आहेत. या प्रकरणाची चौकशी केजचे उपविभागीय अधिकारी करणार असून सीसीटीव्ही तपासले जाणार आहेत. या प्रकरणात पुढे काय होणार याकडे लक्ष लागले आहे.

केज — ऊस तोडणीच्या कामासाठी परभणी जिल्ह्यातून आलेल्या ऊसतोड मजुराच्या तेरा वर्षीय मुलीवर टोळीतील ट्रॅक्टर चालकाने कोयत्याचा धाक दाखवून दोन वेळेला बलात्कार केल्याची घटना घडली आहे.युसूफवडगाव पोलीस ठाण्यात ‘पोक्सो’ अंतर्गत याप्रकरणी गुन्हा दाखल करण्यात आला आहे.
याबाबत अधिक असे की, सूरज अशोक खरात रा. जामरून, ता. जिंतूर, जि. परभणी हा त्याच टोळीत ट्रॅक्टर चालक म्हणून काम करतो. १४ जानेवारी रोजी दुपारी १२ च्या सुमारास सुर्डी शिवारातील एका कोपीत तेरा वर्षीय मुलीला एकटे गाठून सुरज खरात ने कोयत्याचा धाक दाखवत अत्याचार केला. एवढ्यावरच तो न थांबता ८ फेब्रुवारी रोजी सकाळी पुन्हा हादगाव शिवारात त्याने पीडितेवर बळजबरी केली. जिवे मारण्याची धमकी दिल्याने घाबरलेल्या चिमुकलीने अखेर आपल्या आईला हा प्रकार सांगितला.पीडित बालिकेच्या आईने हिंमत दाखवत मंगळवारी रात्री उशिरा युसूफवडगाव पोलिसात धाव घेऊन तक्रार दिली. गुन्हा दाखल झाल्याची कुणकुण लागताच नराधम सूरज खरात आपला ट्रॅक्टर हादगाव शिवारात सोडून फरार झाला आहे. सध्या ‘पिंक पथका’चे प्रमुख पोलीस उपनिरीक्षक प्रकाश शेळके या प्रकरणाचा तपास करत असून फरार आरोपीच्या मुसक्या आवळण्यासाठी पोलीस शोध घेत आहेत.

बीड — पोलीस अधीक्षक नवनीत कांवत यांच्या कारकिर्दीत अजब काय घडेल सांगणं अवघड झालं आहे. पोलीस ठाण्याला तक्रारी तर घेतल्या जात नाहीत पण घेतलीच तक्रार तर तपासात यश येत नाही. मग काय तक्रारदाराचे नातेवाईक झोडपायचे गुन्हे दाखल करायची धमकी द्यायची हा नवा फंडा एसपींच्या लाडक्या गोसावींनी सुरू केला आहे. धावज्याचीवाडी येथील अल्पवयीन मुलगी दोन महिन्यापासून गायब आहे. पालक पोलीस ठाण्याचे उंबरे झिजवत आहेत. नेहमीप्रमाणे आजही ते नेकनूर मध्ये आले. पोलिसांची त्यांची बाचाबाची झाली मग काय आपल्या कर्तुत्वाचा डंका वाजवण्यासाठी तक्रारदाराच्या नातेवाईकांना झोडपून काढलं. पोलीस ठाण्यात बसवून ठेवलं. वार्तांकन करायला गेलेल्या पत्रकाराला ही धमकावलं. यापेक्षा वेगळी कायद्याच्या राज्याची संकल्पना काय असू शकते? बीडची जनता मात्र अशा घटनांनी धन्य धन्य होऊ लागली आहे.

आरक्षणाच्या मुद्द्यावरून बीडमध्ये जाळपोळ झाली. त्यावेळी पोलीस अधीक्षक असलेले नंदकुमार ठाकूर यांच्यावर हे प्रकरण शेकले गेले त्यांची बदली झाली. जाळपोळ झाली असली तरी जनता सुरक्षित होती हे वास्तव मान्य करायची वेळ आली आहे. पोलीस अधीक्षक नंदकुमार ठाकूर यांची बदली झाल्यानंतर काही काळासाठी अविनाश बारगळ विराजमान झाले होते. मात्र त्यानंतर जिल्ह्यात घडलेल्या अप्रिय घटनेनंतर  मोठ्या वल्गनेसह गाजावाजा करत नवनीत कांवत अधीक्षक पदावर विराजमान झाले. त्यांच मोठेपण जितकं मिरवलं गेलं तितकाच त्यांच्या मोठेपणाचा फुगा फाडकनं फुटला आहे. कायदा सुव्यवस्थेची जिल्ह्यात पुरती वाट लागली आहे. पोलीस अधीक्षक फक्त एम पी डी ए, मकोका प्रकरण करण्यात धन्यता मानत आहेत. पण जिल्ह्यात सगळी घाणच घाण झाली आहे. सगळ्या अवैध धंद्यांना पोलिसांचं संरक्षण मिळत आहे. माध्यम याचा उहापोह करीत असली तरी ज्या बीडच्या पत्रकारांनी पोलीस अधीक्षकांना डोक्यावर घेतलं तेच पोलीस अधीक्षक पत्रकारांची पोलीस अधिकाऱ्यांच्या बैठकीत लायकी काढण्यापर्यंत मजल मारत असल्याचं सांगितलं जात आहे. ही कदाचित वदंता ही असू शकते. पण कायदा सुव्यवस्थेचे तीन तेरा वाजल्याचे चित्र पाहायला मिळत आहे.
धावज्याची वाडी येथील अल्पवयीन मुलगी एक डिसेंबर 2025 पासून गायब झाली. मुलीच्या वडिलांनी 4 डिसेंबर रोजी नेकनूर पोलीस ठाण्यात तक्रारही दाखल केली. संशयितांची नाव देखील सांगितली. घटनेला दोन महिन्याहून अधिकचा काळ उलटून गेला आहे. पालक मात्र नेकनूर पोलीस ठाण्याच्या चकरा मारून परेशान आहेत. मुलीचा शोध लागत नाही म्हणून मुलीच्या आईने काही दिवस अन्न पाणी ही वर्ज्य केले होते. तब्येत खालावत होती. नातेवाईकांच्या आग्रहास्तव मुलीच्या आईने खाण पान सुरू केले. 12 जानेवारी रोजी अल्पवयीन मुलीच्या नातेवाईकांनी मुलीचा शोध लागावा म्हणून नेकनूर पोलीस ठाण्यात ठिय्या आंदोलन देखील केले होते. प्रत्येक वेळी पोलिसांचं एकच उत्तर तपास सुरू आहे. नातेवाईकांच पोलीस ठाण्याचे उंबरे झिजवण्याचं चक्र गेल्या दोन महिन्यापासून सुरू आहे. आज देखील असेच नातेवाईक पुन्हा पोलीस ठाण्यात आले. पोलिसांना विचारणा करायला गेले. संतापलेल्या पोलिसांनी पीडित कुटुंबाच्या नातेवाईकांना झोडपून काढले. त्यातल्या एका नातेवाईकाला पोलीस ठाण्यात बसवून ठेवले. त्याच्यावर गुन्हा दाखल करण्याची दमदाटी केली गेली कदाचित गुन्हा दाखल देखील झाला असेल. शेवटी ते पोलीस आहेत त्यांच्यापाशी ओल ही जळतं वाळलं ही जळतं असं सांगितलं जातं.आता खरा एसपींना अपेक्षित न्याय झाला. असं म्हणायची वेळ आली.एक बिचारा पत्रकारही गोंधळाचा आवाज ऐकून न रहावल्यामुळे पोलीस ठाण्यात काय घडत आहे याचा वार्तांकन करायला गेला. त्यालाही पोलिसांनी दमदाटी करून दादागिरी ची भाषा वापरली. आता पोलीस अधीक्षकांच्या कायदा सुव्यवस्थेच्या जिल्ह्यात पत्रकारांना वार्तांकन करणे देखील अवघड होत असल्याचे चित्र पाहायला मिळत आहे. असे प्रकार मात्र नंदकुमार ठाकूर यांच्या काळात कधीच पाहायला मिळाले नाहीत. हे वास्तव देखील नाकारता येत नाही. पोलीस कर्मचारी देखील इतके लाडवून कधीच ठेवले नाहीत. इतिहासात पहिल्यांदाच असे प्रकार घडू लागल्याचं पहायला मिळू लागला आहे. पोलीस उपनिरीक्षक चंद्रकांत गोसावी पोलीस अधीक्षकांचा लाडका आहे. मग जनतेला न्याय मिळणार कसा? पीडित अल्पवयीन मुलीचं तिच्या नातेवाईकाचं काहीही झालं तरी देणं घेणं काय? आपला खास मर्जीतला माणूस मजेत राहिला म्हणजे झालं एवढ महत्त्वाचं. मग कायदा सुव्यवस्थेचे धिंडवडे निघाले पोलीस दलाची इभ्रत टांगली गेली तर काय हरकत आहे कदाचित असा विचार केला असावा. पोलीस अधीक्षकांनी कमीत कमी तक्रार दाखल करू नये दाखल केलीच तर तपास कुठपर्यंत आला आहे याची विचारणा करू नये, पत्रकारांनी वार्तांकन करू नये असे अलिखित फतवे तरी काढावेत म्हणजे वर्तमानपत्राचे रकाने काळे करण्याची वेळ तरी येणार नाही असं म्हणण्याची वेळ आली आहे. पीडित कुटुंबांला न्याय मिळणारच नाही असं तरी सध्याचे चित्र पाहायला मिळत आहे.