पुणे — भोर तालुक्यातील नसरापूर येथील साडेतीन वर्षांच्या चिमुरडीवरील अत्याचार आणि हत्या प्रकरणात दोषी ठरलेल्या भीमराव कांबळे (वय 65) याला पुणे जिल्हा सत्र न्यायालयाने फाशीची शिक्षा सुनावली आहे. विशेष न्यायाधीश एस. आर. साळुंखे यांनी 29 जून रोजी शिक्षा सुनावत हा खटला “दुर्मिळातील दुर्मिळ” असल्याचे निरीक्षण नोंदवले.
या प्रकरणात 25 जून रोजी न्यायालयाने भीमराव कांबळे याला दोषी ठरवले होते. त्यानंतर शिक्षेवरील युक्तिवादासाठी 29 जूनची तारीख देण्यात आली होती. सरकारी पक्षाने आरोपीच्या गुन्ह्याचे गांभीर्य, पुरावे आणि तत्सम प्रकरणांचा दाखला देत फाशीच्या शिक्षेची मागणी केली होती.
न्यायालयाचे गंभीर निरीक्षण
विशेष न्यायालयाने निकाल देताना सांगितले की, या प्रकरणात पोलिसांनी अत्यंत वेगाने तपास पूर्ण करून ठोस पुरावे सादर केले. आरोपीचा गुन्हा क्रौर्यपूर्ण असून त्याच्या वर्तनातून पश्चात्ताप दिसून येत नाही. तसेच आरोपी सुधारण्याच्या पलीकडे असल्याचे न्यायालयाने नमूद केले.
सरकारी पक्षाने न्यायालयासमोर अशाच प्रकारच्या 12 प्रकरणांचा संदर्भ दिला होता. त्यातील अनेक प्रकरणांत फाशीची शिक्षा झाल्याचे न्यायालयाच्या निदर्शनास आणून देण्यात आले.
काय आहे नसरापूर प्रकरण?
1 मे 2026 रोजी भोर तालुक्यातील नसरापूर येथून साडेतीन वर्षांची मुलगी बेपत्ता झाली होती. काही वेळानंतर तिचा मृतदेह आढळून आला. वैद्यकीय तपासणीत तिच्यावर लैंगिक अत्याचार करून हत्या करण्यात आल्याचे स्पष्ट झाले.
घटनेनंतर राज्यभर संतापाची लाट उसळली होती. पुणे ग्रामीण पोलिसांनी सीसीटीव्ही फुटेज, तांत्रिक पुरावे, डीएनए तपासणी आणि साक्षीदारांच्या आधारे तपास करत संशयिताला अटक केली.
15 दिवसांत आरोपपत्र दाखल
पुणे ग्रामीण पोलिसांनी या प्रकरणाचा तपास जलदगतीने पूर्ण करत अवघ्या 15 दिवसांत विशेष न्यायालयात सुमारे 1200 पानी आरोपपत्र दाखल केले होते.
यानंतर फास्ट ट्रॅक पद्धतीने सुनावणी झाली. सरकारी पक्षाने वैज्ञानिक पुरावे आणि साक्षीदारांच्या आधारे बाजू मांडली.
प्रकरणाचा घटनाक्रम
1 मे 2026 : नसरापूरमधून चिमुरडी बेपत्ता; रात्री मृतदेह आढळला.
2 मे 2026 : पोलिसांनी संशयिताला ताब्यात घेतले.
मे पहिला आठवडा : वैद्यकीय व न्यायवैद्यकीय पुरावे जमा.
16 मे 2026 : 1200 पानी आरोपपत्र दाखल.
28 मे 2026 : न्यायालयाने आरोप निश्चित केले.
20 जून 2026 : अंतिम युक्तिवाद सुरू.
25 जून 2026 : भीमराव कांबळे दोषी ठरला.
29 जून 2026 : फाशीची शिक्षा सुनावण्यात आली.
