गेवराई (बीड) — अवैध वाळू उपशाविरोधात सातत्याने आवाज उठवणाऱ्या नागझरी येथील सरपंच नारायण शिंदे यांच्यावर वाळू माफियांनी घरात घुसून हल्ला केल्याची धक्कादायक घटना समोर आली आहे. या घटनेनंतर आरोपींना अद्याप अटक न झाल्याने संतप्त ग्रामस्थांनी धुळे-सोलापूर राष्ट्रीय महामार्गावर रास्ता रोको आंदोलन करत प्रशासनाचा निषेध केला.
सरपंच नारायण शिंदे हे मागील काही महिन्यांपासून गोदावरी नदीपात्रातून सुरू असलेल्या कथित अवैध वाळू उपशाविरोधात प्रशासनाकडे तक्रारी करत होते. याच कारणातून हा हल्ला करण्यात आल्याचा आरोप ग्रामस्थांनी केला आहे.
हल्लेखोरांनी घरात घुसून शिंदे यांना धमकी दिल्याची माहिती समोर आली असून, घटनेचे सीसीटीव्ही फुटेजही उपलब्ध झाल्याचे सांगण्यात येत आहे. या प्रकरणात तातडीने कारवाई करून आरोपींना अटक करावी, अशी मागणी ग्रामस्थांनी केली आहे.
नागझरी सरपंच नारायण शिंदे व त्यांच्या कुटुंबीयांवरील हल्ल्याच्या निषेधार्थ सोमवार (दि.२२) रोजी सकाळी १० वाजता बीड-जालना मार्गावरील राक्षसभुवन फाटा येथे रास्ता रोको आंदोलन करण्यात आले.
या आंदोलनात नागझरीसह खामगाव, आगरनांदर, सावळेश्वर, म्हाळस पिंपळगाव, गंगावाडी आणि राक्षसभुवन परिसरातील नागरिक मोठ्या संख्येने सहभागी झाले. आंदोलकांनी “दोषींना तात्काळ अटक करा”, “सरपंच कुटुंबाला संरक्षण द्या”, “वाळू माफियांचा बंदोबस्त करा” अशा घोषणा देत प्रशासनाविरोधात संताप व्यक्त केला.
दरम्यान, पोलिसांनी आरोपींवर कठोर कारवाई करून त्वरित अटक करावी आणि सरपंच कुटुंबाला सुरक्षा द्यावी, अशी मागणी ग्रामस्थांकडून करण्यात आली आहे.
