बीड — पोलीस अधीक्षक नवनीत कांवत यांनी पोलीस प्रशासन किती लोकाभिमुख केलं याची टिमकी नववर्षाच्या स्वागताला वाजवली त्याचा भांडाफोड करण्याची वेळ आली आहे.एसपींच्या खास मर्जीतले नेकनूर चे ठाणे प्रमुख चंद्रकांत गोसावी यांनी 78 वर्षीय अंजना बन नावाच्या आज्जीला न्यायासाठी आत्मदहन करण्याची वेळ आणली आहे. 11 जानेवारीला नेकनूर पोलीस ठाण्यासमोर आत्मदहनाचा इशारा 10 दिवसापूर्वीच देऊनही पोलीस अधीक्षकांनी देखील कुठलीच दखल घेण्याची तसदी घेतली नसल्याचं पाहायला मिळत आहे.

.                  बीड जिल्ह्यात खून, दरोडे, चोऱ्या, गोळीबार, अपहरण, राजरोस चालणारे अवैध धंदे यांच्यापुढे हे प्रकरण तसं पाहिलं तर अतिशय क्षूल्लक आहे.पण पोलीस अधीक्षकांनी नववर्षाच्या स्वागतालाच किती लोकाभिमुख कामं केली आहेत.पोलीस प्रशासन किती सतर्क आहे. याचा ढोल वाजवला. तो वाजवायला ही हरकत नाही. पण कायदा सुव्यवस्था आणि एस पी चा आदेश कितपत मानला जातो. हा खरा प्रश्न सगळ्याच परिस्थितीतून निर्माण होतो. एसपींनी मर्जीतली माणसं अनेक ठिकाणी जनतेच्या माथी बळच मारली. अनेक वेळा कंट्रोलला बसवा असे सांगूनही एसपींनी त्यांच्या विनंतीला मान दिला नाही. मग काय? नंगा नाच करायला अख्खं रान यांना कमी पडू लागलं. अवैध धंद्यांची भरमार झाली. त्यातून स्वतःचे बंगल्यांचे इमले बांधले गेले. ही कहाणी आहे एसपींच्या मर्जीतल्या नेकनूरच्या ठाणे प्रमुख चंद्रकांत गोसावी ची त्याच्या अकार्यशैलीची गौरव गाथा माध्यमांनी अनेक वेळा मांडली.पण पिंडीवरच्या विंचवाला ठेचायचं कसं हे माध्यमांना देखील कळालं नाही. शेवटी अनेकांनी आपल्याच पापाचे भोग आहेत म्हणून घडतय ते घडू द्या म्हणून गोसावी चा नंगानाचाकडे दुर्लक्ष केलं.पण लोकाभिमुख प्रशासनाचा ढोल वाजवला त्यामुळे सत्य सांगण्यासाठी अशा गोष्टी पुढे आणण्याची वेळ “सह्याद्री माझा”वर आली.
नेकनूर पोलीस ठाणे हद्दीतील घारगाव येथील अंजना दगडू बन या 78 वर्षाच्या आज्जीवर न्यायासाठी आत्मदहनाची वेळ चंद्रकांत गोसावी यांनी आणली अंजना बन या गावाकडे एकट्याच राहतात परडी चा जोगवा मागून उदरनिर्वाह करतात परडी हेच एकमेव त्याचं जगण्याचं साधन. घरी कुणीच नसल्यामुळे मंदिरात झोपण्याच्या कारणावरून गणेश अंकुश सपकाळ याने मारहाण करत जीवे मारण्याची धमकी दिली. नुसती धमकीच दिली नाही तर नाकातली सोन्याची “मोरणी” काढून घेतली. याची रीतसर तक्रार नेकनूर पोलीस ठाण्याला दिली. तक्रारीला दीड महिना उलटून गेला मात्र कुठलीच कारवाई झाली नाही. चौसाळा पोलीस चौकीचा जमादार गर्जे याने तक्रार करणाऱ्या आज्जीलाच दापदडप करायला सुरुवात केली. “चोराला मेसाई धार्जिन” या म्हणीप्रमाणे “चोराला गोसावी धार्जीन” असं म्हणण्याची वेळ आणली. आज्जीने चंद्रकांत गोसावी ची देखील भेट घेतली. नातवासारख्या असलेल्या गोसावींनी देखील आज्जीची फरपटच केली. गर्जेची व आरोपीची बाजू घेतली. शेवटी अंजना बन यांनी 29 डिसेंबर 2025 रोजी येत्या आठ दिवसात गर्जे साहेब व गोसावी तसेच आरोपीवर कारवाई केली नाही तर 11 जानेवारी 2026 ला नेकनुर पोलीस ठाण्यात आत्मदहन करणार असल्याच निवेदन पोलीस अधीक्षकांना दिलं. पोलीस अधीक्षकांनी देखील पिंडीवरच्या विंचवालाच नेहमीप्रमाणे वरदान दिलं. निवेदन देऊन दहा-बारा दिवस होत आले तरी कुठलीच कारवाई कांवत यांनी देखील केली नाही. आत्मस्तुतीच्या ढोलाच्या आवाजात म्हाताऱ्या जोगवा मागून खाणाऱ्या निराधार आज्जीची आर्त हाक स्वतःला कर्तव्यदक्ष समजणाऱ्या पोलीस अधीक्षकांच्या कानावर गेली नाही. जर इतकी बिकट परिस्थिती असेल तर पोलीस अधीक्षकांनी प्रशासनाला लोकाभिमुख केल्याचे ढोल वाजवणं बंद करावं अशी मागणी जनतेतून केली जाऊ लागली आहे.

आष्टी — तालुक्यातील सराटेवडगाव येथील शेळके वस्तीवर 4 जानेवारीच्या मध्यरात्री झालेल्या जबरी चोरीच्या घटनेचा अंभोरा पोलिसांनी यशस्वी छडा लावला आहे. 17 पोलीस अधिकारी आणि कर्मचाऱ्यांच्या पथकाने 150 किलोमीटरची शोधमोहीम राबवून, चोरीतील दोन सख्ख्या भावांना त्यांच्या घरातून अटक केली.
अक्षय गारमन चव्हाण वय 23 वर्ष आणि रिजवान गारमन चव्हाण वय 20 वर्ष, रा. शेरी बु. अशी अटक केलेल्या आरोपींची नावे आहेत. सराटेवडगाव येथे ग्यानबा राजपुरे यांच्या घराचा दरवाजा तोडून चोरट्यांनी मारहाण करत दागिने आणि रोकड लंपास केली होती. सहायक पोलीस निरीक्षक मंगेश साळवे यांनी तातडीने तपासचक्र फिरवून सीसीटीव्ही आणि तांत्रिक विश्लेषण केले.
चोरटे आष्टी तालुक्यातील शेरी येथील असल्याची खात्री पटताच, मंगळवारी पहाटे पोलिसांनी आरोपींच्या घराला वेढा घातला. आरोपी गाढ झोपेत असतानाच पोलिसांनी त्यांच्या दारात उभे राहून मुसक्या आवळल्या. पोलीस तपासात चोरट्यांची एक धक्कादायक पद्धत समोर आली आहे. चोरीला जाताना हे आरोपी स्वतःचे मोबाईल दुसऱ्या तालुक्यात किंवा जिल्ह्यात ठेवतात, जेणेकरून त्यांचे लोकेशन सापडू नये.

गुन्ह्यासाठी ते वेगळी सिमकार्डे आणि मोबाईल वापरतात. मात्र, अंभोरा पोलिसांनी 150 किलोमीटर परिसरातील सीसीटीव्ही आणि तांत्रिक पुराव्यांच्या आधारे या हुशारीला मात दिली. ही कारवाई पोलीस अधीक्षक नवनीत कांवत, अप्पर पोलीस अधीक्षक सचिन पांडकर यांच्या मार्गदर्शनाखाली एपीआय मंगेश साळवे आणि त्यांच्या पथकाने केली. फरार असलेल्या इतर आरोपींचा शोध आता पोलीस घेत आहेत.

बीड — नेकनूर गोमांस तस्करीचा अड्डा तर आहेच शिवाय चौसाळात देखील खुलेआम गोमांस विक्री केली जाते. मात्र पोलिसांच्या नाकावर टिच्चून हा धंदा सुरू असला तरी पहिल्यांदाच नेकनूर पोलिसांनी धाडसी कारवाई करत बुधवार बाजारात आलेलं अंदाजे 90 किलो गोमांस जप्त केलं आहे. पोलिसांच्या या कधी नवे ते कर्तव्यदक्षतेमुळे कौतुक केलं जात आहे.
नेकनूर अतिशय संवेदनशील भाग म्हणून ओळखल जातं. गुरांचा आठवडी बाजार प्रसिद्ध असतानाच गोमांस तस्करी मध्ये देखील नेहमीच अग्रेसर राहिला आहे. त्याचप्रमाणे चौसाळा शहरात देखील गेल्या कित्येक महिन्यांपासून राजरोस गोमांसाची विक्री केली जात आहे. पोलिसांना याची सगळीच माहिती आहे.मात्र कायद्यापेक्षा मिळणारा “हप्ता” महत्त्वाचा त्यामुळे आज पर्यंत कारवाई कधीच झाली नाही. बुधवारी बाजारात देखील खुले आम विक्री सुरूच असते.पण चौसाळा शहरातून जात असलेल्या धुळे सोलापूर राष्ट्रीय महामार्गावर पवित्र प्रार्थनास्थळाच्या जवळच शुक्रवार मंगळवार आणि रविवारी गोमांसाची विक्री केली जाते. कायदा काय सांगतो यापेक्षा पोलिसांनी गोमांस विक्री व्यवसायाला आश्रय दिला तो गोरगरिबांची पोट भरावीत आणि रोजगारांच्या नवीन संधी निर्माण व्हाव्यात यासाठी त्यामुळे कधीच कारवाई केली गेली नाही. एखाद्याची चुकून तक्रार गेलीच तर वरवरची चौकशी चा ड्रामा करून त्या तक्रारीला केराची टोपली कशी दाखवायची याची हातोटी ठाणे प्रमुख चंद्रकांत गोसावींना चांगलीच माहित आहे. त्यामुळे गोमांस विक्रीला कायद्याने बंदी असली तरी संविधानापेक्षा गोसावींनी राबविलेला कायदा मोठा आहे.मग कारवाई करायची कशाला माध्यमांनी तरी अवैध धंद्यांच्या गोष्टी प्रसिद्ध कराव्यात कशाला ? शेवटी चंद्रकांत गोसावी यांचा कार्यकाळ संपत आला आहे. विशेष म्हणजे ते पोलीस अधीक्षक नवनीत कावत यांचे मर्जीतले आहेत.
गोसावींनी अनेक वेळा मला कंट्रोल ला टाका असं एसपींना अर्जव केलं मात्र दरवेळी त्यांच्या या मागणीला एस पीं नी दुर्लक्षित केलं. हीच बाब कायद्याचे तीन तेरा वाजवून सुव्यवस्थेला सूरुंग लावण्यासाठी महत्त्वाची ठरली मग कोणाच्या भावना दुखावल्या तरी चालेल पण मर्जीतला माणूस पदावर राहणं हे महत्त्वाचं मानलं गेलं. पोलीस अधीक्षक कर्तव्यदक्ष आहेत निष्कलंक आहेत हे वास्तव जरी असलं तरी माध्यमांच्या बातम्यांकडे ते करत असलेल्या दुर्लक्षामुळे व आपल्या सहकाऱ्यांवर असलेल्या अति विश्वासामुळे कायदा सुव्यवस्थेची घडी सगळी सडली आहे. अवैध धंदे नेकनूर परिसरात पोलिसाश्रयात चालत आहेत. पोलीस प्रमुख पदावर कोणीही बसलं तरी सामान्य जनतेने केलेल्या पापाची फळ त्यांना भोगायचीच आहेत असं म्हणून गप्प बसण्याची वेळ सध्या तरी आलेली आहे.
आज बुधवारी चौसाळाचा आठवडी बाजार असल्याने पोलिसांनी बाजारात धाडसी कारवाई केली. याला धाडसीच म्हणावं लागेल कारण कारवाई आजपर्यंत कधीच झाली नव्हती ती अखेर झाली. पोलिसांनी बाजारात खुलेआम विक्री होत असलेलं अंदाजे 90 किलो गोमांस जप्त केलं. ज्या तीन चाकी रिक्षातून हे गोमांस आणला गेलं तो रिक्षा ही पोलिसांनी जप्त केला. तीन जणांना पोलिसांनी बाजारातून उचललं ही धाडसी कारवाई पोलीस उपनिरीक्षक आहेर साहेब, पो, हे, जायभाय, पो, हे, क्षीरसागर, विद्वान , यांच्यासह चौसाळा ठाणे अमलदार मुरुमकर, पो, हे, पुंडे, पो, ना, घुले यांनी केली आहे.

बीड — पोलिसांनी धर्मापुरी पानगाव रस्त्याच्या डाव्या बाजूस असलेल्या गायरान जमिनीत छापा मारून चंदन चोरांची सात जणांची टोळी जेरबंद करण्यात यश मिळवलं. सहाय्यक पोलीस अधीक्षक ऋषिकेश शिंदे यांच्या पथकाने केलेल्या कारवाईत तीन लाख रुपयाचे 104 किलो चंदनासह सव्वा आठ लाख रुपयांचा मुद्देमाल जप्त करण्यात आला.
अंबाजोगाई चे सहाय्यक पोलीस अधीक्षक ऋषिकेश शिंदे यांना सोमवार दि. 5 जानेवारी रोजी चंदनाची खरेदी विक्री होत असल्याची खात्रीलायक माहिती सूत्रांकडून मिळाली. माहिती मिळताच धर्मापुरी पानगाव रस्त्याच्या डाव्या बाजूला असलेल्या गायरान जमिनीत रात्री नऊच्या सुमारास पोलिसांनी छापा मारला. यावेळी बेकायदेशीररित्या चंदनाची तस्करी पप्पु बाबुराव सूर्यवंशी वय 40 वर्ष, राहुल पप्पु सूर्यवंशी वय 23 वर्ष, तेजस कल्लप्पा कांळीबे वय 25 रा. अशोक नगर, परळी, जि. बीड,नितीन सटवा जाधव वय 22, रा. हनुमान नगर, परळी, जि. बीड अविनाश व्यंकट जाधव वय 23 वर्ष,व्यंकट रामचंद्र जाधव वय 45 (दोन्ही रा. फुलेनगर, उदगीर, जि. लातूर ,भारत निवृत्ती गायकवाड वय 40, रा. नाकलगाव, ता. माजलगाव, जि. बीड.हे आढळून आले. यावेळी दोन लाख साठ हजार रुपये रुपये किमतीचे 104 किलो लाकूड , 39 हजार रुपये किमतीची चंदन साल 39 किलो,टाटा इंडिगो चारचाकी कार ,दुचाकी वाहने अंदाजे एक लाख 60 हजार रुपये एक विनानंबर दुचाकी वीस हजार रुपयांची, 7 मोबाईल फोन लोखंडी तराजू व वाकस 1 हजार रुपये असा एकुण मुद्देमाल 8 लाख 21 हजार रुपये पंचांसमक्ष जप्त करण्यात आला.या प्रकरणी पोलीस अंमलदार सतेश कांगणे यांच्या फिर्यादीवरुन आरोपींविरुद्ध परळी ग्रामीण पोलीस ठाण्यात भारतीय न्याय संहिता कलम 303(2), 317(2), 3(5) अन्वये गुन्हा नोंद करण्यात आला आहे. दरम्यान ही कारवाई
पोलीस अधीक्षक नवनीत काँवत, अपर पोलीस अधीक्षक चेतना तिडके, सहा.पोलीस अधीक्षक ऋषीकेश शिंदे यांच्या मार्गदर्शनाखाली अंबाजोगाई ग्रामीण पोलीस ठाण्याचे पोलीस उपनिरीक्षक असद शेख परळी ग्रामीण पोलीस ठाण्याचे पोलीस उपनिरीक्षक निमोने, पोह. बासर, बिक्कड उपविभागीय पोलीस अधिकारी कार्यालयातील सतेश कांगणे, सोडगीर, उत्तरेश्वर केदार, खंदारे यांनी केली आहे.

बीड — फुटलेली पाईपलाईन दुरुस्त करत असलेल्या प्लंबर वर सुरुवातीला दोन गोळ्या झाडण्यात आल्या. या घटनेनंतर जखमी प्लंबर जीव वाचवण्यासाठी पळत असताना त्याच्यावर धारदार शस्त्राने वार करून हत्या करण्यात आल्याची खळबळ जनक घटना अंकुशनगर, साई पंढरी लॉन्सच्या समोर दुपारी अडीच तीन च्या सुमारास घडली.
हत्या,गोळीबार यासारख्या घटना बीडमध्ये सामान्य झालेल्या आहेत. गुन्हेगार कायद्याची ऐसी तैसी करत पोलिसांच्या इज्जतीची लक्तरं वेशीवर टांगू लागली आहेत. पोलीस अधीक्षकांपासून सगळीच पोलीस यंत्रणा आत्मस्तूतीतच मग्न असल्याचं चित्र पाहायला मिळत आहे. सध्या कायदा सुव्यवस्थेची कशी घडी बसवली आहे याची टीमकी नववर्षाच स्वागत करत असताना एस पी कडून वाजवली जात होती. मात्र चार-पाच दिवसातच ही टिमकी फुटली गेली. अवैध धंद्याची भरमार सुरू असताना कायदा सुव्यवस्था कशी चांगली राहत असते हे न उलगडलेल कोडं कायम आहे.यामध्ये सर्वसामान्य जनतेचं जगणं दहशतीच्या सावटाखाली येऊन कायदा सुव्यवस्थेचे धिंडवडे निघत आहेत. याच स्थितीचा अनुभव बीडकरांना पुन्हा अनुभवायला मिळाला. भर दुपारी अडीच ते तीन च्या सुमारास प्लंबिंग चे काम करणाऱ्या हर्षद तुळशीराम शिंदे वय 35 वर्ष, (रा. हाउसिंग कॉलनी धानोरा रोड बीड) नावाच्या तरुणावर गोळीबार झाला. यावरच हे प्रकरण थांबलं नाही तर जखमी झालेल्या हर्षद शिंदे जीव वाचवण्यासाठी पळत असताना त्याचा पाठलाग करून धारदार शास्त्राने वार करत त्याची हत्या केल्याची घटना अंकुश नगर भागात घडली. हर्षद शिंदे हा
नगरपालिकेत कॉन्ट्रॅक्ट बेसवर असलेला कर्मचारी अंकुशनगर भागात साई पंढरी लॉन्ससमोरील पाईप लाईन फुटली म्हणून त्या ठिकाणी दुरूस्तीचे काम करत होता. त्यावेळी ही घटना घडली.या घटनेनंतर आरोपी विशाल संजय सूर्यवंशी वय 30 वर्ष, (रा. अंकुश नगर धानोरा रोड बीड) हा पळून गेल्याची माहिती आहे. घटनेची माहिती मिळताच शिवाजीनगर पोलीस ठाण्याचे पथक तात्काळ घटनास्थळी दाखल झाले. परिसरात पंचनामा करण्यात आला असून मृतदेह पुढील तपासासाठी रुग्णालयात पाठवण्यात आला आहे. पोलिसांनी गुन्हा दाखल करण्याची प्रक्रिया सुरू केली असून आरोपीच्या शोधासाठी विशेष पथके रवाना करण्यात आली आहेत. दिवसाढवळ्या झालेल्या गोळीबाराच्या घटनेमुळे बीड मधील कायदा -सुव्यवस्थेचा प्रश्न पुन्हा एकदा ऐरणीवर आला आहे.