बीड — केज तालुक्यातील टाकळी येथे हॉटेल चालक विलास घुले यांच्या हत्या प्रकरणाने जिल्ह्यातील राजकीय आणि सामाजिक वातावरण तापले आहे. शनिवारी (दि. 20 जून) हॉटेलमधील वाद मिटवण्यासाठी गेलेल्या विलास घुले यांच्यावर टोळक्याने चाकूने हल्ला केला होता. या हल्ल्यात त्यांचा मृत्यू झाला होता.
या घटनेनंतर घुले कुटुंबीय आणि ग्रामस्थांनी आक्रमक भूमिका घेत आरोपींना मदत केल्याचा आरोप असलेल्या खासदार बजरंग सोनवणे यांचे पुत्र सौरभ सोनवणे यांच्यावर गुन्हा दाखल करण्याची मागणी केली होती. मृतदेह ताब्यात न घेता केज पोलीस ठाण्यासमोर आंदोलन करण्यात आले. गेल्या तीन दिवसांत अनेक वेळा रास्ता रोको आंदोलन करून आरोपींवर कठोर कारवाईची मागणी करण्यात आली.
या प्रकरणाचे गांभीर्य लक्षात घेऊन बीडचे पोलीस अधीक्षक नवनीत काँवत यांनी केजमध्ये दाखल होत परिस्थिती हाताळली. पुराव्यांच्या आधारेच पुढील कारवाई केली जाईल, अशी भूमिका पोलिसांनी घेतली होती.
दरम्यान, विधिमंडळ अधिवेशनात मंत्री पंकजा मुंडे आणि आमदार धनंजय मुंडे यांनी हा मुद्दा उपस्थित करत आरोपींवर तसेच मदत करणाऱ्यांवर कारवाईची मागणी केली. मुख्यमंत्री देवेंद्र फडणवीस यांनीही आंदोलकांशी फोनवरून संवाद साधत दोषींवर कठोर कारवाईचे आश्वासन दिले.
यानंतर पोलिसांनी तपासाला वेग देत हत्या प्रकरणातील सर्व आरोपींना अटक केली. बीड पोलिसांच्या विशेष पथकांनी विविध ठिकाणांहून आरोपींना ताब्यात घेतले असून त्यांना न्यायालयात हजर केले जाणार आहे.
आंदोलकांच्या मागणीनंतर अखेर सौरभ सोनवणे यांचे नाव पुरवणी जबाबात नोंदवण्यात आले आहे. या प्रकरणात पुराव्यांच्या आधारे तपास करून पुढील कारवाई केली जाईल, असे पोलीस अधीक्षक नवनीत काँवत यांनी स्पष्ट केले.
दरम्यान, या हत्या प्रकरणावरून राजकीय आरोप-प्रत्यारोप सुरू झाले आहेत. घटनेला जातीय रंग दिला जात असल्याचे आरोप-प्रत्यारोप होत आहेत. आंदोलकांनी बीडचे आमदार संदीप क्षीरसागर आणि खासदार बजरंग सोनवणे यांचीही चौकशी करण्याची मागणी केली आहे.
खासदार बजरंग सोनवणे यांनीही “माझ्या मुलाविरोधात पुरावे आढळल्यास कारवाई करा, सरकार आणि पोलीस तुमचे आहेत” अशी भूमिका मांडत या प्रकरणात राजकारण आणले जात असल्याचा आरोप केला होता.
आता सौरभ सोनवणे यांचे नाव पुरवणी जबाबात आल्याने या प्रकरणातील पुढील तपासाकडे सर्वांचे लक्ष लागले आहे.
