बीडच्या कलाक्षेत्राला पाठबळ ताल साधना म्युझिक सर्कल’चे उदघाटन, कलावंतांचा विशेष पुरस्काराने सन्मान
बीड — मंत्री पंकजाताई मुंडे यांचा वाढदिवस अनोख्या पद्धतीने साजरा करण्याचा विचार होता. त्यांचा वाढदिवस तरुणाईला दिशा देणारा ठरेल. ज्यांना परिस्थितीमुळे कला शिकता आली नाही, त्यांना मोफत शिक्षण मिळावे, यासाठी ताल साधना म्युझिक सर्कलच्या माध्यमातून व्यासपीठ उपलब्ध झाले. अलीकडे डीजेवरच गर्दी होताना दिसते, मात्र, सांस्कृतिक कार्यक्रमालाही बीडमध्ये होणारी गर्दी कला क्षेत्रासाठी मोठी बाब आहे. पंकजाताईंच्या वाढदिवसानिमित्त बीडच्या
कला क्षेत्राला पाठबळ मिळत आहे, असे प्रतिपादन भाजपचे युवा नेते डॉ.योगेश क्षीरसागर यांनी केले.
पर्यावरण व पशुसंवर्धन मंत्री ना.पंकजाताई मुंडे यांच्या वाढदिवसानिमित्त बीड येथील सौ. के. एस. के. महाविद्यालयाच्या प्रांगणात रविवारी (दि.२६) ‘नादवेध’ संगीत महोत्सव, ताल साधना म्युझिक सर्कलचे उदघाटन आणि कलावंतांना पुरस्कार वितरण सोहळा पार पडला. यावेळी प्रमुख अतिथी म्हणून डॉ.क्षीरसागर हे बोलत होते.
कार्यक्रमाच्या अध्यक्षस्थानी बालनाट्य परिषदेच्या अध्यक्षा, प्राचार्य दिपाताई क्षीरसागर ह्या होत्या. प्रमुख अतिथी म्हणून डॉ.क्षीरसागर यांच्यासह ह.भ.प.अमृत महाराज जोशी, प.पु.विशाल महाराज रामदासी, पंडित अरविंदकुमार आझाद गुरुजी, संपादक संतोष मानुरकर, कृष्णा साळुंके आदींची उपस्थिती होती. यावेळी भाजपचे शहराध्यक्ष अशोक लोढा, मंडळ प्रमुख मनोज पाटील, भरतअण्णा लोळगे, सतीश सुलाखे, एकनाथ महाराज पुजारी, सुदर्शन धुतेकर, के. सी. चव्हाण, डॉ. वासुदेव निलंगेकर, वासुदेव काळजे, प्रियंका देशमाने, सुरंजन जायभाये, नरहरी दळे, अभिषेक काकडे, कृष्णा शिंदे, नगरसेवक नितीन साखरे, आदित्य माने, शुभम धूत, गणेश लांडे, डॉ.लक्ष्मण जाधव, सुंदर चव्हाण, अजय सवई, शांतिनाथ डोरले, सुभाष क्षीरसागर, अनिल चांदणे, सुलभा पाटील, अरुण बोंगाणे, प्रा.शिवानंद क्षीरसागर, विठ्ठल गुजर, डॉ.रमेश शिंदे, शुभम कातांगळे, राजू माहुवाले, विश्वास आखाडे, शरद बडगे, संग्राम बांगर, सुशील जाधव, अमोल वडतिले आदींची उपस्थिती होती. कार्यक्रमाचे आयोजन डॉ.योगेश क्षीरसागर, नगरसेविका डॉ.सारिकाताई क्षीरसागर यांच्यासह सौ. के.एस.के. विद्यालयाच्या पुढाकारातून करण्यात आले होते. प्रास्ताविक तबला वादक प्रकाश मानुरकर यांनी केले. सूत्रसंचलन दिपक बिल्पे यांनी केले. आभार प्रा.संजय पाटील देवळाणकर यांनी मानले. यावेळी भाजपचे पदाधिकारी, नगरसेवक, कार्यकर्ते, संगीतप्रेमी, विविध क्षेत्रातील मान्यवरांसह नागरिक मोठ्या संख्येने उपस्थित होते.
या कलावंतांचा सन्मान; उत्कृष्ट सादरीकरण
मान्यवरांच्या हस्ते विविध क्षेत्रात उल्लेखनीय कार्य करणारे उध्दवशास्त्री घाडगे, डॉ.शुभम कुलकर्णी, प्रा.चिन्मय पुजारी, प्रा.कृष्णा रामदासी, अनुराधाताई चिंचोलकर यांचा सन्मान करण्यात आला. संगीत महोत्सवात पंडित अरविंदकुमार आझाद गुरुजी यांनी सादर केलेल्या तबला सोलोने रसिकांची दाद मिळवली, तर कृष्णा साळुंके यांच्या पखवाज सोलोने कार्यक्रमाची रंगत अधिक खुलवली. तसेच, नृत्य क्षेत्रातील गार्गी कुलकर्णी यांचे विशेष कौतुक करण्यात आले.
क्षीरसागर कुटुंबियांनी कला क्षेत्राचा वारसा जोपासला-अमृत महाराज जोशी
ह.भ.प. अमृत महाराज जोशी म्हणाले, डॉ.योगेश क्षीरसागर हे स्वतः गायक, तबला वादक आहेत. त्यांच्या आजी स्व.केशरकाकू क्षीरसागर ह्या नाटकात सक्रिय असायच्या, तर दुसऱ्या आजी स्व.सुहासिनी ईर्लेकर ह्या कलावंत होत्या. आजींसोबतच आई डॉ.दिपाताई यांच्याकडून कला, साहित्याचा वारसा डॉ.योगेश यांना मिळाला. क्षीरसागर कुटुंबियांनी कला क्षेत्राचा वारसा जोपला, असे आवर्जून नमूद केले. पंकजाताई मुंडे यांच्या वाढदिवसानिमित्ताने हा अनोखा उपक्रम राबविला जातोय. त्यांना दीर्घायुष्य लाभावे, अशा शब्दात शुभेच्छा दिल्या.
विशाल महाराज रामदासी, डॉ.दिपाताई क्षीरसागरांकडून उपक्रमास शुभेच्छा
प्रमुख अतिथी विशाल महाराज रामदासी म्हणाले, बीडच्या कला-संगीत क्षेत्राला चालना मिळत आहे. नव्या उपक्रमातून कलावंत घडतील. तर उदघाटक डॉ.दिपाताई क्षीरसागर यांनी पंकजाताई मुंडे यांचे वाढदिवसानिमित्त अभिष्टचिंतन केले. संगीत क्षेत्राचे शिक्षण घेण्याची संधी उपलब्ध झाली, ही माझी स्वप्नपूर्ती आहे, असेही त्या म्हणाल्या.
ताल साधना म्युझिक सर्कल’मध्ये १ ऑगस्टपासून मोफत प्रवेश सुरू
के.एस.के. महाविद्यालयांतर्गत सुरू होत असलेल्या ‘ताल साधना म्युझिक सर्कल, बीड’ येथे संगीत व नृत्य प्रशिक्षणासाठी प्रवेश प्रक्रिया सुरू झाली आहे. मार्गदर्शक म्हणून नामदेव साळुंके (शास्त्रीय गायन), पल्लवी कीर्तीकर (कथ्थक नृत्य), प्रकाश मानुरकर (तबला वादन) आणि अभिषेक लोळगे (पखवाज वादन) हे कार्यरत राहणार आहेत. १ ऑगस्टपासून वर्गांना प्रारंभ होणार असून, प्रवेश मर्यादित असल्याने इच्छुक विद्यार्थी व पालकांनी त्वरित प्रवेश निश्चित करावा, असे आवाहन करण्यात आले आहे.
