बीड — गेवराई तालुक्यात एक अत्यंत धक्कादायक आणि अंगावर काटा आणणारी घटना उघडकीस आली आहे. पत्नीनेच आपल्या पतीचा बहिण व मेव्हण्याच्या मदतीने खून करून मृतदेहाची विल्हेवाट लावत पुरावे नष्ट केल्याची घटना उघडकीस आल्याने खळबळ माजली आहे. या घटनेचा उलगडा गेवराई पोलिसांनी तब्बल आठ महिन्यानंतर केला आहे.
काय आहे नेमकं प्रकरण?
पोलीस ठाणे गेवराई हद्दीतील पांढरवाडी फाटा परिसरात ही घटना घडली. मृत उध्दव तुकाराम शिंदे (वय 50) हे पत्नी संगीता शिंदे यांच्यासह पुण्यावरून नातेवाईकांना भेटण्यासाठी आले होते.मात्र, पती-पत्नीमध्ये नेहमीप्रमाणे वाद सुरू झाला आणि 6 सप्टेंबर 2025 रोजी हा वाद विकोपाला गेला. यावेळी संतापाच्या भरात पत्नी संगीता शिंदे हिने तिची बहिण सविता वाजे आणि मेहुणे विष्णु वाजे यांच्या मदतीने उध्दव शिंदे यांचा गळा आवळून खून केला.
पुरावा नष्ट करण्याचा प्रयत्न
खून केल्यानंतर आरोपी विष्णु शिंदे याने आपल्या दोन अल्पवयीन मुलांच्या मदतीने मृतदेह उसाच्या शेतात टाकला. काही दिवसांनी दुर्गंधी येऊ लागल्याने मृतदेहाची विल्हेवाट लावण्याच्या उद्देशाने प्रेत गोणीत भरून शहागड येथील जुन्या पुलावरून गोदावरी नदीत फेकून दिले.इतकेच नव्हे मृतदेह फेकून दिल्यानंतर दोन-तीन दिवसानंतर मृताची मोटारसायकल देखील विष्णू वाजे व त्याचा अल्पवयीन मुलगा यांनी एका नातेवाईकांच्या मदतीने जुन्या पुलावरून नदीत टाकून पुरावे नष्ट करण्याचा प्रयत्न केला.
‘मिसिंग’ तक्रारीतून उलगडा
या प्रकरणात सर्वात धक्कादायक बाब म्हणजे, मुख्य आरोपी असलेल्या पत्नीनेच पुण्यातील सिंहगड पोलीस ठाणे आयुक्तालय या ठिकाणी पती हरवल्याची तक्रार दाखल केली होती.
मात्र, 2 मे 2026 रोजी मृताचा मुलगा शुभम शिंदे व सिंहगड पोलीस ठाण्यातील अंमलदार गेवराई पोलीस ठाण्यात आले. यावेळी शुभम शिंदे याने माझ्या वडिलांचे काही बरे वाईट झाले असावे अशी शंका गेवराई पोलिसांसमोर व्यक्त केली.
पोलिसांचा वेगवान तपास
पोलीस निरीक्षक किशोर पवार यांच्या मार्गदर्शनाखाली गेवराई पोलिसांनी संशयितांना ताब्यात घेऊन चौकशी केली. सुरुवातीला आरोपींनी टाळाटाळ केली, पण पोलिसी चौकशीत अखेर त्यांनी गुन्ह्याची कबुली दिली.
या प्रकरणात एकूण 3 आरोपींना अटक करण्यात आली असून, मुख्य आरोपी संगीता शिंदे हिलाही पुण्यातून नरे पोलीसांच्या मदतीने ताब्यात घेण्यात आले आहे.
गुन्हा दाखल
या प्रकरणी मयताचा मुलगा शुभम उद्धव शिंदे यांच्या तक्रारीवरून गेवराई पोलीस ठाण्यात गुन्हा क्रमांक 268/2026 अंतर्गत भा.न्या.सं. कलम 103(1), 238, 66(2) नुसार गुन्हा दाखल करण्यात आला आहे. या प्रकरणाचा पुढील तपास सपोनी दीपक लंके करत असून मयताची गोदावरी नदीत फेकलेली मोटार सायकल व सांगाडा मिळून आला आहे.
दरम्यान ही कारवाई पोलीस अधीक्षक नवनीत काँवत, अप्पर पोलीस अधीक्षक, सचिन पांडकर, विभागीय पोलीस अधिकारी अनिल कटके, यांच्या मार्गदर्शनाखाली पोनि किशोर पवार, सपोनि.दिपक लंके, सपोनि. संतोष जंजाळ, सपोनि. अण्णासाहेब पवार, पोउपनि. प्रदीप आढाव, पोउपनि. उदगीरकर, श्रेणी. पोउपनि. सुरेश पारधी, श्रेणी. पोउपनि. इसाक शेख, राजु भिसे,कल्याण राठोड, राऊत, चंद्रसेन माळी, सुंदर राठोड, गोरक्ष डोके, धिरज खांडेकर, जितेंद्र ओव्हाळ, दिनेश ढाकणे, महादेव कदम, रेखा तुपे, रेशमा पौळे यांनी केली.
