बीड — पाटोदा तालुक्यातील नाळवंडी येथे नऊ वर्षांच्या चिमुकलीला पैशांचे व खाऊचे आमिष दाखवून शेतात नेऊन तिच्यावर अत्याचार केल्याची संतापजनक घटना समोर आली आहे. या प्रकरणी अमळनेर पोलिसांनी ६५ वर्षीय संशयित आरोपीला अटक केली असून, घटनेनंतर नाळवंडी गावात संतापाचे वातावरण निर्माण झाले आहे. निषेध म्हणून गावकऱ्यांनी बंद पुकारला आहे.
पोलिसांनी दिलेल्या माहितीनुसार, काल सायंकाळी साडेसहा ते सातच्या सुमारास चिमुकली घराजवळील हातपंपावर पाणी भरण्यासाठी गेली होती. त्यावेळी आरोपीने तिला पैशांची नोट देत आणखी पैसे तसेच चॉकलेट व खाऊ देण्याचे आमिष दाखवले. त्यानंतर तिला जवळील बाजरीच्या शेतात नेल्याचा आरोप आहे.
शेतात नेल्यानंतर आरोपीने तिच्यावर अत्याचार केल्याचे तक्रारीत नमूद करण्यात आले आहे. चिमुकलीने आरडाओरड केल्यानंतर जवळच्या घरातील नातेवाईक आणि नागरिक घटनास्थळी धावून गेले. त्यांनी चिमुकलीची आरोपीच्या तावडीतून सुटका केली.
घटनेची माहिती मिळताच अमळनेर पोलिसांनी कारवाई करत आरोपीला ताब्यात घेतले. पीडितेच्या कुटुंबीयांच्या तक्रारीवरून आरोपीविरुद्ध बलात्कार आणि बाल लैंगिक अत्याचार संरक्षण कायद्यानुसार (POCSO) गुन्हा दाखल करण्यात आला आहे.
या घटनेनंतर नाळवंडी परिसरात तीव्र संताप व्यक्त होत असून, आरोपीवर कठोर कारवाई करण्याची मागणी ग्रामस्थांकडून केली जात आहे. निषेध म्हणून गावकऱ्यांनी बंद पुकारला आहे.
