बीड — अंतरवाली सराटी येथे मनोज जरांगे पाटील यांच्या नेतृत्वाखाली सुरू असलेल्या आंदोलनाच्या समर्थनार्थ बीड जिल्ह्यात मराठा बांधव आक्रमक झाल्याचे पाहायला मिळाले. सरकार आंदोलनाकडे दुर्लक्ष करत असल्याचा आरोप करत पाडळशिंगी येथे आंदोलकांनी टायर जाळून निषेध नोंदवला.
सोलापूर-धुळे राष्ट्रीय महामार्गावरील पाडळशिंगी टोलनाक्याजवळ आंदोलक एकत्र आले. यावेळी रस्त्यावर टायर पेटवून सरकारविरोधात घोषणाबाजी करण्यात आली. टायर जाळल्यामुळे धुळे सोलापूर राष्ट्रीय महामार्गावरील वाहतूक काही काळ विस्कळीत होऊन ठप्प झाली.
मनोज जरांगे पाटील यांच्या आंदोलनाला पाठिंबा दर्शवण्यासाठी हे आंदोलन करण्यात आल्याचे आंदोलकांकडून सांगण्यात आले. सरकारने आंदोलनाची दखल घेऊन मराठा समाजाच्या मागण्यांवर तातडीने निर्णय घ्यावा, अशी मागणी यावेळी करण्यात आली.
घटनेची माहिती मिळताच संबंधित यंत्रणांनी घटनास्थळी धाव घेत परिस्थिती नियंत्रणात आणण्यासाठी प्रयत्न केले. आंदोलनामुळे पाडळशिंगी परिसरात काही काळ तणावाचे वातावरण निर्माण झाले होते. त्यानंतर वाहतूक सुरळीत करण्यासाठी प्रयत्न सुरू करण्यात आले.
