मुंबई — स्वातंत्र्यदिनाच्या पूर्वसंध्येला केंद्रीय गृह मंत्रालयाकडून महाराष्ट्रातील पोलीस, कारागृह, अग्निशमन, गृहरक्षक आणि नागरी संरक्षण दलातील उल्लेखनीय कामगिरी करणाऱ्या अधिकारी व कर्मचाऱ्यांना राष्ट्रपती पदक जाहीर करण्यात आले आहे. राष्ट्रपतींच्या मंजुरीनंतर केंद्रीय गृह मंत्रालयाने १४ ऑगस्ट रोजी पदक विजेत्यांची अधिकृत घोषणा केली.
पोलीस आणि नागरी संरक्षण क्षेत्रात उल्लेखनीय सेवा बजावणाऱ्या अधिकारी-कर्मचाऱ्यांना दिल्या जाणाऱ्या राष्ट्रपती उत्कृष्ट सेवा पदकासाठी महाराष्ट्रातील पाच जणांची निवड झाली आहे.
उत्कृष्ट सेवा पदकासाठी पाच जणांची निवड
पोलीस सेवा श्रेणीतील राष्ट्रपती उत्कृष्ट सेवा पदकासाठी अपर पोलीस महासंचालक शिरीष रवींद्र जैन, उपपोलीस अधीक्षक सुभाष नानासाहेब भुजबळ आणि सहाय्यक पोलीस उपनिरीक्षक संजय राजाराम वायचळे यांची निवड करण्यात आली आहे.
तर कारागृह सेवा श्रेणीत सुभेदार संजीव सखाराम घाणेकर आणि हवालदार संजय राजारामजी तळवारे यांना गुणवत्तापूर्ण सेवेबद्दल सन्मानित केले जाणार आहे.
पोलीस सेवेत ३७ अधिकारी-कर्मचाऱ्यांचा गौरव
महाराष्ट्रातील पोलीस सेवा श्रेणीत एकूण ३७ अधिकारी आणि कर्मचाऱ्यांना राष्ट्रपती पदकाने गौरविण्यात येणार आहे. यामध्ये उपपोलीस महानिरीक्षक संजय बाजीराव जाधव, उपपोलीस महानिरीक्षक विजयकुमार गोपीनाथ मगर, पोलीस अधीक्षक दिगंबर पांडुरंग प्रधान, उपपोलीस अधीक्षक प्रशांत कुलकर्णी, भागीरथ देशमुख, प्रवीण तेजले, मनोजकुमार यादव यांचा समावेश आहे.
तसेच पोलीस निरीक्षक वैभवकुमार जाधव, संतोष बारगे, विश्वजीत कागिंडे, जितेंद्र कदम, विनोद पाटील आणि प्रदीप चौगावकर यांच्यासह सहाय्यक पोलीस उपनिरीक्षक, पोलीस उपनिरीक्षक आणि हेड कॉन्स्टेबल पदावरील अधिकारी-कर्मचाऱ्यांचाही सन्मान करण्यात येणार आहे.
अग्निशमन सेवेतही उल्लेखनीय कामगिरीचा गौरव
अग्निशमन सेवा क्षेत्रात उल्लेखनीय योगदान दिल्याबद्दल मुख्य अग्निशमन अधिकारी शंकर उत्तम मिसाळ आणि अग्निशामक शैलेश महादेव जगताप यांची राष्ट्रपती पदकासाठी निवड झाली आहे.
गृहरक्षक व नागरी संरक्षण दलातील कर्मचाऱ्यांचा सन्मान
गृहरक्षक आणि नागरी संरक्षण क्षेत्रातील उल्लेखनीय सेवेसाठी पोपट रामजी सांगडे, अशोक नामदेव इंगळे आणि मनोज सदाशिव बारसागडे यांना सन्मानित करण्यात येणार आहे.
कारागृह सेवेत दोघांना गौरव
कारागृह सेवेत उल्लेखनीय कामगिरी केल्याबद्दल अधीक्षक विकास हनुमंत राजनाळवार आणि हवालदार महेश लक्ष्मण गडनाईक यांचीही राष्ट्रपती पदकासाठी निवड करण्यात आली आहे.
स्वातंत्र्यदिनाच्या पार्श्वभूमीवर जाहीर झालेल्या या पुरस्कारांमुळे महाराष्ट्रातील पोलीस, कारागृह, अग्निशमन तसेच गृहरक्षक आणि नागरी संरक्षण दलातील उल्लेखनीय सेवेचा राष्ट्रीय पातळीवर गौरव झाला आहे.
