पत्रकार परिषदेत कथित ऑडिओ क्लिप ऐकवली; ३२ कॉल रेकॉर्डिंग असल्याचा सोनवणेंचा दावा
बीड — मस्साजोगचे माजी सरपंच संतोष देशमुख आणि केज तालुक्यातील हॉटेलचालक विलास घुले यांच्या हत्या प्रकरणांवरून बीडचे राजकारण पुन्हा तापले आहे. संतोष देशमुख हत्या प्रकरणात वाल्मिक कराड तुरुंगात असताना, विलास घुले हत्या प्रकरणात आपला मुलगा सौरव सोनवणे याला अडकवण्यासाठी तुरुंगातूनच कट रचण्यात आल्याचा गंभीर आरोप बीडचे खासदार बजरंग सोनवणे यांनी केला आहे.
बजरंग सोनवणे यांनी गुरुवारी पत्रकार परिषद घेत या प्रकरणासंदर्भात काही गंभीर दावे केले. वाल्मिक कराडने तुरुंगातून फोन करून सुग्रीव कराडशी संपर्क साधला आणि आपल्या मुलाला विलास घुले हत्या प्रकरणात गोवण्यासाठी सूचना दिल्या, असा आरोप सोनवणे यांनी केला. या दाव्याच्या समर्थनार्थ त्यांनी पत्रकार परिषदेत कथित फोन संभाषणाची ऑडिओ क्लिपही ऐकवली.
सोनवणे यांच्या म्हणण्यानुसार, त्यांच्याकडे अशा एकूण ३२ फोन कॉलचे रेकॉर्डिंग आहेत. या सर्व रेकॉर्डिंगच्या आधारे या प्रकरणामागील कटाचा तपास करण्यात यावा, अशी मागणी त्यांनी केली.
आज खासदार म्हणून नाही, वडील म्हणून बोलतोय
‘आज आपण खासदार म्हणून नव्हे, तर एक वडील म्हणून पत्रकार परिषद घेत आहोत,’ असे म्हणत सोनवणे यांनी मुलाला या प्रकरणात गोवण्याचा प्रयत्न झाल्याचा आरोप केला. विलास घुले हत्या प्रकरणात सीआयडी आणि सीबीआयकडून तपास झाल्याचे सांगत, या तपासात आपल्या मुलाविरोधात ठोस तथ्य आढळले नसल्याचा दावाही त्यांनी केला.
मात्र, त्यानंतर मुलाचे नाव या प्रकरणाशी जोडण्यासाठी नेमका कट कसा रचण्यात आला, याचा खुलासा आपण करीत असल्याचे सोनवणे म्हणाले.
गुन्हा दाखल न झाल्यास मृतदेह पोलीस ठाण्यात ठेवा
सोनवणे यांनी ऐकवलेल्या कथित ऑडिओ क्लिपमध्ये एका व्यक्तीकडून दुसऱ्या व्यक्तीला विलास घुले प्रकरणात एका व्यक्तीविरुद्ध गुन्हा दाखल करण्यासाठी दबाव टाकला जात असल्याचे ऐकू येत असल्याचा दावा करण्यात आला.
‘कसल्याही परिस्थितीत त्याच्यावर गुन्हा दाखल झाला पाहिजे. गुन्हा दाखल होत नसेल तर मृतदेह पोलीस ठाण्यात ठेवा किंवा पाण्याच्या टाकीवर चढा,’ अशा आशयाचे संभाषण या क्लिपमध्ये असल्याचे सोनवणे यांनी सांगितले.
या संभाषणात संबंधित व्यक्तीला भावनिक आवाहन करत संबंधित व्यक्तीविरुद्ध गुन्हा दाखल करून घेण्याचा आग्रह केला जात असल्याचेही सोनवणे यांनी पत्रकारांना ऐकवले.
या ऑडिओ क्लिपमधील आवाज आणि संभाषणाची स्वतंत्र अधिकृत पुष्टी अद्याप समोर आलेली नाही. त्यामुळे क्लिपची सत्यता, आवाजातील व्यक्ती आणि संभाषणाचा संपूर्ण संदर्भ तपासातून स्पष्ट होणे महत्त्वाचे आहे.
तुरुंगातील आयफोनवरूनही सोनवणेंचा सवाल
वाल्मिक कराडने तुरुंगातील कर्मचाऱ्यांना आयफोन वाटल्याचाही आरोप सोनवणे यांनी केला. हे आयफोन नेमके कोणी दिले, ते तुरुंगात कसे पोहोचले आणि त्यांचा वापर कोणत्या पद्धतीने झाला, याची चौकशी करण्याची मागणी त्यांनी केली.
दरम्यान, विलास घुले हत्या प्रकरणात सौरव सोनवणे यांचे नाव पुरवणी जबाबात समोर आल्यानंतर एसआयटीने त्यांची चौकशी केली होती. जूनमध्ये त्यांची सुमारे चार तास चौकशी झाल्याचे वृत्त प्रसिद्ध झाले होते.
आता बजरंग सोनवणे यांनी पत्रकार परिषदेत केलेले नवे आरोप आणि सादर केलेल्या कथित ऑडिओ क्लिपमुळे विलास घुले हत्या प्रकरणाला पुन्हा नवे वळण मिळाले आहे.
