नवी दिल्ली — देशातील वैद्यकीय प्रवेशाची सर्वात महत्त्वाची परीक्षा NEET-UG 2026 रद्द करण्यात आली आहे. नॅशनल टेस्टिंग एजन्सी (NTA) ने मंगळवारी (१२ मे २०२६) ही अधिकृत घोषणा केली. ३ मे २०२६ रोजी झालेल्या परीक्षेत ‘गेस पेपर’ लीक आणि अनियमिततेच्या गंभीर तक्रारींनंतर हा निर्णय घेण्यात आला आहे.
केंद्र सरकारच्या मंजुरीने आणि सीबीआय तपासाच्या पार्श्वभूमीवर NTA ने परीक्षा पूर्णपणे अवैध ठरवली आहे. नवीन फेरपरीक्षा लवकरच घेण्यात येणार असून, त्याची तारीख अधिकृत वेबसाइटवर जाहीर केली जाईल.
नीट युजी (NEET UG 2026 )रद्द का झाली?
राजस्थान पोलिसांच्या SOG तपासात ‘गेस पेपर’ (४१० प्रश्नांचा) आढळला, ज्यातील अनेक प्रश्न प्रत्यक्ष परीक्षेत आले.देशभरातून गैरप्रकार आणि पेपरफुटीच्या तक्रारी आल्या.परीक्षेची पारदर्शकता आणि विद्यार्थ्यांचा विश्वास टिकवण्यासाठी हा निर्णय घेण्यात आला.
NTA ची प्रमुख अपडेट्स:
🎈३ मे ची परीक्षा रद्द; निकाल जाहीर केले जाणार नाहीत.
🎈पूर्वीची नोंदणी, उमेदवारी आणि परीक्षा केंद्रे वैध राहतील.
🎈कोणतीही नवीन नोंदणी किंवा अतिरिक्त शुल्क लागणार नाही.
🎈पूर्वी भरलेले शुल्क परत केले जाईल.
🎈CBI कडून पूर्ण तपास सुरू.
विद्यार्थ्यांसाठी महत्वाची माहिती —
लाखो विद्यार्थ्यांना (सुमारे २२.७९ लाख) पुन्हा तयारी करावी लागणार आहे. मात्र, NTA ने स्पष्ट केले की विद्यार्थ्यांचे भविष्य आणि परीक्षेची निष्पक्षता प्राधान्य आहे. नवीन परीक्षेचे वेळापत्रक आणि नियम लवकरच जाहीर होतील. विद्यार्थ्यांनी अफवांवर विश्वास न ठेवता फक्त neet.nta.nic.in वरून माहिती घ्यावी.
विद्यार्थ्यांची प्रतिक्रिया
काही विद्यार्थ्यांनी निर्णयाचे स्वागत केले आहे कारण गैरप्रकार रोखणे आवश्यक होते. मात्र, महिन्यांच्या तयारीनंतर पुन्हा परीक्षा द्यावी लागणार असल्याने अनेक जण चिंतित आहेत. वैद्यकीय प्रवेश प्रक्रिया यामुळे काही काळ लांबणार आहे.
