छ.संभाजीनगर — मराठवाड्यात महाराष्ट्र दहशतवाद विरोधी पथकाने (ATS) शुक्रवारी मोठी आणि संवेदनशील कारवाई करत छत्रपती संभाजीनगर, जालना आणि बीड जिल्ह्यात एकाच वेळी 150 ठिकाणी धाडसत्र राबवले. पाकिस्तानी गँगस्टर शहजाद भट्टी याच्याशी कथित सोशल मीडिया संपर्काच्या तपासातून ही कारवाई करण्यात आली असून, विविध ठिकाणांहून एकूण 13 संशयितांना ताब्यात घेण्यात आल्याची माहिती एटीएस सूत्रांनी दिली आहे.
एटीएसच्या सूत्रांनुसार, छत्रपती संभाजीनगरमधून सर्वाधिक 10 जणांना ताब्यात घेण्यात आले आहे. यामध्ये वैजापूर येथील 2, मिसारवाडीतील 3, हर्सूलमधील 1, आरिफ कॉलनीतील 1, बायजीपुरा येथील 1 आणि शहरातील इतर भागांतील 2 संशयितांचा समावेश आहे. याशिवाय जालना जिल्ह्यातून 2 तर बीड जिल्ह्यातील माजलगाव तालुक्यातील पात्रूड येथून 1 संशयिताला ताब्यात घेण्यात आले आहे.
प्राथमिक तपासात समोर आलेल्या माहितीनुसार, पाकिस्तानस्थित गँगस्टर शहजाद भट्टीशी संबंधित सोशल मीडिया किंवा डिजिटल युझर आयडीच्या माध्यमातून महाराष्ट्रातील काही तरुण संपर्कात असल्याचा संशय एटीएसला आहे. या प्रकरणात एकूण 14 जण एटीएसच्या रडारवर असून, त्यांच्यापर्यंत पोहोचण्यासाठी राज्यभरात समांतर तपास सुरू आहे.
ताब्यात घेण्यात आलेल्या संशयितांची अज्ञात स्थळी कसून चौकशी सुरू असून, त्यांच्या मोबाईल फोन, सोशल मीडिया अकाउंट्स आणि डिजिटल व्यवहारांची तपासणी केली जात आहे. या चौकशीतून आणखी काही महत्त्वाचे धागेदोरे मिळण्याची शक्यता तपास यंत्रणांनी व्यक्त केली आहे.
दरम्यान, बीड, जालना आणि छत्रपती संभाजीनगर जिल्ह्यांमध्ये सुरक्षा यंत्रणा अधिक सतर्क करण्यात आल्या आहेत. संशयितांचे नेटवर्क किती व्यापक आहे, त्यांच्या संपर्कामागील उद्देश काय होता आणि हा केवळ सोशल मीडियावरील संवाद होता की त्यामागे आणखी गंभीर कट रचला जात होता, याचा सर्वंकष तपास एटीएसकडून सुरू आहे.
अधिकृत तपास पूर्ण होईपर्यंत कोणत्याही निष्कर्षावर पोहोचणे योग्य नसल्याचे तपास यंत्रणांकडून स्पष्ट करण्यात आले आहे.
गँगस्टर शहजाद भट्टीशी कथित संबंध:छत्रपती संभाजी नगर,बीडसह जालन्यात एटीएस ची छापेमारी
