बीड — अवैध गुटख्याची वाहतूक करणाऱ्या वाहनावर स्थानिक गुन्हे शाखेच्या पथकाने कारवाई करत गुटखा आणि इनोव्हा कार असा एकूण 8 लाख 55 हजार 950 रुपयांचा मुद्देमाल जप्त केला. ही कारवाई 21 ऑगस्ट रोजी मौजे खांडेपारगाव शिवारातील उमरी ते खांडेपारगाव जाणाऱ्या कच्च्या रस्त्यावर करण्यात आली.
स्थानिक गुन्हे शाखेचे पथक अवैध धंद्यांविरोधात कारवाईसाठी गस्तीवर असताना पोलिसांना गोपनीय बातमीदारामार्फत माहिती मिळाली की, पिंपळनेर-बीड मार्गावरून पांढऱ्या रंगाची इनोव्हा कार गुटखा घेऊन बीडकडे येत आहे. माहितीच्या आधारे पोलिसांनी सापळा रचला.
दरम्यान, खांडेपारगाव शिवारातील कच्च्या रस्त्यावर संशयित इनोव्हा कार (MH 12 GZ 1952) आढळून आली. पोलिसांनी वाहनावर छापा टाकला असता कारच्या पुढील सीटवर दोन व्यक्ती आढळून आल्या. त्यापैकी एकाने पोलिसांची चाहूल लागताच वाहन थांबवून शेताच्या दिशेने पळ काढला, तर दुसरा व्यक्ती पोलिसांच्या ताब्यात मिळून आला.
वाहनाची झडती घेतली असता मागील सीटवर विविध कंपन्यांचा गुटखा आढळून आला. गुटखा आणि वाहन असा एकूण 8,55,950 रुपयांचा मुद्देमाल पोलिसांनी जप्त केला.
या प्रकरणी सचिन भिमराव माटे (वय 34, रा. भीमनगर, गेवराई) आणि रशीद सय्यद (रा. उमापूर, ता. गेवराई) यांच्याविरुद्ध पिंपळनेर पोलीस ठाण्यात गुन्हा क्रमांक 259/2026 दाखल करण्यात आला आहे. भारतीय न्याय संहितेतील कलम 123, 273, 274, 223 व 3(5) अन्वये गुन्हा नोंदवण्यात आला असून, पुढील तपास पिंपळनेर पोलीस करीत आहेत.
ही कारवाई पोलीस अधीक्षक नवनीत, अपर पोलीस अधीक्षक समीर आणि पोलीस निरीक्षक शिवाजी यांच्या मार्गदर्शनाखाली पोलीस उपनिरीक्षक श्रीराम , पोलीस हवालदार अर्जुन, गोविंद, पोलीस अंमलदार अश्पाक , मनोज , बबन आणि चालक पोलीस हवालदार नितीन यांच्या पथकाने केली.
