बीड — संतोष देशमुख हत्या प्रकरणातील आरोपी कृष्णा आंधळे अद्याप फरार आहे. नेमका याचाच फायदा घेत एकाने खा. बजरंग सोनवणे यांना फसवले. त्यानंतर याच व्यक्तीने भाजप आमदार सुरेश धस यांनाही गंडवल्याची धक्कादायक माहिती समोर आली आहे.

आ.सुरेश धस यांनीच हा प्रकार अन्नत्याग करणाऱ्या मस्साजोगकरांसमोर माध्यमांना दिली होती. एकाने कृष्णा आंधळे हा माझ्यासोबत आहे, त्याला कारने घेऊन येण्यासाठी मला पाच हजार रुपये पाठवा, असा फोन धस यांना केला होता. कृष्णा आंधळे हा सरपंच संतोष देशमुख खून प्रकरणातील महत्वाचा धागा असल्याने धस यांनी कुठलीही शहानिशा न करता संबंधित व्यक्तीला पाच हजार रुपये पाठवले. तसेच नगरमधील एका हाॅटेलमध्ये या फोन करणाऱ्या व्यक्ती आणि आरोपी कृष्णा आंधळे यांची वाट पहात साडेचार तास थांबले होते.
शेवटी आपली फसवणूक झाल्याचे लक्षात आल्यानंतर सुरेश धस नगरमधून निघून गेले होते, असे धस यांनी सांगितले. विशेष म्हणजे याच व्यक्तीने खासदार बजरंग सोनवणे यांनाही फोन करून आरोपी कृष्णा आंधळे छत्रपती संभाजीनगरमध्ये आहे, त्याला घेऊन येण्यासाठी आॅनलाईन पैसे टाका असे सांगितले.खा. सोनवणे यांनीही संबंधित व्यक्तीला पैसे पाठवले होते. पण नंतर आपली फसवणूक झाल्याचे त्यांच्याही लक्षात आले होते. बापूराव बारगजे असे गंडवणाऱ्या व्यक्तीचे नाव असल्याचे धस यांनी सांगितले.या व्यक्तीची माहिती आपण आष्टी आणि बीडच्या पोलीस अधिक्षकांना दिली होती. दोन-पाच रुपयासाठी अशी फसवणूक करणाऱ्या औलादीही असतात, असा संताप धस यांनी व्यक्त केला आहे.

जामखेड — शहरापासून दोन किमी अंतरावरील साकत फाट्याजवळील एका घरावर एका महिलेसह सात ते आठ दरोडेखोरांनी चाकूचा धाक दाखवून घरातील 8 तोळे सोने व 71 हजार रुपयांचे रोख असे एकूण 3 लाख 22 हजार 750 रुपयांचा ऐवज लंपास केला. विशेष म्हणजे या दरोड्यात एका महिलेचा समावेश असून घटनास्थळी पोलिसअधीक्षक राकेश ओला यांनी भेट दिली आहे. दरोड्याच्या घटनेने जामखेड शहरात एकच खळबळ उडाली आहे.

पोलिसांकडून मिळालेली अशी की, जामखेड शहरापासून दोन किमी अंतरावरील बीड रोड येथील साकत फाट्याजवळ फिर्यादी महिला प्रतिक्षा शंकर रोकडे (वय 19) राहते. बुधवार दि 26 रोजी मध्यरात्री दोन वाजण्याच्या सुमारास या ठिकाणी एका महिला दरोडेखोरासह सात ते आठ दरोडेखोर आले. यावेळी सोबत असलेल्या आरोपी महिलेने फिर्यादी यांचे दार वाजवत आवाज दिला की ‘ताई दार उघड’ त्यामुळे फिर्यादी महिलेस आपलेच कोणी आले असल्याचे वाटल्याने त्यांनी दार उघडले.

घराचे दार उघडताच घरामध्ये स्कार्फ बांधलेल्या महिलेसह चोरटे आत शिरले. यानंतर चोरट्यांनी किचनमधील सामानाची उचकापाचक केली. तसेच चोरट्यांनी चाकुचा धाक दाखवून सोने व रोख रक्कम लुटली . यानंतर चोरट्यांनी आपला मोर्चा वरच्या मजल्यावर रहात असलेल्या गायत्री किसन जाडकर यांच्या घराकडे वळवला. यावेळी घराला कुलुप असल्याने चोरट्यांनी दार तोडुन घरातील रोख रक्कम व सोने चोरुन नेले. अशा प्रकारे दोन्ही घरातील एकुण 2 लाख 51 हजार रुपयांचे आठ तोळे सोन्याचे दागिने व 71 हजार 750 रु रोख असा एकुण 3 लाख 22 हजार 750 रुपयांचा ऐवज लंपास केला.

या घटनेत एक महिला किरकोळ जखमी झाली आहे. दरोडा पडला असल्याची माहिती फिर्यादी यांनी फोनवरून जामखेड पोलीसांना दिली यानंतर पोलीस तातडीने घटनास्थळी आले. मात्र तोपर्यंत दरोडेखोर पळुन गेले. घटनास्थळी सकाळी पोलीस अधीक्षक राकेश ओला, पोलीस उपअधीक्षक प्रशांत खैरे, स्थानिक गुन्हे अन्वेषण पथकाचे पोलीस निरीक्षक दिनेश आहेर, पोलीस उपनिरीक्षक राजेंद्र वाघ, जामखेड पोलीस स्टेशनचे सपोनि सोनवलकर, सपोनि वर्षा जाधव मॅडम व जामखेड व अहील्यानगर चे स्थानिक गुन्हे अन्वेषण विभागाच्या पथकाने भेट दिली.

या प्रकरणी एका महिलेस एकुण सात ते आठ दरोडेखोरांवर जामखेड पोलीस स्टेशनला दरोड्याचा गुन्हा दाखल करण्यात आला आहे. पुढील तपास पोलीस निरीक्षक महेश पाटील यांच्या मार्गदर्शनाखाली सपोनि वर्षा जाधव या करत आहेत.

पुणे — स्वारगेट बस स्थानकात शिवशाही बस मध्ये पहाटे साडेपाचच्या सुमारास एका 26 वर्षीय तरुणीवर बलात्कार झाल्याची धक्कादायक घटना समोर आल्याने संपूर्ण राज्यात संतापाची लाट पसरली आहे. आरोपीवर कठोर कारवाई करण्यात यावी अशी मागणी होत आहे.

या प्रकरणातील मेडिकल रिपोर्टमध्ये पीडित तरुणीचा अहवाल पॉझिटीव्ह आला आहे. तिच्यावर लैंगिक अत्याचार झाल्याचं मेडिकल रिपोर्टमधून स्पष्ट झाले आहे. माहितीनुसार, संध्याकाळी ससुन रुग्णालयाने हा वैद्यकीय अहवाल पोलिसांना दिला आहे. या अहवालात आरोपीने पिडितेवर एकदा नाही तर दोनवेळा लैंगिक अत्याचार केला असल्याची माहिती देण्यात आली आहे. सध्या आरोपी दत्तात्रय गाडे फरार असून पोलीस त्याचा शोध घेत आहे.तर दुसरीकडे या प्रकरणात परिवहन मंत्री प्रताप सरनाईक यांनी मोठी कारवाई करत स्वारगेट डेपोमधील 23 सुरक्षा रक्षकांचे तत्काळ निलंबन करून तसेच डेपो मॅनेजर आणि वाहतूक नियंत्रक यांची चौकशी करुन एका आठवड्यात चौकशी अहवाल सादर करण्याचे आदेश दिले आहे. 23 सुरक्षा रक्षकांचे तत्काळ निलंबन करून उद्यापासून त्यांच्या जागी स्वारगेट डेपोमध्ये नवीन सुरक्षारक्षक कामावर रुजू करण्याचे आदेश परिवहन मंत्री प्रताप सरनाईक यांनी दिले आहे.
असं आहे संपूर्ण प्रकरण!

पहाटे 5.30 च्या सुमारास पुण्यातील स्वारगेट बस स्थानकात एका 26 वर्षीय तरुणीवर बसमधे अत्याचाराची घटना घडली. पीडित तरुणी पुण्याहून फलटण्याच्या दिशेने जात होती. बससाठी ती स्वारगेट बस स्थानकावर थांबली असता आरोपी दत्तात्रय गाडे तिकडे आला आणि पीडित तरुणीला स्वारगेट आगारात मधोमध उभी असलेली बस फलटणला जाणार आहे असं सांगितलं. उभी असणारी बस सोलापुरला जाणार आहे आणि मधे बस फलटणला थांबणार आहे. असं त्याने पिडितेला सांगितले.यावेळी तो पीडित तरुणीला ताई- ताई म्हणत होता. त्याच्यावर विश्वास ठेवून तरुणी बस जवळ आली मात्र बस बंद असल्याने तू टॉर्च लावून आतमध्ये जा. हीच बस काही वेळात फलटणला निघेल असं आरोपीने तरुणीला सांगितलं. त्यानंतर तरुणी बसमध्ये चढली आणि तिच्या पाठीमागे बसमध्ये आरोपी दत्तात्रय गाडे देखील चढला आणि बस बंद केली. त्यानंतर तरुणीला जीवे मारण्याची धमकी देत तिच्यावर बलात्कार केला आणि तिकडून पळ काढला. तरुणी घाबरल्याने तिच्यासोबत घडलेला प्रकार कोणाला सांगितलं नाही. त्यानंतर फलटणला जाण्यासाठी तरुणी दुसऱ्या बसमध्ये बसली आणि तिने हा संपूर्ण प्रकार घरच्यांना सांगितला.

नेकनूर — सोलापूर मधील मोहोळ तालुक्यात दरोडे वाट मारी लूटमार करणारे दरोडेखोर बीड जिल्ह्यात असल्याची माहिती सोलापूरच्या गुन्हे शाखेला मिळाली होती. दरोडेखोरांच्या मागावर असलेल्या सोलापूर पोलिसांचे पथक केज मध्ये आले. दरम्यान दरोडेखोर नेकनूरच्या दिशेने जात असल्याचे लक्षात येताच नेकनूर पोलिसांशी संपर्क साधला. एपीआय चंद्रकांत गोसावी यांनी तात्काळ नेकनूर चौकात नाकाबंदी केली. पळून जात असलेल्या दोन दरोडेखोरांना थरारक पद्धतीने जेरबंद करण्यात यश मिळवले.

सोलापूर जिल्ह्यातील मोहोळ तालुक्यात दरोडे टाकणारे दरोडेखोर बीडच्या दिशेने एमएच २२ ए ३४ ४६ या गाडीने सोलापूर पोलिसांना हुलकावणी देत निघाले होते. दरोडेखोरांच्या पाठलागावर सोलापूर स्थानिक गुन्हे शाखेचे पोलीस होतेच. केज मधून हुलकावणी देऊन नेकनूर कडे दरोडेखोर निघालेले असताना सोलापूर पोलिसांनी नेकनूर पोलिसांचे संपर्क साधला. ठाणे प्रमुख चंद्रकांत गोसावी यांनी तात्काळ नेकनूरच्या नुराणी चौकात नाकाबंदी केली. दरोडेखोरांना पळून जाताना अडथळा निर्माण व्हावा अशा पद्धतीने तीनही रस्त्यांना वाहने आडवी लावली. दरोडेखोर भरधाव वेगात आल्यानंतर अडथळ्यातून मार्ग काढत असताना दबा धरून बसलेल्या पोलिसांनी त्यांच्या मुस्क्या आवळल्या. दरम्यान ही कारवाई पोलीस निरीक्षक चंद्रकांत गोसावी पोलीस नाईक सचिन वंजारे पोलीस अंमलदार बाळासाहेब ढाकणे सय्यद अब्दुल्ला सहाय्यक उपनिरीक्षक रेखा मॅडम पोका आशा चौरे होमगार्ड मुतजीब आतार यांनी पार पाडली. पकडलेल्या दरोडेखोरांना सोलापूर पोलिसांच्या ताब्यात देण्यात आले.

केज — एका शेतकऱ्याने कांद्याच्या पिकात अफूची लागवड केल्याची माहिती पोलिसांना मिळाल्यानंतर केलेल्या कारवाईत एक लाख 72 हजार रुपयाची साडेचार किलो अफू जप्त करण्यात आली. ही घटना कळंबआंबा येथे उघडकीस आली.

याबाबत अधिक माहिती अशी की कळंब अंबा येथील शेतकरी उत्तम रंगनाथ मस्के या शेतकऱ्याने शेतात कांद्याची लागवड केलेली आहे. याच कांदा पिकात अफू पिकाची देखील लागवड केली. या संदर्भात युसुफ वडगाव पोलिसांना गुप्त माहिती मिळाली या माहिती आधारे पोलिसांनी सोमवारी उत्तम मस्के यांच्या शेतात धाड टाकली. असता अफूची झाड मिळून आली. या कारवाईत पोलिसांनी साडेचार किलो अफु जप्त केला. या अफुची किंमत 1 लाख 72 हजार रुपये इतकी आहे. या प्रकरणी उत्तम मस्के यास पोलिसांनी ताब्यात घेतले. ही कारवाई नायब तहसीलदार आशा वाघ, पोलीस निरीक्षक शेंडगे, सय्यद अमजद, शिनगारे, घोरपडे, महादेव, राऊत, डोंगरे, चालक गायकवाड यांनी केली आहे.