धारूर –तालुक्यात अफूची शेती होत असल्याची माहिती मिळाल्यावरून तीन अधिकाऱ्यांसह 12 पोलीस कर्मचारी पिंपरवाडा शिवरात कारवाई करत रामहरी तिडके नावाच्या शेतकऱ्याचे शेतात तीन गुंठे अफूची शेती केली जात असल्याचे निदर्शनास आले.

याबाबत स्थानिक गुन्हे शाखेला गुप्त माहिती मिळाल्यावरुन पथकाने तीन अधिकाऱ्यांसह 12 पोलीस कर्मचारी घेऊन दुपारी बारा वाजल्यापासून या ठिकाणी कार्यवाही सुरू केलेली आहे. सायंकाळी सहा वाजता त्या तीन गुंठे शेतीतील अफू उपटून घेण्यास सुरुवात केली आहे.

अफू उपटून घेतल्यानंतर त्याचं जे वजन एकत्रित होणार आहे, त्यानुसार किती लाखाचा मुद्देमाल पकडला याबाबत पोलिसांकडून सविस्तर माहिती दिली जाईल असं सांगण्यात येत आहे. तत्पूर्वी धारूर तालुक्यात अफूची शेती आढळून आल्याने एकच खळबळ उडाली आहे. केज तालुक्यातील कळंब आंबा येथील शेतकऱ्यांने कांद्याच्या पिकात अफूची लागवड केल्याची घटना 25 फेब्रुवारी रोजी उघडकीस आली होती.दहा वर्षांपूर्वी परळी तालुक्यातील काही गावांमध्ये तसेच धारूर तालुक्यातील कानपूर येथे अफूची शेती पिकवण्याचा प्रकार आढळून आला होता. या अफूच्या माध्यमातून नशेखोरांना नशा करण्यास अफूचा उपयोग होतो आणि त्यासाठीच नशेखोर अफूचा उपयोग करून घेतात.रामहरी तिडके यांनी शेततळे खोदून त्याच्याद्वारे अफूला पाणीपुरवठा करत अतिशय दुर्गम भागात जिथे सहज जाणं शक्य नाही अशा ठिकाणी अफूची शेती पिकवली आहे. अफू पिकवणे कायद्याने निर्बंध घातलेले असताना रामहरी कारभारी तिडके या शेतकऱ्याने अफूची शेती होत असल्याचे उघडकिस आल्यानंतर खळबळ माजली आहे.

बीड — सरपंच संतोष देशमुख यांच्या हत्या प्रकरणात गुन्हे अन्वेषण विभागाने (सीआयडी) तपास पूर्ण करून मकोका न्यायालयात चौदाशे हून अधिक पानांचे आरोपपत्र दाखल केले आहे.

यामध्ये वाल्मिक कराड मुख्य आरोपी असल्याचे म्हटले आहे. संतोष देशमुख यांची हत्या कशी झाली आणि हत्येचा कट कोणी रचला, याबाबतची सविस्तर माहिती या आरोपपत्रातून समोर आली आहे.

वाल्मिक कराडच्या कुटुंबीयांनी दावा केला होता की, त्याचा या हत्येशी काहीही संबंध नाही. परंतु, हा दावा खोटा असल्याचे पोलिसांनी केलेल्या तपासात उघड झाले आहे. वाल्मिकचा संतोष देशमुख यांच्या हत्येत थेट सहभाग होता आणि त्यानेच सुदर्शन घुलेला फोन केल्याचे तपासात निष्पन्न झाले आहे.

7 डिसेंबर 2024 रोजी सुदर्शन घुले याने वाल्मिक कराडला फोन केला होता. त्यावेळी वाल्मिक कराडने सुदर्शन घुलेला सांगितले, ‘कोणीही उठतोय आणि आपल्या आड येतोय. असंच सुरू राहिलं तर आपण भीकेला लागू.’

‘असंच होत राहिलं तर कोणतीही कंपनी आपल्याला खंडणी देणार नाही. आता मागचं पुढचं काही बघू नका. जो कुणी आडवा येईल त्याला आडवा करावाच लागेल. कामाला लागा…. विष्णू चाटेशी बोलून घ्या, तो तुम्हाला मदत करेल,’ अशा सूचना वाल्मिकने सुदर्शन घुलेला दिल्या.
आवादा एनर्जी प्रा. लि. कंपनीने मस्साजोग, ता. केज, जि. बीड येथे पवनचक्कीच्या माध्यमातून वीजनिर्मितीचा प्रकल्प उभारला आहे. या प्रकल्पात कंपनीची सुमारे 300 ते 350 कोटी रुपयांची गुंतवणूक आहे. 8 ऑक्टोबर 2024 ते 9 डिसेंबर 2024 या काळात वाल्मिक कराड , विष्णू चाटे , सुदर्शन घुले , प्रतीक घुले, सुधीर सांगळे, कृष्णा आंधळे, जयराम चाटे आणि महेश केदार यांनी कट रचून आवादा कंपनीकडून 2 कोटी रुपयांची खंडणी उकळण्याचा आणि जो कोणी या मागणीला विरोध करेल, त्याची हत्या करून परिसरात दहशत पसरवण्याचा कट रचला, असे आरोपपत्रात म्हटले आहे.

बीड — मस्साजोगचे सरपंच संतोष देशमुख यांच्या हत्येच्या प्रकरणात पोलिसांनी केज न्यायालयात आरोपपत्र सादर केले आहे. या आरोपपत्रात काही धक्कादायक गोष्टी स्पष्ट करण्यात आल्या आहेत.

विशेष म्हणजे, तपासादरम्यान पोलिसांनी वाल्मिक कराड याला या प्रकरणाचा प्रमुख आरोपी ठरवला आहे. यासाठी पोलिसांनी विविध पुरावे आणि व्हिडिओ क्लिप्सचा आधार घेतला आहे.

आरोपपत्रात संतोष देशमुख यांची हत्या, खंडणी यांचा एकत्रित उल्लेख करण्यात आलेला आहे. पोलिसांनी 1400 पेक्षा जास्त पानांचे आरोपपत्र न्यायालयात सादर केले आहे. आरोपपत्रानुसार, संतोष देशमुख यांची हत्या खंडणीच्या कारणावरून झाली, असे दर्शवले गेले आहे.आरोपी वाल्मीक कराड यानेच संतोष देशमुखांच्या हत्येचं प्लॅनिंग केलं. यानंतर विष्णू चाटे, सुदर्शन घुले, प्रतीक घुले, जयराम चाटे यांच्यासह त्यांच्या इतर साथीदारांनी संतोष देशमुखांचा निर्घृण खून केला. या प्रकरणात मुख्य सूत्रधार वाल्मीक कराड हाच होता, असं आरोप पत्रात म्हटलं आहे

पाच गोपनीय साक्षीदारांचा पुरावा

या प्रकरणात पाच गोपनीय साक्षीदारांची महत्त्वाची भूमिका आहे. त्यांच्या दिलेल्या जबाबावरून वाल्मिक कराड याच्यावर आरोप ठेवण्यात आले आहेत. साक्षीदारांनी सांगितले की, सुदर्शन घुले आणि विष्णू चाटे यांची नांदूर फाट्यावर भेट झाली
होती, जिथे विष्णू चाटे यांनी सुदर्शन घुले याला वाल्मिक कराडचा संदेश दिला. या संदेशानुसार, “संतोष देशमुख आडवा आला, तर त्याला कायमचा धडा शिकवा,” असं सांगितलं गेलं.

सीआयडीचा महत्त्वाचा व्हिडिओ पुरावा

तपासादरम्यान सीआयडीला एक महत्त्वाचा व्हिडिओ मिळाला आहे. या व्हिडिओमध्ये आरोपी सुदर्शन घुले हा संतोष देशमुख यांना मारहाण करत असल्याचे दिसत आहे. हा व्हिडिओ आरोपी जयराम चाटे याने व्हॉट्सअॅप ग्रुपवर शेअर केला होता. या डिजिटल पुराव्यामुळे सीआयडीने निष्कर्ष काढला आहे की, संतोष देशमुख यांची हत्या करणारी एक संघटित टोळी होती.

मात्र या आरोप पत्रातून दोन आरोपींचं नाव वगळण्यात आलं आहे. रणजीत मुळे आणि सिद्धार्थ सोनवणे अशी आरोप पत्रातून नावं वगळलेल्या आरोपींची नावं आहेत.

दरम्यान रणजीत मुळे हा अॅट्रोसिटी प्रकरणातील आरोपी होता. तर सिद्धार्थ सोनवणे हा खूनाच्या प्रकरणात आरोपी होता. मात्र दोघांविरोधात आरोप पत्र दाखल झालं नाही. दोघांची नावं सीआयडीने आरोप पत्रातून वगळली आहेत. आता पुरवणी आरोप पत्रात या दोघांची नावं येतात की त्यांना मुख्य आरोपींविरोधात माफीचा साक्षीदार बनवलं जातं? हे पाहणं महत्त्वाचं असणार आहे. दोघांना माफीचा साक्षीदार बनवलं तर मुख्य आरोपींच्या अडचणीत आणखी वाढ होऊ शकते, असं कायदेतज्ज्ञांचं मत आहे

पुणे — स्वारगेट बस स्थानकावरील बलात्कार प्रकरणातील आरोपी दत्तात्रय गाडे याला स्वारगेट पोलिसांनी गुणाट गावातून अटक केली आहे. गेल्या दोन दिवसांपासून आरोपीचा शोध सुरू होता, आणि अखेर त्याला पकडण्यात पोलिसांना यश आले.

दोन दिवस ऊसाच्या शेतात लपून बसलेल्या आरोपीला जेवण मिळत नव्हते. त्यामुळे तो रात्रीच्या वेळी आपल्या नातेवाईकांकडे पाणी पिण्यासाठी जात होता. पोलिसांनी याच माहितीच्या आधारे त्याचा मागोवा घेतला.
अखेर, रात्री एक वाजता तो कॅनॉलजवळ झोपलेला असताना शोधमोहीम राबवणाऱ्या पोलिसांना दिसला. त्यानंतर तातडीने त्याला ताब्यात घेऊन पुण्याला रवाना करण्यात आले आहे. सध्या त्याला लष्कर पोलिस ठाण्याच्या लॉकअपमध्ये ठेवण्यात आले आहे.
पुढील चौकशीसाठी त्याला पुण्यात हलवण्यात आले असून, तूर्तास एवढेच सांगता येईल, अशी माहिती डीसीपी निखिल पिंगळे यांनी दिली.
आरोपीला पकडण्यासाठी पुणे शहर आणि ग्रामीण पोलिसांचे 100 जणांचे पथक तयार करण्यात आले होते.
-ऊसाच्या शेतात शोध घेण्यासाठी ड्रोन आणि श्वान पथकाचा वापर करण्यात आला.
-आरोपीला पकडण्यासाठी पोलिसांकडून एक लाख रुपयांचे बक्षीस जाहीर करण्यात आले होते.
-आरोपी दत्तात्रय गाडे हा सराईत गुन्हेगार असल्याचे पोलिसांच्या तपासात समोर आले आहे.

बलात्कार करून घरी परतला, दुपारपर्यंत आरामात, नंतर कीर्तनात सहभागी झाला!साडेपाच वाजण्याच्या सुमारास आरोपीने एका तरुणीवर अत्याचार करून शिरूर तालुक्यातील गुणाट गाव गाठले. दुपारपर्यंत तो घरीच होता. त्यानंतर त्याने कीर्तनातही सहभाग घेतला. मात्र, टीव्हीवर बातम्या सुरू झाल्या आणि त्यामध्ये स्वतःचा फोटो दिसताच, त्याने तातडीने घर सोडून पळ काढला.