केज — विहिरीच्या पाण्यावरून दोन सख्ख्या भावांमध्ये रक्तरंजीत राडा झाला.कुऱ्हाड, कत्ती, काठ्यांचा वापर मारहाणी साठी केल्यामुळे काही जण जखमी झाले. ही घटना केज तालुक्यातील येवता या ठिकाणी घडली याप्रकरणी आठ जणांविरुद्ध गुन्हे दाखल करण्यात आले आहेत.‌
केज तालुक्यातील येवता येथील मल्हारी लक्ष्मण सक्राते 53 वर्ष यांच्या फिर्यादीनुसार, बुधवारी सायंकाळी साडेसहाच्या सुमारास ते शेतात असताना त्यांचा सख्खा भाऊ अशोक सक्राते आणि त्याच्या मुलांनी तेथे येऊन वाद घातला. “विहीर आमची आहे, मोटार चालू करू नकोस,” असे म्हणत त्यांनी शिवीगाळ केली. “आपण बारीने पाणी घेऊ” असे मल्हारी यांनी सुचवले असता, रागाच्या भरात अशोकने कुऱ्हाडीने मल्हारी यांच्या डोक्यात वार करून त्यांना गंभीर जखमी केले. या प्रकरणी अशोक सक्राते, प्रणव, समाधान आणि शिवकन्या या चौघांविरुद्ध गुन्हा दाखल करण्यात आला आहे. तर दुसरीकडे, दुसऱ्या गटाचे प्रणव अशोक सक्राते यांनीही फिर्याद दिली आहे. त्यांच्या म्हणण्यानुसार, ते विहिरीवर मोटार चालू करण्यास गेले असता त्यांचे चुलते मल्हारी सक्राते, दीपक, प्रवीण आणि शारदा सक्राते यांनी त्यांना अडवले. यावेळी झालेल्या वादात चुलते मल्हारी सक्राते यांनी धारदार कत्तीने प्रणवच्या हातावर वार करून त्याला जखमी केले, तर इतरांनी दगडाने मारहाण केली. या तक्रारीवरून मल्हारी सक्राते यांच्यासह
चौघांविरुद्ध गुन्हा नोंदवण्यात आला आहे.

मुंबई — सदनिकेच्या घोटाळा प्रकरणी माणिकराव कोकाटेंना प्रथम वर्ग न्यायालयाने दोन वर्षांचा तुरुंगवास आणि 50 हजार रुपये दंड अशी शिक्षा सुनावण्यात आली होती.त्याची ही शिक्षा नाशिक जिल्हा सत्र न्यायालयाकडून सुद्धा कायम ठेवण्यात आली. ज्यानंतर कोकाटेंनी बुधवारीच 17 डिसेंबर रोजी मुंबई उच्च न्यायालयात धाव घेत शिक्षेच्या स्थगितीसाठी याचिका दाखल केली. या याचिकेवर आज दि.19 डिसेंबर रोजी मुंबई उच्च न्यायालयात सुनावणी झाली. यावेळी न्यायालयाने एक लाख रुपयांच्या जात मुचलक्यावर कोकाटेला जामीन मंजूर करण्यात केला आहे.
बनावट कागदपत्रांच्या आधारे शासकीय सदनिकेचा लाभ घेण्याच्या प्रकरणात माजी मंत्री आणि अजित पवारांच्या राष्ट्रवादी काँग्रेसचे नेते माणिकराव कोकाटेंच्या दोन वर्षांच्या शिक्षेला उच्च न्यायालयाने स्थगिती दिली नसली तरी एक लाख रुपयांच्या जातमुचलक्यावर त्यांना जामीन मंजूर झाला आहे. त्यामुळे रुग्णालयात असलेल्या कोकाटेंना सध्या तरी दिलासा मिळाला आहे. त्यांना या क्षणाला कोणतीही अटक होणार नाही. पण, कोकाटेंच्या आमदारकीचा निर्णय विधानसभा अध्यक्षांनी घ्यावा, असेही कोर्टाकडून स्पष्ट करण्यात आले आहे. ज्यामुळे आता विधानसभा अध्यक्ष कोकाटेंच्या आमदारकीबाबत नेमका काय निर्णय घेतात, हे पाहणे महत्त्वाचे ठरणार आहे.

कमी उत्पन्न असणाऱ्या व्यक्तीला मुख्यमंत्री कोट्यातून सदनिका घेताना स्वतःच्या नावावर कुठेही सदनिका नसल्याचे प्रतिज्ञापत्र व आवश्यक माहिती सादर करावी लागते, असे असताना मंत्री कोकाटे व त्यांचे बंधू विजय कोकाटे यांनी 1995 ते 1997 या कालावधीत खोटी कागदपत्रे सादर करून नाशिक शहरात मुख्यमंत्री कोट्यातून दोन सदनिका प्राप्त केल्या. त्या वेळी त्यांनी आपले उत्पन्न कमी असल्याचे आणि स्वतःकडे अन्य कोणतेही घर नसल्याची माहिती शासनाला दिली होती. या आधारे त्यांना शासनामार्फत सदनिका मंजूर करण्यात आल्या. मात्र सदनिका मिळवण्यासाठी कागदपत्रांमध्ये फेरफार करून शासनाची फसवणूक करण्यात आल्याचा आरोप कोकाटे यांच्यावर करण्यात आला. 1995 साली माजी मंत्री तुकाराम दिघोळे यांनी यासंदर्भात तक्रार दिली होती. त्यानुसार कोकाटे यांच्यावर गुन्हा दाखल करण्यात आला होता. न्यायालयात हा खटला सुरु होता. तीन वर्षांनी न्यायालयाने निकाल देत कोकाटे बंधूंना शिक्षा सुनावली. माजी मंत्री दिघोळे यांनी दाखल केलेल्या याचिकेच्या आधारे नाशिकच्या सरकारवाडा पोलीस ठाण्यात गुन्हा दाखल करण्यात आला होता. 1997 पासून हे प्रकरण न्यायप्रविष्ट होते. दिघोळे यांची कन्या अंजली दिघोळे यांनी हे प्रकरण लावून धरलं. अखेर न्यायालयाने माणिकराव कोकाटे आणि त्यांचे बंधू विजय कोकाटे या दोघांना दोषी ठरवत प्रत्येकी दोन वर्षांची कारावासाची शिक्षा आणि 50 हजार रुपयांचा दंड ठोठावला आहे. याच प्रकरणात आता कोकाटेंना एक लाख रुपयांच्या जात मुचलक्यावर जामीन मंजूर झाला आहे.

केज — मोठ्या बहिणी सोबत ऊस तोडणी साठी आलेल्या बारा वर्षीय मुलीवर लैंगिक अत्याचार केल्याची खळबळजनक घटना तालुक्यातील एका गावातून उघडकीस आली आहे.याप्रकरणी युसूफवडगाव पोलिस ठाण्यात पोक्सोसह अत्याचाराचा गुन्हा दाखल झाला असून आरोपीला पकडण्यात पोलिसांना यश आले आहे.
अत्याचार पीडित बालिकेचे कुटुंब अत्यंत हलाखीच्या परिस्थितीत आहे. तिचे वडील कर्नाटकात ऊस तोडणीसाठी गेले आहेत, तर आईची मानसिक स्थिती ठीक नाही.ती नातेवाइकांकडे असते. अशा भीषण परिस्थितीत 6 वीच्या वर्गात शिकणारी ही पीडित बालिका आपल्या ऊसतोड मजूर बहिणीसोबत केज भागात आली होती. तिची मोठी बहीण आणि दाजी धारूर तालुक्यातील एका मुकादमाकडून उचल घेऊन केजमधील एका गावात ऊसतोडणीसाठी आले होते. सोमवारी रात्री सर्व मजूर शेतात उसाचे ट्रॅक्टर भरण्यासाठी गेले होते.यावेळी आरोपी लक्ष्मण ऊर्फ सागर निवृत्ती वाघमारे वय 34 वर्ष, रा. सोमनाथ बोरगाव, ता. अंबाजोगाई हा देखील तिथेच होता. दरम्यान सहा वर्षांची बालिका नैसर्गिक विधीसाठी जात असताना, नराधम लक्ष्मणने तिचे तोंड दाबून तिच्यावर अत्याचार केला. पीडितेने घडलेला सर्व प्रकार आपल्या बहिणीला सांगितला. ही घटना माहिती होताच पोलिसांत धाव घेण्यात आली. गुन्हा दाखल होताच आरोपी पळून गेला होता. मात्र, युसूफवडगाव पोलिसांनी आरोपीला कळंब बसस्थानकावरून पळून जाण्याच्या तयारीत असतानाच पकडले. बुधवारी संध्याकाळी पोलिसांनी ही कारवाई केली. याप्रकरणी पोलिसांनी आरोपी विरोधात पाॅक्सोसह इतर कलमांखाली गुन्हा नोंद केला आहे.

गेवराई — शहरातील पंचायत समिती जवळील चौकातून अपहरण केलेल्या मुलीला सोडवण्यासाठी पथक तयार करण्यात आली होती. दरम्यान पोलिसांनी अपहरण नाट्यात पाठलाग करून परभणी शहरातून मुलीला सुखरूप ताब्यात घेण्यात यश मिळाले. मात्र आरोपी पोलिसांच्या हाती लागले नसून तीन जनाविरोधात गुन्हा दाखल करण्यात आला आहे.
शहरातील पंचायत समिती जवळ असलेल्या चौकातून महाविद्यालयात शिक्षण घेत असलेली मुलगी घराकडे पायी जात होती यावेळी अचानक एक चार चाकी गाडी तिच्याजवळ आली आणि फिल्मी स्टाईलने त्या मुलीला गाडीत टाकून पळवून नेले. मुलीने विरोध करत सुटका करून घेण्याचा प्रयत्न केला पण तीला दोघांनी मारहाण करुन जबरदस्तीने वाहनात घातले ही घटना गुरूवारी दुपारी 12 वाजता दिवसाढवळ्या घडल्याने खळबळ उडाली होती. ही सर्व घटना सीसीटीव्ही कॅमेऱ्यात कैद झाली. सदरील वाहन हे शास्त्री चौकातून महामार्गाने शहागडच्या दिशेने गेले होते.या घटनेचे गांभीर्य ओळखून पोलिसांनी संबंधित गाडीचा पाठलाग करून शोध सुरू केला होता.तर सर्वत्रच हा संदेश पोहोचवला होता. यामुळे तपासाला वेग आला. पोलीस सर्वत्र तपास करीत असताना अपह्रृत मुलगी परभणी शहरात सुखरुप असल्याची माहिती मिळाली आणि सुटकेचा निःश्वास सोडून गेवराई पोलीस परभणीच्या दिशेने गेले. या ठिकाणी अपहरण झालेल्या मुलीला ताब्यात घेतले आहे. काही तासात गेवराई पोलिसांनी मुलाचा शोध घेऊन ताब्यात घेण्याचा प्रयत्न केला पण आरोपी काही हाती लागले नाही. याप्रकरणी अपहरण करणाऱ्या तिन जणांविरुद्ध गुन्हा दाखल करण्यात आला आहे. गेवराई पोलीस आरोपींचा शोध घेत आहेत. ही कारवाई पोलीस निरीक्षक किशोर पवार यांच्या मार्गदर्शनाखाली सहाय्यक पोलीस निरीक्षक संतोष जंजाळ, सहाय्यक पोलीस निरीक्षक सतीश कोटकर, दीपक लंके, पोलीस उपनिरीक्षक निशिगंधा खुळे, पोलीस उपनिरीक्षक सुरेश पारधी, पोलीस कॉन्स्टेबल आरेफ बागवान यांनी व परभणी पोलिसांनी केली आहे.

छ.संभाजीनगर — संपूर्ण बीड जिल्ह्याचे लक्ष लागून असलेल्या संतोष देशमुख खून खटल्यातील मुख्य आरोपी वाल्मीक कराड याला मुंबई उच्च न्यायालयाच्या छत्रपती संभाजीनगर खंडपीठाने मोठा धक्का देत जामीन अर्ज फेटाळून लावला, त्याला तुर्त दिलासा देण्यास स्पष्ट नकार दिला आहे. न्यायमूर्ती सुशील घोडेस्वार यांनी बुधवारी हा महत्त्वपूर्ण निकाल दिला.
या प्रकरणातील सुनावणी गेल्या काही दिवसांपासून चर्चेत होती. शुक्रवारी ज्येष्ठ विधिज्ञ शिरीष गुप्ते यांनी कराडच्या वतीने तब्बल सहा तास प्रदीर्घ युक्तिवाद केला होता. त्यांनी पोलिसांच्या तपासावर आणि अटकेच्या कायदेशीर प्रक्रियेवर अनेक प्रश्नचिन्ह उपस्थित केले होते. मात्र, मंगळवारी मुख्य सरकारी वकील अमरजितसिंह गिरासे आणि फिर्यादीचे वकील ॲड. नितीन गवारे यांनी सरकारची बाजू भक्कमपणे मांडली. त्यांनी पुराव्यांच्या आधारे आरोपीचे सर्व दावे खोडून काढले आणि ‘मकोका’ अंतर्गत झालेली कारवाई योग्य असल्याचे न्यायालयाच्या निदर्शनास आणून दिले. बुधवारी झालेल्या सुनावणीत कराडच्या वकिलांनी 19 डिसेंबर रोजी होणाऱ्या दोष निश्चितीला स्थगिती देण्याची विनंती बीडच्या विशेष न्यायालयाला करावी, अशी मागणी केली होती. मात्र, उच्च न्यायालयाने हे प्रकरण जामीन देण्या योग्य नसल्याचे निरीक्षण नोंदवले. न्यायालयाने कराडच्या वकिलांना विचारले की, “तुम्ही जामीन अर्ज मागे घेता की आम्ही आदेश पारित करू?” वकिलांनी आदेश देण्याची विनंती केल्यानंतर, न्यायालयाने वाल्मीक कराडचा जामीन अर्ज फेटाळला. या निकालानंतर आता बीडच्या विशेष न्यायालयात 19 डिसेंबर रोजी या प्रकरणातील दोष निश्चितीची प्रक्रिया पार पडणार असून, वाल्मीक कराडचा कारागृहातील मुक्काम वाढला आहे.

केज — तालुक्यातील प्रसिद्ध श्रीसंत एकनाथ महाराज संस्थान, सासुरा येथे गेल्या काही महिन्यांपासून सुरू असलेला वाद आता वाढला आहे. मठाधिपती आणि त्यांच्याच माजी उत्तराधिकारी यांच्यातील संबंध इतके बिघडले आहेत की, दोघांनीही एकमेकांना रट्टे तर दिलेच पण पोलीसात धाव घेत परस्परांवर गंभीर मारहाण आणि जीवे मारण्याची धमकी दिल्याचा आरोप केला आहे.
या प्रकरणात दोन्ही महाराजांनी एकमेकांविरुद्ध परस्परविरोधी तक्रारी दाखल केल्या असून, ‘मठाची गादी’ आणि ‘उत्तराधिकार’ यावरून हा वाद टोकाला पोहोचल्याची माहिती मिळत आहे.

केशव महाराजांचा आरोप : ‘गाडी फोडली, मारहाण केली!’

ह.भ.प. केशव महाराज गित्ते रा. नंदागौळ, परळी यांनी 15 डिसेंबर रोजी पोलिसांत तक्रार दिली. त्यांच्या म्हणण्यानुसार, काही महिन्यांपूर्वी त्यांना मठाधिपती ह.भ.प. रतन महाराज यांनी स्वतः उत्तराधिकारी म्हणून सासुरा येथे आणले होते. मात्र, नंतर त्यांना अचानक मठातून हाकलून देण्यात आले.केशव महाराज यांनी तक्रारीत म्हटले आहे की, आपल्याला का हाकलून दिले? याचा जाब विचारण्यासाठी केशव महाराज 14 डिसेंबर रोजी रात्री 9 वाजता आपल्या गाडी क्र. एम एच- 44/एस- 4528 सासुरा येथे गेले होते. यावेळी त्यांना लक्ष्मण उगले आणि त्यांच्या साथीदारांनी अडवले. केशव महाराज यांना लाथाबुक्क्यांनी मारहाण करण्यात आली, शिवीगाळ झाली आणि जीवे मारण्याची धमकी देण्यात आली. लक्ष्मण उगले याने त्यांच्या गाडीच्या पुढील काचेवर दगड मारून ती फोडली. ह.भ.प. रतन महाराज, सुशन रामराव भोसले आणि लक्ष्मण उगले यांच्यापासून आपल्या जीविताला धोका असल्याचं तक्रार एक म्हटलं आहे

अंमली पदार्थांचे सेवन करून अपहरणाचा प्रयत्न मठाधिपती रतन महाराज

संत एकनाथ महाराज संस्थानचे मठाधिपती ह.भ.प. रतन महाराज यांनीही पलटवार करत पोलिसांत तक्रार दिली आहे. त्यांनी त्यांच्या तक्रारीत म्हटले आहे की, केशव महाराज गित्ते यांना उत्तराधिकारी म्हणून आणले होते, पण ते अंमली पदार्थांचे सेवन करत असल्याने त्यांना मठातून हाकलून देण्यात आले.मठाधिपती रतन महाराजांनी तक्रारीत म्हटले आहे की, 14 डिसेंबर रोजी रात्री 9.30 वाजता केशव महाराज गित्ते आणि त्यांचा चुलत भाऊ कृष्णा गित्ते हे दोघे अंमली पदार्थांचे सेवन करून आश्रमात आले. त्यांनी रतन महाराज यांना ‘का हाकलून लावले?’ असे विचारून शिवीगाळ केली, मारहाण केली आणि ओढत आणले, तसेच गाडीत नेऊन अपहरण करण्याचा आणि जीवे मारण्याचा प्रयत्न केला. रतन महाराज यांना मारहाण होत असताना किसनाबाई डोईफोडे यांनी आरडाओरडा केल्यामुळे बाळासाहेब उगले, बप्पा पाळवदे, दिगंबर उगले आणि सुहास उगले यांच्यासह इतर लोक जमा झाले. लोक जमा होताच केशव महाराज गित्ते पळून गेले. केशव महाराज गित्ते आणि कृष्णा गित्ते यांच्यापासून त्यांच्यासह इतर भक्तांच्या जीविताला धोका असल्याचं म्हटलं आहे
दरम्यान केज पोलीस ठाण्यात दोन्ही महाराजांनी दाखल केलेल्या तक्रारींवरून परस्परविरोधी अदखलपात्र स्वरूपाचे गुन्हे दाखल करण्यात आले आहेत. या प्रकरणाचा पुढील तपास पोलीस निरीक्षक स्वप्नील उनवणे यांच्या मार्गदर्शनाखाली सहाय्यक पोलीस उपनिरीक्षक अशोक सोनवणे करत आहेत.