बीड  — बीड नगरपालिकेचे मुख्याधिकारी शैलेश फडसे यांच्या बदलीचे आदेश शासनाने बुधवारी जारी केले. शहरात सध्या सुरू असलेल्या अतिक्रमण हटाओ मोहिमेच्या पार्श्वभूमीवर झालेल्या या अचानक बदलीची बीड शहरात जोरदार चर्चा सुरू आहे.
शैलेश फडसे यांनी बीड नगरपालिकेचे मुख्याधिकारी म्हणून पदभार स्वीकारला तेव्हा नगरपालिकेतील लोकप्रतिनिधींचा कार्यकाळ संपलेला होता. त्यामुळे काही काळ नगरपालिकेचा संपूर्ण कारभार प्रशासनाच्या माध्यमातून चालत होता. या काळात मुख्याधिकाऱ्यांच्या विविध निर्णयांवर अनेकदा आक्षेप घेतले गेले होते.
मुख्याधिकारी आणि कर्मचारी यांच्यातील समन्वयाचा अभाव देखील चर्चेचा विषय ठरला होता. त्यानंतर नगरपालिकेच्या निवडणुका झाल्यानंतर सौ. प्रेमलता पारवे नगराध्यक्षपदी विराजमान झाल्या. नव्या पदाधिकाऱ्यांसमोर प्रशासन समजून घेणे आणि शहरातील कामांना गती देणे हे मोठे आव्हान होते.
नगरपालिकेने स्वच्छता, पाणीपुरवठा आणि इतर नागरी सुविधांच्या कामांना वेग दिल्यानंतर शहरातील अतिक्रमण हटाओ मोहीम हाती घेण्यात आली. नाल्यांची सफाई आणि शहरातील वाहतुकीला अडथळा ठरणारे अतिक्रमण हटविणे गरजेचे असल्याचे प्रशासनाकडून सांगण्यात आले. मात्र, या मोहिमेच्या अंमलबजावणीच्या पद्धतीवरून काही नागरिकांनी आणि व्यावसायिकांनी नाराजी व्यक्त केली होती.
याच पार्श्वभूमीवर बुधवारी शासनाने मुख्याधिकारी शैलेश फडसे यांच्या बदलीचे आदेश काढले. फडसे यांची बीड नगरपालिकेच्या मुख्याधिकारी पदावरून सहआयुक्त, जिल्हाधिकारी कार्यालय नांदेड येथे बदली करण्यात आली आहे.
अतिक्रमण मोहिमेच्या काळातच झालेल्या या बदलीमुळे बीडच्या राजकीय आणि प्रशासकीय वर्तुळात विविध चर्चा रंगल्या आहेत.

 जिल्हाधिकारी कार्यालयाने केलेल्या कारवाईत बडे मासे वगळल्याचा केला आरोप

बीड — घरकुल लाभार्थ्यांना वाळू उपलब्ध करण्याच्या नावाखाली गोदावरी नदीपात्रात लाखो ब्रास वाळूचे अवैध उत्खनन होत असून या अवैध वाळू उपशाची एसआयटी कडून चौकशी करावी अशी मागणी आपण केली होती, त्यानंतर जिल्हा प्रशासनाने थातूरमातूर कारवाई केली. गेवराई तहसिलदारांच्या नेतृत्वात गोदावरी नदीपात्रात सुमारे १०० कोटी रुपयांचे वाळू उपसा सिंडीकेट चालवणारे मुख्य आरोपी या प्रकरणातून बाजूला सारून इतर लोकांवर जिल्हा प्रशासनाने कार्यवाही केली असून आपण हे प्रकरण तडीस जाईपर्यंत लावून धरणार आहोत. येणाऱ्या हिवाळी अधिवेशनात आपण हा प्रश्न उपस्थित करणार असून वेळ पडली तर न्यायालयात दाद मागू अशी प्रतिक्रिया आ. विजयसिंह पंडित यांनी पत्रकारांशी बोलताना दिली

श्री क्षेत्र राक्षसभुवन (शनिचे) येथून घरकुल बांधकामाच्या नावावर गोदावरी नदीपात्रातून सुरु असलेल्या अवैध वाळू उपसा प्रकरणी आ. विजयसिंह पंडित पुढे म्हणाले की, या प्रकरणात सुमारे १०० कोटी रुपयांचे तहसिलदारांच्या नेतृत्वात महसुल व पोलीस विभागातील कर्मचाऱ्यांचे वाळू माफियांसह सिंडीकेट कार्यान्वित असल्याचे सिद्ध होताच जिल्हा प्रशासनाने कारवाई केली मात्र या कारवाईतून सिंडिकेट चालवणारे मुख्य आरोपी दूर ठेवण्यात आल्याचा आरोप आ. विजयसिंह पंडित यांनी यावेळी केला.

अवैध वाळू उपसा करणाऱ्या तहसील आणि त्यांच्या कंपनीच्या विरोधात आपण ही मोहीम यापुढेही चालवणार असून हा प्रश्न तडीस जाईपर्यंत आपण याची पाठ सोडणार नसल्याचे सांगून येणाऱ्या हिवाळी अधिवेशनात आपण हा प्रश्न उपस्थित करणार असून वेळ पडली तर न्यायालयात दाद मागणार असल्याचेही त्यांनी यावेळी सांगितले.

विविध मान्यवरांच्या उपस्थितीत कार्यक्रमाचे आयोजन

बीड —  पत्रकारितेत विविध वृत्तपत्रांच्या माध्यमातून सामाजिक विषयावर आवाज उठवणारे बीड येथील ज्येष्ठ पत्रकार उत्तम हजारे यांचा दि.२८ जून रोजी परळी येथे विशेष सन्मान करण्यात येणार आहे .
रविवार दि.२८ जून रोजी सकाळी ११ वाजता परळी वैद्यनाथ येथील लोकनेते गोपीनाथराव मुंडे सभागृहात हा कार्यक्रम होणार आहे. दैनिक वृत्तरत्न सम्राटचे संपादक कुणाल कांबळे यांच्या हस्ते कार्यक्रमाचे उदघाटन होईल तर प्रा. प्रदीप रोडे हे कार्यक्रमाच्या अध्यक्षस्थानी असतील. पत्रकार उत्तम हजारे यांनी पत्रकारितेच्या तीस-पस्तीस वर्षात विविध वृत्तपत्राच्या माध्यमातून सामाजिक प्रश्नावर निर्भीड लिखाण केले. बहुजन, कष्टकरी, आदिवासी , महिला, कामगार, विद्यार्थी, दलित अत्याचार आदी प्रश्नावर सातत्याने आवाज उठवुन, आंबेडकरी व बहुजन- ओबीसी आणि धम्म चळवळ गतिमान करण्याचा प्रयत्न केला. त्यामुळे पत्रकारितेत केलेल्या उल्लेखनीय कामगिरीबद्दल ज्येष्ठ पत्रकार उत्तम हजारे यांचा सन्मान करण्यात येणार आहे.
या कार्यक्रमास प्रसिद्ध साहित्यीक अजयकुमार गंडले, नगरसेवक अनंत इंगळे, संतोष रोडे, विचारवंत प्रा. डॉ. दयानंद झिंझुर्डे, विनोद कांबळे, मुप्टा प्राथमीकचे जिल्हाध्यक्ष भैय्यासाहेब आदोडे, विकास रोडे, दै.संघर्ष नेताचे संपादक मोहन व्हावळे, पत्रकार भारत साकसमुद्रे आदींची उपस्थिती राहणार आहे.

प्रा. प्रदीप रोडे यांचा गौरव

परळीचे भूमीपुत्र असलेले प्रा. प्रदीप रोडे यांनी शैक्षणिक व सामाजिक क्षेत्रात उत्कृष्ट कार्य केल्याबद्दल त्यांचा गौरव करण्यात येणार आहे. परळीतील नवनिर्वाचित नगरसेवक, डीजे मुक्त जयंती साजरी करणारे पदाधिकारी यांचाही यावेळी सत्कार करण्यात येणार आहे. परळी येथे होणाऱ्या या कार्यक्रमास समाजबांधवांनी बहुसंख्येने उपस्थित रहावे असे आवाहन कार्यक्रमाचे मुख्य आयोजक पत्रकार रानबा गायकवाड, विलास ताटे, विकास वाघमारे, चंद्रमणी वाघमारे आदींनी केले आहे .

51 हजाराची थैली देणार

दैनिक सम्राटचे संपादक कुणाल बबन कांबळे यांना परळीतील समाज बांधवाच्या वतीने 51 हजार रुपयांची थैली या कार्यक्रमात अर्पण करण्यात येणार आहे.