बीड — घरकुल लाभार्थ्यांच्या नावावर झालेल्या कथित अवैध वाळू उपसा प्रकरणामुळे आधीच चर्चेत असलेले गेवराईचे तहसीलदार संदीप केशव खोमणे यांच्या अडचणी वाढल्या आहेत. बारामती तालुक्यातील जळगाव सुपे येथील एका व्हॉट्सॲप ग्रुपवरील कथित जातीय अपमानाच्या प्रकरणी तहसीलदार खोमणे आणि सुनील दत्तू खोमणे (रा. जळगाव सुपे, ता. बारामती) यांच्याविरोधात अनुसूचित जाती-जमाती (अत्याचार प्रतिबंधक) कायद्यानुसार माळेगाव पोलीस ठाण्यात गुन्हा दाखल करण्यात आला आहे.
या प्रकरणी संदीप रमेश खंडाळे (वय ३६, रा. जळगाव सुपे) यांनी फिर्याद दिली आहे. पोलिसांनी दिलेल्या माहितीनुसार, १९ एप्रिल २०२५ रोजी रात्री ‘आपला गाव, आपला विकास’ या व्हॉट्सॲप ग्रुपमध्ये ग्रामपंचायत सार्वत्रिक निवडणुकीतील आरक्षणासंदर्भातील पत्र शेअर करण्यात आले होते.
या पत्रावरून ग्रुपमध्ये चर्चा सुरू असताना, फिर्यादी हे हिंदू मांग समाजातील असल्याची माहिती असतानाही त्यांच्याबाबत जातीय हेतूने अपमानास्पद वक्तव्य करण्यात आल्याचा आरोप तक्रारीत करण्यात आला आहे. तसेच या वक्तव्यामुळे ग्रुपमधील इतर सदस्यांमध्ये फिर्यादीविषयी तिरस्कार व द्वेषाची भावना निर्माण होईल, अशा प्रकारचे वर्तन झाल्याचा आरोपही करण्यात आला आहे.
तक्रारीनुसार, फिर्यादीला संबंधित व्हॉट्सॲप ग्रुपमधून हटवण्यात आल्याचा उल्लेखही करण्यात आला आहे. या तक्रारीच्या आधारे माळेगाव पोलिसांनी तहसीलदार संदीप खोमणे आणि सुनील खोमणे यांच्याविरोधात अॅट्रॉसिटी कायद्यातील विविध कलमांनुसार गुन्हा दाखल केला असून, पुढील तपास पोलीस निरीक्षक कुलदीप दत्तात्रय करीत आहेत.
दरम्यान, गेवराई तालुक्यातील कथित अवैध वाळू उपसा प्रकरणातही तहसीलदार संदीप खोमणे यांच्यावर यापूर्वी आरोप झाले होते. गेवराईचे आमदार विजयसिंह पंडित यांनी त्यांच्या मार्गदर्शनाखाली मोठ्या प्रमाणात कथित अवैध वाळू सिंडिकेट सुरू असल्याचा आरोप केला होता. या प्रकरणाची प्रशासकीय चौकशी आणि प्रक्रिया सुरू असल्याचे सांगण्यात आले आहे.
तसेच खोमणे यांच्या निलंबनाचा प्रस्ताव बीड जिल्हाधिकाऱ्यांनी महसूल विभागाच्या वरिष्ठांकडे पाठविल्याची माहिती समोर आली होती. आता त्यांच्या मूळ गाव परिसरात अॅट्रॉसिटी कायद्यान्वये गुन्हा दाखल झाल्याने तहसीलदार खोमणे पुन्हा चर्चेत आले आहेत. या प्रकरणात प्रशासनाकडून कोणती भूमिका घेतली जाते, याकडे लक्ष लागले आहे.
गेवराईचा वादग्रस्त तहसीलदार संदीप खोमणेवर अॅट्रॉसिटीचा गुन्हा दाखल
