बीड — नगरपालिकेचे मुख्याधिकारी शैलेश फडसे यांना दोघांनी केबिनमध्ये घुसून शिवीगाळ करत जीवे मारण्याची धमकी दिली. सरकारी कामात अडथळा आणला याप्रकरणी शहर पोलीस ठाण्यात पत्र देऊनही गुन्हा दाखल झाला नाही. शेवटी कर्तव्यदक्ष पोलीस अधिकारी शितल कुमार बल्लाळ यांची नाचक्की झाल्यानंतर न प कर्मचाऱ्यांनी देखील आंदोलनास सुरुवात केली. शेवटी चार दिवसानंतर अखेर गुन्हा दाखल झाला.
मुख्याधिकारी सारख्या महत्त्वाच्या पदावर असणाऱ्या व्यक्तीला कॅबिनमध्ये घुसून जीवे मारण्याची धमकी दिली जाते. शिवीगाळ केली जाते. एवढं होऊनही या प्रकरणात गुन्हा दाखल करण्यासाठी शहर पोलीस ठाण्याच्या कर्तव्यदक्षतेची बिरूदावली मिरवणाऱ्या ठाणेदारांनी नेहमीच्या सवयीप्रमाणे टाळाटाळ केली. मुख्याधिकारी शैलेश फडसे यांनी सात मे रोजी शेख निजाम अमीन रा. मसरत नगर व शेख इम्रान निजाम या दोघांनी माझ्या केबिनमध्ये घुसून मला शिवीगाळ केली, अंगावर धावून आले, जीवे मारण्याची धमकी देत सरकारी कामात अडथळा आणला म्हणून गुन्हा दाखल करण्यासंदर्भात शहर पोलीस ठाण्याला पत्र दिले.मात्र दोन दिवसाचा कालावधी उलटूनही मुख्याधिकाऱ्यांच्या पत्रा नुसार कारवाई करावी अशी इच्छा पोलीस निरीक्षक शितल कुमार बल्लाळ यांना झाली नाही. आरोपींना वाचवण्याच्या नादात पोलीस प्रशासनाची नाचक्की होणार आहे. पोलीस अधीक्षकांच्या कारभारावर प्रश्नचिन्ह उपस्थित होणार आहेत याचा भान देखील त्यांना राहिलं नाही.शेवटीं या प्रकरणाला वाचा फुटली गेली. यातून संपूर्ण पोलीस प्रशासनाच्या कारभारावर प्रश्नचिन्ह निर्माण केले गेले. मुख्याधिकारी सारख्या महत्त्वाच्या पदावरच्या अधिकाऱ्यांच्या बाबतीत ही परिस्थिती असेल तर सर्वसामान्यांचे जीवन किती नरकासारखं केलं असेल असा प्रश्न उपस्थित केला जाऊ लागला. खाकी वर्दी भूशारकीचा टेंभा मिरवण्यासाठीच आहे का? अवैध धंद्यांना आश्रय देण्यासाठीच आहे काय? यासारखे अनेक प्रश्न जनतेतून विचारले गेले. इतकं होऊनही स्वतःच्या धुंदीत असलेल्या ठाणेदारांनी याकडे दुर्लक्ष केले. शेवटी आज नगरपालिका कर्मचाऱ्यांनी काम बंद आंदोलनाचे हत्यार उपसले त्यामुळे दुपारपर्यंत नगरपालिकेचे कामकाज ठप्प झाले गेले. शहराची स्वच्छता देखील आंदोलनाच्या पवित्र्यामुळे अर्धवटच राहिली. नगरपालिकेचे कामकाज ठप्प झाल्यामुळे नागरिक वेठीस धरले गेले.
शेवटी ठाणेदाराने पोलीस प्रशासनाची नाचक्की होईपर्यंत हे प्रकरण ताणून धरले आंदोलन करायला भाग पाडले त्यानंतर घटनेच्या चार दिवसानंतर आज दि.11 मे रोजी दुपारी गुन्हा दाखल केला. गुन्हा दाखल झाल्यानंतर मुख्याधिकारी शैलेश फडसे यांनी गुन्हा दाखल झाला आहे आता आंदोलन मागे घ्या असं सांगून न प कर्मचाऱ्यांचे आंदोलन स्थगित करण्यास सांगितल्यानंतर न.प.चे कामकाज पुन्हा सुरळीत सुरू झाले.
याप्रकरणी बीड शहर पोलीस ठाण्यात गु.र.न. 91/2026 कलम 132, 221, 115 (2), 351 (2),3(5) बीएनएस प्रमाणे शेख निजाम व त्याच्या मुला विरुद्ध गुन्हा दाखल करण्यात आला आहे.
फडसें चा केला खडसे!
आनंदीबाई ने “ध”चा “मा” केल्यामुळे पेशवाई चा इतिहास बदलला होता. तसाच प्रकार इथे देखील कर्तव्यदक्ष पोलीस अधिकाऱ्याने केला आहे. एफ आय आर मध्ये शैलेश दिगंबरराव फडसे ऐवजी त्यांचे आडनावच बदलले.
एफ आय आर मध्ये शैलेश दिगंबरराव खडसे असा उल्लेख करण्यात आला आहे.
एस पी साहेब, प्रत्येक वेळी आंदोलनच करायचे का?
काही महिन्यापूर्वी एका वकिलाला न्यायालयाच्या आवारातच मारहाण केली गेली होती. यावेळी देखील पोलिसांनी फिर्याद देऊन गुन्हा दाखल करून घेतला नाही. शेवटी बार कौन्सिलने न्यायालयाच्या कामकाजावर बहिष्कार टाकला. शिवाजीनगर पोलीस ठाण्यापर्यंत मोर्चा काढला. न्यायालयाच्या दारातच ठिय्या दिला त्यावेळी कसातरी गुन्हा दाखल झाला गेला. तीच स्थिती जीएसटी अधिकारी सचिन जाधवर आत्महत्या प्रकरणात पाहायला मिळाली. गुन्हा दाखल करण्यासाठी पीडित कुटुंबाला ग्रामीण पोलीस ठाण्यात आंदोलन करावे लागले. आरोपीला अटक करावी यासाठी पोलीस अधीक्षक कार्यालयासमोर धरणे द्यावे लागले. त्यावेळी कुठेतरी पोलीस यंत्रणेला पाझर फुटला. असे एक ना अनेक प्रकरण बीड जिल्ह्यात चर्चेचा विषय बनलेले आहेत. प्रत्येक वेळी प्रत्येक घटनेत आंदोलनाच्या पावित्र्यात जनतेने राहायचं काय? ज्यांना कुठलाच आधार नाही अशा लोकांनी अन्याय सहन करायचा काय? तुमच्याकडून न्याय मिळणारच नाही का? असे एक ना अनेक प्रश्न सर्वसामान्य जनतेतून विचारले जात आहेत.
