बीड — महाराष्ट्रातील महिलांवरील आणि लहान मुलींवरील अत्याचारांच्या घटना दिवसेंदिवस गंभीर होत चालल्या आहेत. पुण्यातील नसरापूर येथील घटनेनंतर आता केज तालुक्यात एक अत्यंत संतापजनक प्रकार समोर आला आहे.
केज तालुक्यात ५० वर्षीय आजोबाने स्वतःच्याच ३ वर्षांच्या चिमुकल्या नातीवर अत्याचार केल्याची धक्कादायक घटना उघडकीस आली आहे. या घटनेमुळे संपूर्ण राज्यात संतापाची लाट उसळली आहे.
काय आहे नेमकं प्रकरण?
मिळालेल्या माहितीनुसार, पीडित मुलीची आई आपल्या ३ वर्षांच्या मुलीसह माहेरी आली होती. १६ ते २५ एप्रिल या कालावधीत संधी साधून आरोपी आजोबाने या चिमुकलीवर दोन-तीन वेळा अत्याचार केला.
घटनेनंतर मुलीला त्रास जाणवू लागल्याने तिने आईला हा प्रकार सांगितला. ही बाब समजताच आई हादरली आणि तात्काळ पोलीस ठाण्यात धाव घेतली.
पोलिसांची कारवाई
युसुफवडगाव पोलीस ठाण्यात तक्रार दाखल होताच पोलिसांनी तत्काळ गुन्हा नोंदवला. आरोपीविरुद्ध पॉक्सो ऍक्ट POCSO कायद्याच्या कलम ४ आणि ६ अंतर्गत गुन्हा दाखल करण्यात आला आहे.
‘पिंक पथका’चे पोलीस उपनिरीक्षक प्रकाश शेळके यांच्या पथकाने आरोपीला तात्काळ अटक केली आहे. सध्या आरोपीला न्यायालयात हजर करण्यात येणार असून पुढील तपास सुरू आहे.
वाढत्या घटनांमुळे चिंता
भोर, चाकण आणि आता बीड येथे घडलेल्या सलग घटनांमुळे राज्यात संतापाचे वातावरण निर्माण झाले आहे. नागरिकांकडून आरोपींना कठोर शिक्षा देण्याची मागणी होत आहे.
