खासदार बजरंग सोनवणे यांच्या आरोपांवर कारागृह प्रशासनाचा खुलासा; जिल्हा कारागृहात तब्बल २०६ सीसीटीव्ही कॅमेरे कार्यरत
बीड — विलास घुले हत्या प्रकरणात खासदार बजरंग सोनवणे यांच्या मुलाला अडकवण्यासाठी बीड जिल्हा कारागृहातून कट रचण्यात आल्याच्या आरोपांनी खळबळ उडाली होती. कारागृहात असलेल्या वाल्मिक कराडने मोबाईलवरून बाहेर संपर्क साधत कट रचल्याचा दावा खासदार सोनवणे यांनी केला होता. मात्र, बीड कारागृह प्रशासनाने हे सर्व आरोप फेटाळून लावत कारागृहातील सुरक्षा व्यवस्था आणि दूरध्वनी यंत्रणेची माहिती समोर ठेवली आहे.
कारागृह अधीक्षक रामराव चांदणे यांनी दिलेल्या माहितीनुसार, बीड जिल्हा कारागृहात सुरक्षेसाठी तब्बल २०६ सीसीटीव्ही कॅमेरे कार्यरत आहेत. विशेष म्हणजे वाल्मिक कराड ज्या कोठडीत आहे, त्या परिसरावर लक्ष ठेवण्यासाठी १२ हायटेक सीसीटीव्ही कॅमेरे तैनात करण्यात आले आहेत. त्यामुळे कराडने कारागृहातून चोरून मोबाईल वापरल्याचा दावा प्रशासनाने फेटाळला आहे.
कैद्यांना मनमानी क्रमांकावर फोन करता येत नाही
कारागृहात कैद्यांना नातेवाईकांशी संपर्क साधण्यासाठी नियमानुसार दूरध्वनीची सुविधा उपलब्ध आहे. प्रत्येक कैद्याला आठवड्यातून तीन वेळा, प्रत्येकी दहा मिनिटे, पूर्वनोंदणीकृत तीन नातेवाईकांशी बोलण्याची परवानगी असते. या सुविधेला कारागृह प्रशासनाकडून ‘ॲलन कॉल’ म्हटले जाते.
कैदी ज्या तीन नातेवाईकांशी बोलणार आहे, त्यांचे क्रमांक स्थानिक पोलिसांकडून प्रमाणित केले जातात. फोनची सुविधा उपलब्ध करून दिल्यानंतर यंत्रणेच्या पडद्यावर केवळ हेच तीन क्रमांक दिसतात. त्यामुळे चौथा क्रमांक थेट लावता येत नसल्याचे प्रशासनाने स्पष्ट केले.
जुन्या यंत्रणेतील त्रुटीही बंद
पूर्वीच्या यंत्रणेत मात्र तांत्रिक त्रुटी होती. कैद्याने नोंदणीकृत नातेवाईकाला फोन केल्यानंतर त्या नातेवाईकाने दुसऱ्या व्यक्तीला परिषद कॉलवर जोडल्यास कारागृह प्रशासनाचे त्यावर नियंत्रण राहत नव्हते. प्रशासनाच्या म्हणण्यानुसार, गेल्या चार महिन्यांपासून नव्या तंत्रज्ञानाच्या माध्यमातून ही परिषद कॉलची सुविधा पूर्णपणे बंद करण्यात आली आहे.
कैद्यांना दोन व्हिडिओ कॉलची सुविधा असून, त्यापैकी एक व्हिडिओ कॉल कमी करून प्रत्यक्ष भेटीची वेळ घेण्याचीही तरतूद आहे.
कराडच्या कोठडीवर विशेष नजर
बीड कारागृहातील एका कोठडीत साधारण ५० ते ५५ कैदी राहतात. अशा परिस्थितीत एखाद्या कैद्याने लपून मोबाईलचा वापर केल्यास इतर कैद्यांकडून त्याबाबत गदारोळ होण्याची शक्यता असते, असा युक्तिवाद प्रशासनाने केला आहे.
वाल्मिक कराडच्या कोठडीसमोरच १२ हायटेक कॅमेरे तैनात असल्याने त्याच्याकडून कारागृहात मोबाईल वापरल्याचा दावा तथ्यहीन असल्याचे कारागृह प्रशासनाने म्हटले आहे.
दोन उच्चस्तरीय चौकशीतही चूक आढळली नाही
यापूर्वी कारागृह प्रशासनाच्या कामकाजाबाबत दोन उच्चस्तरीय चौकशा झाल्या असून, त्यामध्ये प्रशासनाची कोणतीही चूक आढळली नसल्याचा दावा अधीक्षक रामराव चांदणे यांनी केला आहे. त्यामुळे कारागृहातून कट रचला गेला किंवा मोबाईलच्या माध्यमातून बाहेर संपर्क साधला गेला, हे आरोप प्रशासनाने स्पष्टपणे नाकारले आहेत.
खासदार बजरंग सोनवणे यांनी मात्र कारागृह प्रशासनाविरोधात कारवाईची मागणी केली आहे. त्यामुळे सोनवणे यांचे आरोप आणि कारागृह प्रशासनाकडून मांडण्यात आलेली सुरक्षा व्यवस्था यावरून आता या प्रकरणातील वस्तुस्थितीबाबत पुन्हा चर्चा सुरू झाली आहे.
