बीड — केज पोलिसांनी पोक्सो कायद्यांतर्गत अटक केलेल्या तरुणाचा जिल्हा रुग्णालयातील लॉकअपमध्ये संशयास्पद मृत्यू झाल्याची धक्कादायक घटना आज सकाळी उघडकीस आली आहे. या घटनेमुळे जिल्ह्यात एकच खळबळ उडाली असून, पोलिसांवर गंभीर आरोप करण्यात येत आहेत.
मृत तरुणाचे नाव आशिष अशोक धिवार (वय २७, रा. काळेगाव घाट, ता. केज) असे आहे. पोक्सो प्रकरणात अटक केल्यानंतर सुरुवातीला त्याला पोलीस कोठडी सुनावण्यात आली होती. त्यानंतर न्यायालयीन कोठडी मिळाल्याने त्याची रवानगी बीड जिल्हा कारागृहात करण्यात आली होती.
दरम्यान, काल सोमवारी सायंकाळी त्याची प्रकृती अचानक खालावल्याने त्याला जिल्हा रुग्णालयातील लॉकअप वॉर्डात उपचारासाठी दाखल करण्यात आले होते. रात्री उशिरा त्याचे नातेवाईकही भेटून गेले होते. मात्र आज सकाळी सुमारे ८.१५ वाजता त्याचा लॉकअपमध्येच मृत्यू झाला, अशी माहिती समोर आली आहे.
नातेवाईकांचा आरोप: पोलिसांकडून अमानुष मारहाण
या घटनेची माहिती मिळताच नातेवाईकांसह विविध संघटनांचे पदाधिकारी जिल्हा रुग्णालयात दाखल झाले.डीपीआयचे प्रदेशाध्यक्ष अजिंक्य चांदणे यांनी संताप व्यक्त करत गंभीर आरोप केले आहेत.दरम्यान पोलीस कोठडीत आशिषला अमानुष मारहाण करण्यात आली.घरातून पोलीस ठाण्यात आणतानाही मारहाण केली गेली
उपचारादरम्यान योग्य वैद्यकीय सेवा मिळाली नाही असा आरोप मृताच्या कुटुंबीयांकडून करण्यात येत असल्याचे चांदणे यांनी सांगितले.
रुग्णालय प्रशासनावरही प्रश्नचिन्ह
अजिंक्य चांदणे यांनी शल्यचिकित्सक डॉ. सतिशकुमार सोळंके यांची भेट घेऊन लेखी निवेदन दिले. त्यांनी लॉकअपमध्ये योग्य उपचार मिळाले का?,डॉक्टर व नर्स यांचे वर्तन संशयास्पद का होते?लॉकअप परिसरातील सीसीटीव्ही कॅमेरे बंद का होते?
या सर्व बाबींची सखोल चौकशी करून संबंधितांवर कारवाई करण्याची मागणी करण्यात आली आहे.
मृतदेह ताब्यात घेण्यास नकार
जोपर्यंत या प्रकरणातील दोषींवर गुन्हा दाखल होत नाही, तोपर्यंत मृतदेह ताब्यात घेणार नाही, अशी ठाम भूमिका नातेवाईक व संघटनांनी घेतली आहे. त्यामुळे परिस्थिती तणावपूर्ण बनली असून, प्रशासनावर दबाव वाढला आहे.
