बीडमध्ये सामाजिक संघटना आक्रमक; सीसीटीव्ही फुटेज तपासून आंदोलकांवरील गुन्हा मागे घेण्याचीही मागणी
बीड : महिलेला मारहाण केल्याचा आरोप करत शिवाजीनगर पोलीस ठाण्याचे पोलीस निरीक्षक शितलकुमार बल्लाळ यांना तात्काळ निलंबित करावे, अशी मागणी करण्यात आली आहे. तसेच पालकमंत्र्यांच्या दौऱ्यादरम्यान आंदोलकांवर दाखल करण्यात आलेला गुन्हा जिल्हाधिकारी कार्यालयातील सीसीटीव्ही फुटेज तपासून मागे घ्यावा, अशी मागणीही करण्यात आली आहे.
शिवशक्ती भिमशक्ती विचारमंचचे प्रदेशाध्यक्ष अविनाश उर्फ बाळासाहेब मोरे यांनी याबाबत जिल्हाधिकारी कार्यालयामार्फत राज्यपाल आणि महाराष्ट्र राज्य मानवाधिकार आयोगाकडे निवेदन साद केले आहे.
पालकमंत्र्याच्या दौऱ्याच्या दिवशी आंदोलन करणाऱ्यांवर दडपशाही करत असताना ज्यांचा या प्रकरणात संबंधही नाही अशा लोकांवरही एका पोलीस अधिकाऱ्याने दादागिरी केली. दरम्यान या स्त्री लंपट पोलीस अधिकाऱ्याला यावेळी लाथांचा प्रसाद मिळाल्याचे देखील सांगितलं जात आहे.
पोलीस निरीक्षक बल्लाळ यांच्या निलंबनाची मागणी
महिलेला मारहाण केल्याचा आरोप गंभीर असून, या प्रकरणाची निष्पक्ष चौकशी करून पोलीस निरीक्षक शितलकुमार बल्लाळ यांच्यावर तातडीने निलंबनाची कारवाई करावी, अशी मागणी निवेदनातून करण्यात आली आहे. संबंधित घटनेची सत्यता सीसीटीव्ही फुटेज आणि उपलब्ध पुराव्यांच्या आधारे तपासावी, अशी मागणीही करण्यात आली आहे.
याशिवाय पालकमंत्र्यांच्या दौऱ्याच्या दिवशी आंदोलन करणाऱ्या व्यक्तींवर दाखल करण्यात आलेला गुन्हा जिल्हाधिकारी कार्यालयातील सीसीटीव्ही फुटेज तपासून वस्तुस्थितीच्या आधारे मागे घ्यावा, अशी मागणी करण्यात आली आहे. आंदोलकांवर सूडबुद्धीने कारवाई करण्यात आल्याचा आरोप निवेदनात करण्यात आला आहे.
छाया पांचाळ, मुसकान शेख मृत्यू प्रकरणी कारवाईची मागणी
दरम्यान, बीड जिल्हा रुग्णालयात प्रसूतीदरम्यान छाया पांचाळ आणि मुसकान शेख यांचा मृत्यू झाल्याच्या प्रकरणाची सखोल चौकशी करण्याची मागणीही निवेदनात करण्यात आली आहे.
रुग्णालयातील डॉक्टर, नर्स आणि संबंधित कर्मचाऱ्यांच्या कथित हलगर्जीपणामुळे हे मृत्यू झाल्याचा आरोप करत, चौकशीत दोषी आढळणाऱ्यांवर सदोष मनुष्यवधासह इतर लागू कायद्यांनुसार गुन्हे दाखल करावेत, अशी मागणी करण्यात आली आहे.
तसेच तत्कालीन जिल्हा शल्यचिकित्सक डॉ. संजय राऊत, विद्यमान जिल्हा शल्यचिकित्सक डॉ. सतीश साळुंके आणि अतिरिक्त जिल्हा शल्यचिकित्सक डॉ. नागेश चव्हाण यांच्यासह संबंधित अधिकाऱ्यांच्या भूमिकेची चौकशी करून आवश्यक प्रशासकीय कारवाई करावी, अशी मागणी करण्यात आली आहे.
कारवाई न झाल्यास आंदोलनाचा इशारा
निवेदनातील मागण्यांवर प्रशासनाने तातडीने निर्णय घेतला नाही, तर विविध सामाजिक संघटनांना सोबत घेऊन लोकशाही मार्गाने तीव्र आंदोलन करण्यात येईल, असा इशारा अविनाश मोरे पाटील यांनी दिला आहे.
