तालखेड खून प्रकरणाचा १२ तासांत छडा; स्थानिक गुन्हे शाखेने आरोपीला केली अटक

माजलगाव (बीड) — माजलगाव ग्रामीण पोलीस ठाण्याच्या हद्दीतील तालखेड येथे झालेल्या खून प्रकरणाचा स्थानिक गुन्हे शाखेने अवघ्या १२ तासांत छडा लावत आरोपीला अटक केली आहे. मयत विकास दत्तात्रय वाघमोडे (वय ३३, रा. तालखेड) यांच्या खून प्रकरणात आदित्य बारवाळ याला ताब्यात घेऊन चौकशीनंतर अटक करण्यात आली आहे.
तालखेड गावातील विकास वाघमोडे यांचा मृतदेह २९ जून २०२६ रोजी त्यांच्या शेताजवळ आढळून आला होता. याप्रकरणी माजलगाव ग्रामीण पोलीस ठाण्यात अज्ञात आरोपीविरुद्ध गुन्हा क्रमांक २९३/२०२६, कलम १०३(१) भारतीय न्याय संहिता अंतर्गत खुनाचा गुन्हा दाखल करण्यात आला होता.
या गुन्ह्याचा समांतर तपास बीड स्थानिक गुन्हे शाखेकडून सुरू करण्यात आला होता. घटनास्थळी भेट देऊन तपासाची सूत्रे हाती घेतल्यानंतर पोलीस उपनिरीक्षक महेश विघ्ने यांच्या पथकाने आरोपीचा शोध सुरू केला.
तपासादरम्यान पोलिसांना माहिती मिळाली की, मयत विकास वाघमोडे यांचे काही दिवसांपूर्वी आदित्य बारवाळ याच्यासोबत वाद झाले होते. तसेच दोघांमध्ये झालेल्या भांडणातून आदित्यने विकासला जीवे मारण्याची धमकी दिल्याची माहिती समोर आली.
यानंतर पोलिसांनी आदित्य बारवाळ याला ताब्यात घेऊन चौकशी केली असता त्याने गुन्ह्याची कबुली दिल्याचे पोलिसांनी सांगितले. विकास वाघमोडे यांच्यासोबत झालेल्या जुन्या वादाचा राग मनात धरून हा प्रकार केल्याचे त्याने कबूल केले.
पोलिसांच्या माहितीनुसार, २८ जून २०२६ रोजी रात्री सुमारे ११ वाजण्याच्या सुमारास विकास यांचा पाठलाग करत त्यांना शेताकडे जाणाऱ्या रस्त्यावर अडवून हल्ला करण्यात आला. त्यानंतर आरोपीने घटनास्थळावरून निघून गेल्याचे तपासात निष्पन्न झाले.
आरोपी आदित्य बारवाळ याला पुढील कारवाईसाठी माजलगाव ग्रामीण पोलिसांच्या ताब्यात देण्यात आले आहे. स्थानिक गुन्हे शाखेने अज्ञात आरोपीचा शोध घेऊन अवघ्या १२ तासांत या खून प्रकरणाचा उलगडा केला आहे.
ही कारवाई पोलीस अधीक्षक नवनीत काँवत, अप्पर पोलीस अधीक्षक चेतना तिडके, पोलीस उपअधीक्षक ऋषीकेश शिंदे यांच्या मार्गदर्शनाखाली करण्यात आली.
स्थानिक गुन्हे शाखेचे पोलीस निरीक्षक शिवाजी बंटेवाड, माजलगाव ग्रामीण पोलीस ठाण्याचे प्रभारी पोलीस निरीक्षक विजयकुमार रामोड, पोउपनि महेश विघ्ने, तसेच पोहेकॉ बप्पासाहेब घोडके, महेश जोगदंड, जफर पठाण, दिलीप गित्ते आणि चापोहेकॉ गणेश मराडे यांनी ही कामगिरी पार पाडली.