सांगली — बीडच्या जेलमध्ये सर्वच महापुरुषांचे फोटो काढून टाकले असून त्या ठिकाणी बायबलचे श्लोक लिहित धर्मांतराचा प्रयत्न केला जात असल्याचा आरोप भाजपा आमदार गोपीचंद पडळकर यांनी कारागृह अधीक्षक पेट्रस जोसेफ गायकवाड वर केला आहे.
बीड मधील जेल या ना त्या कारणामुळे वादग्रस्त ठरत आहे. आता जेलमधील कैद्यांचा धर्मांतर करण्याचा प्रयत्न केला जात असल्याचा आरोपाने खळबळ माजली आहे. जेलमधील कीर्तन बंद करण्यात आलं. तर कैद्यांना धर्मांतरासाठी लाखो रुपयांचे आमिष दाखवले जात असल्याचा आरोप पडळकरांनी केला. आमदार गोपीचंद पडळकर आणि आमदार सदाभाऊ खोत यांनी मुख्यमंत्र्यांची भेट घेतली आणि या प्रकरणाची तपासणी करण्याची मागणी केली.
बीडच्या तुरुंगात कैद्यांच्या धर्मांतरणाचा प्रयत्न

गोपीचंद पडळकर म्हणाले की, “बीडचे जे तुरुंग अधिकारी आहेत तिकडे ते धर्मांतराचं काम करत आहेत. तिकडे छत्रपती शिवाजी महाराज आणि गणपतीची मूर्ती होती, ती काढून टाकलेली आहे. बाबासाहेब आंबेडकरांचा फोटो, महात्मा गांधींचा फोटो काढून टाकलेला आहे. ते सर्व फोटो एका खोलीत टाकलेले आहेत. जेलमध्ये सगळे बायबल मधले श्लोक लिहिले आहेत. कैदी जेलमध्ये भजन कीर्तन करायचे, ते भजन कीर्तन पूर्णपणे बंद करून टाकलेल आहे. तसेच तिकडे त्या अधिकाऱ्याला भेटायला एक पादरी भेटायला येतो. कैद्यांना तुम्ही धर्मांतर करा तुम्हाला लाखो रुपये देतो अशा प्रकारच आमिष दाखवत धर्मांतर घडवून आणण्याची भूमिका तुरुंग अधिकारी घेत आहेत.”
बीडमध्ये सुरू असलेल्या या सर्व प्रकाराची माहिती मुख्यमंत्र्यांना दिली असून त्याची चौकशी करावी आणि तुरुंग अधिकाऱ्याला बडतर्फ करावं अशी मागणी केली आहे. तुरुंग अधिकाऱ्यावर गुन्हा दाखल करावा आणि सीसीटीव्हीच्या आधारे तपास करावा तसेच पेट्रस गायकवाडला बडतर्फ करून गुन्हा दाखल करावा अशी मागणी केली असल्याची माहिती आमदार गोपीचंद पडळकरांनी दिली.

केज — घराशेजारील शेतात आई वडील गेले असता घरी असलेली आर्या अमोल बजगुडे ही सात वर्षीय मुलगी उकिरड्यासाठी खोदलेल्या खड्ड्यातील पाण्यात बुडून तिचा मृत्यू झाल्याची दुर्दैवी घटना चिंचोली माळी येथील बजगुडे वस्तीवर रविवारी घडली.
या पहिलीत शिकणाऱ्या चिमुकलीचा दुर्दैवी मृत्यू झाला.
पहिली वर्गात शिकत असलेल्या
आर्याचे आई-वडील, अमोल बजगुडे आणि त्यांची पत्नी, हे दोघेही रविवारी शाळेला सुट्टी असल्याने आर्याला घरी ठेवून घराशेजारील शेतात कामासाठी गेले होते. संध्याकाळी पाच वाजता आर्या खेळता खेळता घराजवळील उकिरड्यासाठी खोदलेल्या खड्ड्याजवळ गेली. या खड्यात पावसाचे पाणी साचले होते. अचानक, आर्याचा या खड्ड्यात तोल गेला आणि ती साचलेल्या पाण्यात पडली. बराच वेळ होऊनही आर्या न दिसल्याने आईने घरी धाव घेतली. तेव्हा आर्या खड्यातील पाण्यात पडल्याचे त्यांच्या लक्षात आले.दरम्यान आर्याच्या आईने तात्काळ तिला पाण्यातून बाहेर काढले. नाका-तोंडात पाणी गेल्यामुळे तिची प्रकृती चिंताजनक होती. घाबरलेल्या आई-वडिलांनी क्षणाचाही विलंब न करता तिला केज येथील उपजिल्हा रुग्णालयात दाखल केले. मात्र, उपचारापूर्वीच नाका-तोंडात पाणी जाऊन आर्याचा मृत्यू झाल्याचे वैद्यकीय अधिकाऱ्यांनी घोषित केले. पहिलीच्या वर्गात शिक्षण घेत असलेल्या या चिमुकलीच्या अशा अचानक जाण्याने बजगुडे कुटुंबावर दु:खाचा डोंगर कोसळला आहे. तसेच, बजगुडे वस्तीवर आणि चिंचोलीमाळी गावात सर्वत्र हळहळ व्यक्त करण्यात येत आहे. या प्रकरणी आकस्मिक मृत्यूची नोंद करण्यात आली आहे.

अंबाजोगाई — सांगली येथे ३० टन हळद ट्रक मधून घेऊन जात असताना  तब्बल ३७ लाख ८१ हजार रुपयांची हळद स्वतः ची लंपास करून  चोरी झाल्याचा कांगावा ट्रक मालक व चालकावर अंबाजोगाई ग्रामीण पोलिस ठाण्यात गुन्हा नोंदविण्यात आला आहे. ही घटना ३० सप्टेंबर ते २ ऑक्टोबर २०२५ या कालावधीत लोखंडी सावरगाव, कळंब फाटा परिसरात चोरी झाल्याचं ट्रक चालक व मालक यांनी खोटंच सांगितलं होतं.

प्रितेश दुर्गाप्रसाद सोनी हे छत्रपती संभाजीनगर येथील हे दुर्वा कमोडीटी प्रा.लि. या कंपनीचे संचालक असून, ते सांगली येथे हळद दळून विक्री करतात. त्यांनी दि.३० सप्टेंबर २०२५ रोजी राधा सर्वेश्वर कंपनी सोलापूर मार्फत ३० टन हळद खरेदी करून स्टार अॅग्रो वेअरहाऊस, लिंबाळा (एमआयडीसी, हिंगोली) येथून सांगलीकडे पाठवण्यासाठी ट्रक क्रमांक एमएच २६ एडी २९३५ या वाहनाद्वारे वाहतूक ठरवली होती. ट्रक मालक नदीम खान मुजाहेद खान (रा. अपना कॉर्नर, परभणी) आणि चालक सय्यद अजगर सय्यद सज्जान (रा. दर्गारोड, परभणी) यांच्याकडे माल ताब्यात देण्यात आला. मात्र, सांगलीला पोहोचण्याआधी नदीमने सोनी यांना कळवले की अंबाजोगाईजवळ कळंब फाटा येथे अज्ञात लोकांनी ट्रक लुटल्याची घटना घडली आहे. त्यानंतर सोनी घटनास्थळी पोहोचले असता ट्रकमध्ये फक्त ३० पोते शिल्लक असून उर्वरित ५७० पोते हळद गायब असल्याचे दिसून आले. चौकशीत चालक सय्यद अजगरने कबुली दिली की ट्रक कोणत्याही चोरट्यांनी चोरलेला नसून ट्रकमालक नदीम खान यांनी संगणमत करून ट्रकमधील हळद कोठेतरी विल्हेवाट लावली व पोलीस ठाण्यात खोटी तक्रार दिली. या प्रकरणी अंबाजोगाई ग्रामीण पोलिस ठाण्यात गुन्हा दाखल करण्यात आला आहे. प्रकरणाचा तपास सपोनि जगताप हे करीत आहेत.

परभणी — शाळेची सहल गेलेली असताना शिक्षकाने विद्यार्थीनीचा कपडे बदलताना व्हिडिओ काढला. हा व्हिडिओ व्हायरल करण्याची धमकी देत अल्पवयीन मुलीवर शिक्षकाने अत्याचार केला. दरम्यान याच पीडित मुलीचा आणखी एका मुलांने AI(आर्टिफिशियल इंटेलिजन्स) चा वापर करून अश्लील व्हिडिओ तयार केला तो व्हायरल करण्याची धमकी देत आपल्या मित्रासह लैंगिक अत्याचार केल्याची खळबळजनक घटना सेलू शहरात घडली आहे.
याबाबत मिळालेल्या माहितीनुसार,संतोष मालसवाड हा सेलू शहरातील नूतन विद्यालयात शिक्षक आहे. या शाळेची सहल रायगड आणि महाबळेश्वर येथे गेली होती. या दरम्यान संतोष याने एका अल्पवयीन विद्यार्थिनीचा कपडे बदलताना अश्लील व्हिडिओ काढला. हा व्हिडिओ सोशल मीडियावर व्हायरल करण्याची धमकी देत तिच्यावर अत्याचार केले.
दरम्यान पीडित मुलगी ट्युशन ला गेलेली असताना एका अल्पवयीन मुलाने त्याच्या मित्रांसह तिथे येऊन तिचा फोटो काढला. हा फोटो AI तंत्रज्ञानाद्वारे अश्लील करून तो फोटो समाज माध्यमातून व्हायरल करून बदनामी करण्याची धमकी दिली. आपल्या मित्रांना सोबत घेत या तरुणाने देखील पीडितेवर अत्याचार केले. तरुणीने हे प्रकरण कुटुंबियांना सांगताच कुटुंबीयांनी पोलीस ठाण्यात धाव घेत तक्रार दाखल केली आहे.या प्रकरणात तरुणीने दिलेल्या फिर्यादी नुसार, आरोपी शिक्षक संतोष मसलटवाड,अल्पवयीन तरुण त्याचा मित्र नितीन परदेशी व इतर एक जण अशा चार जणांवर सेलू पोलीस ठाण्यात गुन्हा दाखल करण्यात आला आहे. कलम ६४(२)(I)(M)(F)75,78,351(2)(3),3(5)BNS सह कलम 4,8,9 (L)(F)10,12,पोक्सो एक्ट २०१२ अन्वये गुन्हा दाखल करण्यात आला असून सर्वांना अटक करण्यात आलेली आहे. दरम्यान या घटनेने सेलू सह परभणी संताप व्यक्त केला जात आहे.