बीड — पोलीस अधीक्षक बारगळ यांनी पदभार घेतल्यानंतर जिल्ह्यात कायद्याचं “अविनाशी“राज्य असल्याचं दाखवून द्यायला सुरुवात केली आहे. आज पोलिसांनी वेगवेगळ्या ठिकाणी छापा मारून 26 लाखाची रोकड जप्त करत हवाला रॅकेटचं कंबरड मोडण्यात यश मिळवलं.

बीड शहरात मोठ्या प्रमाणात हवाला व्यवहार चालत असून मोठी आर्थिक उलाढाल या मार्फत होत असते अशी खात्रीशीर माहिती पोलीसांना मिळाली होती. यामुळे अशा व्यवहारांना चाप लावण्यासाठी पोलीस अधीक्षक अविनाश बारगळ यांचे आदेशावरून खास पथक तयार करण्यात आले. पथकाने तीन ठिकाणी छापेमारी केली.यामध्ये छापा कबाड गल्लीमध्ये पहिला तर दुसरा छापा सारडा कॅपिटल येथे, तर तिसरा छापा जालना रोड येथील वीर हॉस्पिटलच्या बाजूला असलेल्या ठिकाणावर मारण्यात आला. तिन्ही ठिकाणाहून एकूण 26 लाख रुपये जप्त केले असून सदर पैसे कुठून आले याची सखोल चौकशी बीड शहर पोलीस करित आहेत.
पैशाची कुठलीही खात्रीशीर सुरक्षितता नसतांना, यामध्ये काही जर गैरव्यवहार झाला किंवा पैशांची चोरी झाली याबद्दल सुरक्षा नसताना अशा प्रकारचे व्यवहार होत आहे आणि यामध्ये शासनाचा महसूल बुडवणे आदी कामामुळे शासनाचे नुकसान होत आहे. यासाठी सदरील छापा हा महत्त्वाचा असल्याची माहिती पोलीस निरीक्षक शितलकुमार बल्लाळ यांनी दिली.
सदरील शहरात हवाला व्यवहारावर तीन ठिकाणी छापे टाकून 26 लाखाची रोकड जप्त केली पोलीस अधीक्षक अविनाश बारगळ, अप्पर पोलीस अधीक्षक,सचिन पांडकर, यांच्या मार्गदर्शनाखाली सपोनि बाळराजे दराडे, बाबा राठोड, पोलीस उपनिरीक्षक काकरवाल, कुकलारे, राठोड, शेख, निर्धार म्हेत्रे कांबळे, परजणे, शिरसाठ यांनी केली आहे.

बीड — जिजाऊ माँ साहेब मल्टीस्टेटच्या घोटाळ्याचा प्रमुख आरोपी असलेला बबन शिंदे यास बीड पोलिसांना पकडण्यात यश आले आहे.उत्तर प्रदेशमधील मथुरा वृंदावन परिसरातून बबन शिंदेला अटक करण्यात आली आहे. जिजाऊ मल्टीस्टेट प्रकरणात गुन्हा दाखल झाल्यापासून बबन शिंदे पोलिसांना चकमा देत फरार होता.

बीडमध्ये जिजाऊ मॉ साहेब मल्टीस्टेट घोटाळा प्रकरणी बीड जिल्ह्यात 3 तर धाराशिव जिल्ह्यात 2 गुन्हे बबन शिंदे याच्या विरोधात दाखल आहेत. मुख्य आरोपी असलेला बबन शिंदे गेल्या वर्षीच्या जुलै महिन्यापासून फरार झाला होता. गुन्हे दाखल असल्यापासून पोलीस त्याचा ठिकठिकाणी शोध घेत होते. सिम कार्ड बदलत राहण्याची ठिकाणे देखील बदलल्याने पोलिसांना त्याला पकडण्यात अपयश येत होते.मात्र पोलिसांना गुप्त माहिती मिळाल्यावरून पडताळणी केल्यानंतर बबन शिंदे हा मथुरा वृंदावन भागामध्ये वेश बदलून राहत असल्याचे दिसून आले. त्यानंतर आर्थिक गुन्हे शाखेच्या पथकाने सापळा रचून मोठ्या शिताफिने शिंदे ला पकडले.

केज — शहरातील मुख्य रस्त्यावर सोनार गल्लीत चार चाकी मधून आलेल्या तिघांनी शाळेत चाललेल्या विद्यार्थ्याचे अपहरण करण्याचा प्रयत्न केला. परंतु काही तरुणांनी हा प्रयत्न हाणून पाडला. अपहरण करणारा एक जण हाती लागला असून दोघे पळून जाण्यात यशस्वी झाले. या घटनेने शहरात खळबळ उडाली आहे.

पकडलेल्या त्या व्यक्तीला पोलिसांच्या ताब्यात दिले असून नेमका हा प्रकार काय ? हे तपासातून समोर येईल. मेन रोडने सकाळी १० च्या सुमारास एक विद्यार्थी सोनार गल्लीतून शाळेला जात होता. त्यावेळी अचानक एक चारचाकी वाहन आले. ते वाहन मुलाजवळ येऊन थांबले काही समजण्याच्या आत अकरा वर्षे वयाच्या विद्यार्थ्याला उचलून वाहनात टाकण्याचा प्रयत्न केला असता घडलेल्या या अनुचित प्रकाराने विद्यार्थी घाबरुन ओरडू लागला हे पाहून बाजुला उभी असलेल्या महिलेनेही आरडाओरडा केली.यावेळी नागरिकांनी धाव घेतली तर दोघांनी दुचाकी चारचाकीच्या समोर लावली असता त्यांना पळता आले नाही. परंतु झटापटीत दोघे पळून जाण्यात यशस्वी झाले तर एकजण जमावाच्या हाती लागला. त्यास जमावाने चांगलाच चोप दिला. दरम्यान पकडलेला आरोपी हा गेल्या चार-पाच दिवसापासून पाळतीवर असल्याचं विद्यार्थ्याच्या पालकानी म्हटलं आहे.
भरदिवसा रहदारीच्या ठिकाणी ही घटना घडल्याने केज शहरात खळबळ उडाली आहे. या पकडलेल्या एका अपहरणकर्त्याला पोलिसांच्या ताब्यात दिले आहे. हा प्रकार नेमका काय ? हे पोलीस तपासात निष्पन्न होईल. पण शहरात मूल चोरणारी टोळी पकडल्याची जोरदार चर्चा सुरू झाली आहे.
मात्र पोलिसांनी हा सिंधी विकणारा असून मुलं चोरणारा नसल्याचं खाजगीत सांगत असल्याने पोलीस तपासावर प्रश्नचिन्ह निर्माण होऊ लागले आहे. नागरिकांनी घाबरून जाऊ नये असे आवाहन केज पोलिसांतर्फे करण्यात आले आहे.