बीड –“घरकुल उभं राहावं , भिंतींना आधार मिळावा ,गरीबाच्या घरावर वाळूचा भार न पडावा…”या भावनेतून राज्य शासनाने राबविलेली मोफत वाळू वितरणाची योजना बीड जिल्ह्यात प्रभावीपणे आकार घेत असल्याचे स्पष्ट झाले आहे .
राज्याचे मुख्यमंत्री देवेंद्र फडणवीस , महसूल मंत्री चंद्रशेखर बावनकुळे यांच्या मार्गदर्शनाखाली तयार करण्यात आलेल्या वाळू धोरणाची अंमलबजावणी बीड जिल्ह्यात काटेकोरपणे सुरू असून, ग्रामीण भागातील घरकुल लाभार्थ्यांना थेट दिलासा देण्याचा प्रशासनाचा प्रयत्न प्रत्यक्ष जमिनीवर उतरल्याचे दिसून येत आहे.
छत्रपती संभाजीनगर विभागाचे विभागीय आयुक्त जितेंद्र पापळकर हे वेळोवेळी विभागस्तरावर आढावा घेत मार्गदर्शन करत असून, बीड जिल्ह्याचे जिल्हाधिकारी विवेक जॉन्सन यांनी जिल्हास्तरावर संपूर्ण प्रक्रियेवर लक्ष ठेवत सर्व उपविभागीय अधिकारी व तहसीलदार यांना स्पष्ट सूचना दिल्या आहेत. बीडचे अपर जिल्हाधिकारी हरीश धार्मिक यांनी मंडळ अधिकारी व ग्राम महसूल अधिकारी यांच्याशी सातत्याने संपर्क साधून वाळू उपलब्धता, प्रस्ताव व वितरण याबाबत समन्वय साधला आहे.
बीड तालुक्यात घरकुल योजनेंतर्गत एकूण २५ हजार ३५३ लाभार्थी उद्दिष्ट असून त्यापैकी २३ हजार ३८६ घरकुलांना मंजुरी मिळाली आहे. पहिल्या टप्प्यात १९ हजार ८७५ लाभार्थ्यांना प्रत्यक्ष लाभ मिळालेला असून सध्या सुमारे ७ हजार १०० घरकुलांचे काम प्रगतीपथावर आहे. एवढ्या मोठ्या प्रमाणावर सुरू असलेल्या घरकुल बांधकामासाठी वाळू ही अत्यावश्यक बाब असल्याने मोफत वाळू वितरण योजना ग्रामीण भागासाठी अत्यंत महत्त्वाची ठरली आहे.
बीड तालुक्यात दहा वाळू घाट निश्चित –

बीड तालुक्यासाठी दहा वाळू घाट निश्चित करण्यात आले असून सिंधफणा नदीपात्रातील विविध ठिकाणी हे घाट आहेत. रंजेगाव, रामगाव, बऱ्हाणपूर, आडगाव, कुक्कडगाव, खुंड्रस , साक्षाळ पिंपरी आदी ठिकाणी वाळू उपलब्ध करून देण्यात येणार आहे. याशिवाय अंधापुरी, पिंपळादेवी, नागापूर बु., खांडे पारगाव , पारगाव सिरस या गावांमध्ये नव्याने नोंदणी केलेले प्लॉट असून येथून वाळू उपलब्ध करून देण्यात येत आहे .
खांडे पारगाव येथे प्रत्यक्ष वितरण

या पार्श्वभूमीवर बुधवार दिनांक ४ फेब्रुवारी रोजी बीड तालुक्यातील अथरवन पिंपरी जवळील टुकूर नदीपात्रात खांडे पारगाव येथील घरकुल लाभार्थ्यांना मोफत वाळूचे वितरण करण्यात आले. बीडचे तहसीलदार चंद्रकांत शेळके यांनी उपविभागीय अधिकारी कविता जाधव यांच्या मार्गदर्शनाखाली या उपक्रमाची प्रत्यक्ष अंमलबजावणी केली.
या वेळी घरकुल लाभार्थी मधुकर तुकाराम सपकाळ व विकास बाबुराव आमटे यांना तहसीलदार चंद्रकांत शेळके यांच्या उपस्थितीत मोफत वाळू वाटप करण्यात आले. २५ पैकी १२ लाभार्थ्यांना वाळू वाटप पूर्ण – याबाबत माहिती देताना ग्राम महसूल अधिकारी अक्षय ढोपे यांनी सांगितले की, आतापर्यंत एकूण २५ घरकुल लाभार्थ्यांपैकी १२ लाभार्थ्यांना मोफत वाळूचे वितरण पूर्ण झाले असून उर्वरित लाभार्थ्यांनाही टप्प्याटप्प्याने वाळू दिली जाणार आहे . सध्या सुमारे ६०० ब्रास वाळूचे वितरण होणार असून, ज्या ठिकाणी वाळू उपलब्ध आहे तेथील प्रस्ताव तात्काळ दाखल करण्याच्या सूचना ग्राम महसूल अधिकारी व ग्रामपंचायत अधिकारी यांना देण्यात आल्या आहेत.
लोकप्रतिनिधी व ग्रामस्थांचा सहभाग 

या वेळी खांडे पारगाव गावचे उपसरपंच अनील आबा आमटे , दत्ता सुरवसे, नवनाथ बापू सपकाळ, रवींद्र सपकाळ तसेच अथरवन पिंपरी येथील उपसरपंच अशोक शिंदे, प्रवीण शिंदे, अमोल शिंदे यांच्यासह घरकुल लाभार्थी मोठ्या संख्येने उपस्थित होते. सर्वांनी मिळून प्रशासनास सहकार्य करत हा उपक्रम यशस्वी केला.
यावेळी बोलताना तहसीलदार चंद्रकांत शेळके म्हणाले,
“ बीड तालुक्यातील लहान नद्या, ओढे, नाले यामध्ये नैसर्गिकरित्या साठणारी वाळू शासन धोरणानुसार घरकुलधारकांना मोफत देण्यात येणार आहे. यामुळे अवैध वाळू उपसा थांबेल आणि गरजू नागरिकांना थेट लाभ मिळेल. ”
“घरकुलासाठी वाळू मिळवणे आमच्यासाठी मोठी अडचण होती. प्रशासनाने थेट नदीपात्रातून वाळू उपलब्ध करून दिल्यामुळे आमचा खर्च वाचला,” अशी प्रतिक्रिया एका लाभार्थ्याने व्यक्त केली. गावकऱ्यांनी प्रशासन व तहसीलदार चंद्रकांत शेळके यांचे आभार मानले.
ग्रामीण घरकुलांसाठी दिलासादायक उपक्रम – एकीकडे अवैध वाळू वाहतुकीवर कठोर कारवाई आणि दुसरीकडे शासन निर्णयानुसार पारदर्शक पद्धतीने मोफत वाळू वाटप — या दोन्ही बाबींचा समतोल राखत बीड जिल्ह्यात प्रशासन काम करत असल्याचे या उपक्रमातून स्पष्ट झाले आहे.
“घर बांधणं स्वप्न नाही ,योग्य हात मिळाले तर सत्य होतं…”ग्रामीण भागातील घरकुलधारकांसाठी हा उपक्रम निश्चितच दिलासादायक ठरणार असून, पुढील काळातही शासन धोरणानुसार अशीच कार्यवाही सुरू राहणार असल्याचा विश्वास व्यक्त करण्यात येत आहे

गैरप्रकार करणारांवर अजामीन पात्र गुन्हे दाखल करणार — जॉन्सन

बीड — जिल्ह्यात फेब्रुवारी–मार्च 2026 दरम्यान होणाऱ्या इयत्ता दहावी व बारावीच्या परीक्षा कॉपीमुक्त होण्यासाठी जिल्हा प्रशासनाने कडक पाऊल उचलण्याचा निर्णय घेतला आहे. जिल्हाधिकारी विवेक जॉन्सन यांनी या संदर्भात संबंधित यंत्रणांना स्पष्ट निर्देश दिले असून, परीक्षांमध्ये कोणताही गैरप्रकार सहन केला जाणार नसल्याचा इशारा दिला आहे.
परीक्षांचा पारदर्शकपणा राखणे, विद्यार्थ्यांची खरी गुणवत्ता समोर येणे आणि शिक्षण व्यवस्थेवरील विश्वास अधिक दृढ करणे, या उद्देशाने हे कॉपीमुक्त अभियान प्रभावीपणे राबवण्यात येणार आहे. त्यासाठी प्रत्येक परीक्षा केंद्रावरील प्रत्येक वर्गखोलीत सीसीटीव्ही कॅमेरे कार्यान्वित करण्यात येणार असून, संवेदनशील परीक्षा केंद्रांवर आवाज रेकॉर्डिंगसह सीसीटीव्हीची व्यवस्था करण्यात येणार आहे. जिल्हास्तरीय कंट्रोल रूमच्या माध्यमातून सर्व परीक्षा केंद्रांवरील चित्रणावर थेट नजर ठेवण्यात येणार आहे.
संवेदनशील परीक्षा केंद्रांवरील केंद्रसंचालक व पर्यवेक्षकांची अदलाबदल करण्यात येणार असून, परीक्षा केंद्रावर प्रवेश करताना विद्यार्थ्यांना ओळखपत्र सक्तीचे करण्यात आले आहे. कोणत्याही अनधिकृत व्यक्तीस परीक्षा केंद्रात प्रवेश दिला जाणार नाही. या नियमांचे उल्लंघन करणाऱ्यांवर कठोर कारवाई करण्यात येणार असल्याचे स्पष्ट केले आहे. महत्त्वाच्या विषयांच्या परीक्षांच्या दिवशी भरारी पथक व बैठे पथक सक्रिय राहणार असून, परीक्षा केंद्र परिसरावर ड्रोन कॅमेऱ्यांच्या माध्यमातून लक्ष ठेवण्यात येणार आहे. तसेच परीक्षा केंद्रापासून पाचशे मीटर परिसरातील झेरॉक्स सेंटर परीक्षा कालावधीत बंद ठेवण्याचे आदेश देण्यात आले आहेत. परीक्षेदरम्यान गैरप्रकार करणाऱ्यांवर दखलपात्र व अजामीनपात्र गुन्हे दाखल करण्यात येणार असल्याचेही जिल्हाधिकारी यांनी स्पष्ट केले आहे.

जिल्हा स्तरीय दक्षता समिती गठीत

जिल्हाधिकारी विवेक जॉन्सन अध्यक्ष, पोलीस अधिक्षक नवीनीत कॉवत सदस्य, मुख्य कार्यकारी अधिकारी, जितिन रहेमान सदस्य, कार्यकारी अभियंता, महाराष्ट्र राज्य विद्युत वितरण सदस्य, जिल्हा शिक्षण व प्रशिक्षण संस्थेचे प्राचार्य सदस्य, प्राथमिक शिक्षणाधिकारी सदस्य योजना शिक्षणाधिकारी सदस्य, माध्यमिक शिक्षणाधिकारी सदस्य सचिव आहेत. दरम्यान कॉपीमुक्त वातावरणात परीक्षा झाल्यास विद्यार्थ्यांच्या गुणवत्तेत निश्चितच वाढ होईल, असे मत व्यक्त करत जिल्हाधिकारी विवेक जॉन्सन यांनी पालक, शिक्षक, अधिकारी व नागरिकांनी या अभियानात सहकार्य करावे, असे आवाहन केले आहे.

श्री क्षेत्र राक्षसभुवन (शनिचे) येथे झाले अस्थीचे विसर्जन

गेवराई — बीड येथील राष्ट्रवादी काँग्रेस पक्षाच्या जिल्हा कार्यालयात महाराष्ट्राचे उपमुख्यमंत्री स्व.अजितदादा पवार यांचा अस्थीकलशन दर्शनासाठी ठेवण्यात आला होता. यावेळी शोकाकुल वातावरणात अस्थीकलशाचे दर्शन घेताना लोकप्रतिनिधी, पदाधिकारी, कार्यकर्ते आणि बीडकरांचे डोळे पानावले. यावेळी अतिशय जड अंतःकरणाने उपस्थितांनी अस्थीकलशाचे दर्शन घेताना माना झुकवल्या.

दुपारी २ वाजेपर्यंत राष्ट्रवादी कार्यालयात अस्थीकलश ठेवण्यात आला होता. त्यानंतर आ. विजयसिंह पंडित अस्थीकलश घेऊन श्री क्षेत्र राक्षसभुवन (शनिचे) येथे रवाना झाले. शोकाकुल वातावरणात अस्थी विसर्जन होताना उपस्थितांनी अजितदादा अमर रहेच्या घोषणा दिल्या. आपला लाडका नेता आपल्याला सोडून गेल्याची भावना प्रत्येकाने यावेळी व्यक्त केल्या.

यावेळी बोलताना आ. विजयसिंह पंडित म्हणाले की, महाराष्ट्राचे लोकप्रिय उपमुख्यमंत्री स्व.अजितदादा पवार यांचे अकस्मिक दुःखन निधन झाले. स्व.अजितदादांच्या जाण्याने महाराष्ट्रावर दुःखाचा डोंगर कोसळला आहे. आजही स्व.अजितदादा पवार हे आपल्यात नाहीत हे मन मानायला तयार नाही. स्पष्टोक्तेपणा, धाडसी निर्णय आणि कामावरचा विश्वास ही दादांची खरी ओळख होती. संकाटातही न डगमगता राज्याच्या विकासासाठी झटणारा नेता म्हणून अजितदादा कायम स्मरणात राहतील. स्व.दादांच्या नेतृत्वाखाली बीड शहरातील जनतेने नगर पालिका निवडणुकीत भरभरून आशिर्वाद दिले. बारामतीसारखा बीड शहराचा विकास करण्याचा संकल्प आदरणीय दादांनी केला होता, असे दादा बीडकरांच्या कायम स्मरणात राहावेत यासाठी शहरात स्व.अजितदादा पवार यांचा पुर्णाकृती पुतळा उभारण्याचा संकल्प आम्ही केला असेही ते यावेळी म्हणाले.

दुपारी २ वाजेपर्यंत राष्ट्रवादी कार्यालयात स्व.दादांचा अस्थीकलश दर्शनासाठी ठेवण्यात आला होता. त्यानंतर आ. विजयसिंह पंडित अस्थीकलश घेऊन श्री क्षेत्र राक्षसभुवन (शनिचे) येथे रवाना झाले. यावेळी उपस्थितांनी अजितदादा अमर रहे, एकच वादा अजितदादा अशा घोषणा दिल्या. याप्रसंगी भावनिक वातावरण बनले होते. यावेळी राष्ट्रवादी काँग्रेस पक्षाचे प्रदेश सरचिटणीस माजी आमदार अमरसिंह पंडित, आ. विजयसिंह पंडित, आ. धनंजय मुंडे, आ. प्रकाश सोळंके, माजी आमदार बाळासाहेब आजबे, भिमराव धोंडे, संजय दौंड, रमेश आडसकर, बाजीराव धर्माधिकारी, माजी नगराध्यक्ष राजकिशोर मोदी, नगराध्यक्षा श्रीमती प्रेमलता पारवे, उपनगराध्यक्ष विनोद मुळूक, राष्ट्रवादी ओबीसी सेलचे कल्याण आखाडे, राष्ट्रवादीचे जिल्हाध्यक्ष राजेश्वर चव्हाण, सभापती शेख निजाम, दिलीप गोरे, अमर नाईकवाडे, संपादक शेख मुजीब, शेख तय्यब, बळीराम गवते, जैतुल्ला खान, जकी सौदागर, बाळासाहेब गुंजाळ, संजय उडान, अशोक हिंगे, प्रज्ञाताई खोसरे, ॲड.राजेंद्र राऊत, सुनिल पाटील, राजाभाऊ औताडे, अयुब पठाण, वैजिनाथ साळुंके, कल्याण आबुज, भागवत तावरे, भाऊसाहेब नाटकर, जगन्नाथ काळे यांच्यासह राष्ट्रवादी काँग्रेसचे सर्व पदाधिकारी, कार्यकर्ते तसेच बीड शहरातील अजितदादाप्रेमी नागरीक मोठ्या संख्येने उपस्थित होते.