भ्रष्टाचारात समावेश असलेल्या प्रत्येकावर कारवाईसाठी पाठपुरावा करणार- आ.संदीप क्षीरसागर

बीड — बीड विधानसभा मतदारसंघात महात्मा गांधी राष्ट्रीय ग्रामीण रोजगार हमी योजना म्हणजेच नरेगाच्या अंतर्गत अनेक निकृष्ट दर्जाची आणि बोगस कामे झाली आहेत. शासकीय अधिकारी यांच्याशी संगनमत करून अनेकांनी यामध्ये मोठा भ्रष्टाचार केलेला आहे. या सर्व प्रकरणांचे आता आ.संदीप क्षीरसागर यांनी पोस्टमार्टम करायला सुरुवात केली आहे, म्हणजेच झालेल्या कामांची स्वतः आ.संदीप क्षीरसागर जाऊन पाहणी करत आहेत. नरेगा अंतर्गत झालेली कामे अत्यंत निकृष्ट आणि काही ठिकाणी तर चक्क बोगस असल्याचे आता स्पष्ट झाले आहे.

बीड विधानसभा मतदारसंघातील बीड आणि शिरूर कासार तालुक्यात अनेक ठिकाणी बोगस कामे झाल्याचा तक्रारी होत्या. अनेक कामे हि अतिशय निकृष्ट झालेली आहेत. काही विशिष्ट लोक, ठेकेदार आणि शासकीय अधिकारी यांनी संगनमत करून भ्रष्टाचारी पॅटर्न राबवला आहे. या गंभीर विषयाची दखल घेत आ.संदीप क्षीरसागर यांनी झालेल्या बोगस आणि निकृष्ट कामांची पाहणी आणि चौकशी सुरु केली आहे. बुधवारी (दि.१४) रोजी बीड तालुक्यातील नाळवंडी आणि काळेगाव हवेली या गावांमध्ये आ.संदीप क्षीरसागर यांनी वरिष्ठ अधिकाऱ्यांसमवेत जाऊन झालेल्या निकृष्ट आणि बोगस कामांची प्रत्यक्ष पाहणी केली. आता बीड मतदार संघात झालेल्या नरेगाच्या प्रत्येक बोगस आणि निकृष्ट कामाची मी स्वतः जाऊन प्रत्यक्ष पाहणी करणार आहे. शासनाच्या निधीची पद्धतशीर विल्हेवाट लावण्याचे काम करणाऱ्या प्रत्येकावर कारवाई करण्यासाठी पाठपुरावा करणार असल्याचे आ.संदीप क्षीरसागर यांनी सांगितले आहे.

बीड — बीड शहरात मान्सूनपूर्व स्वच्छता मोहीम प्रभावीपणे राबवण्यासाठी आ. संदीप क्षीरसागर यांनी मंगळवारी (दि. १३) रोजी नगरपालिकेच्या अधिकाऱ्यांची आढावा बैठक घेतली.

या बैठकीत शहरातील नालेसफाई, रस्त्यांची स्वच्छता, आणि पाण्याचा निचरा यासंबंधी सविस्तर चर्चा झाली. आ. क्षीरसागर यांनी अधिकाऱ्यांना मान्सूनापूर्वी सर्व नाल्यांची साफसफाई पूर्ण करण्यासाठी नियोजन करण्याचे निर्देश दिले. बीडकरांना पावसाळ्यातील समस्यांना सामोरे जावे लागू नये, यासाठी नियोजनबद्ध काम करणे गरजेचे आहे,असे आ.संदीप क्षीरसागरांनी यावेळी सांगितले. येत्या १० ते १२ दिवसांमध्ये शहरात मान्सूनपूर्व स्वच्छता मोहीम पूर्ण करण्याचे नियोजन करून स्वच्छता मोहीम युध्दपातळीवर राबविण्याचे निर्देश आ.संदीप क्षीरसागर यांनी नगरपालिकेला दिले आहेत.

धाराशिव — येथील भाजपचे निष्ठावंत कार्यकर्ते असलेल्या दत्ता कुलकर्णी यांच्या हातात पुन्हा एकदा भाजपच्या जिल्हाध्यक्षपदाची सूत्रे देण्यात आली आहेत. काही वर्षांपूर्वी त्यांनी धाराशिवचे जिल्हाध्यक्ष म्हणून काम केले होते. आता पुन्हा एकदा त्यांची निवड करण्यात आली आहे.
धाराशिवमध्ये संघटन आणि पक्षाचे विचार तळागाळापर्यंत पोहचविण्यात दत्ता कुलकर्णी यांचा मोलाचा वाटा आहे. भाजपच्या सहकार बॉडीवर ते संयोजक म्हणून कार्यरत होते. पक्षाशी निष्ठावंत असलेल्या कार्यकर्त्याला पुन्हा एकदा जिल्हाध्यक्ष म्हणून भाजपने संधी दिल्याचे चित्र धाराशिवमध्ये पहायला मिळते. मुख्यमंत्री देवेंद्र फडणवीस यांचे विश्वासू असलेल्या दत्ता कुलकर्णी यांच्या निवडीचा धाराशिवमधून आनंद व्यक्त करण्यात येतं आहे. दत्ता कुलकर्णी यांच्या जिल्हाध्यक्षपदी निवड झाल्यानंतर धाराशिव भाजपाला बळकटी मिळणार आहे. बीडच्या जिल्हा विशेष शाखेतील प्रमुख असलेल्या मुकुंद कुलकर्णी यांचे ते बंधू आहेत.

मावेजा मागणाऱ्या बेडूकवाडीच्या शेतकऱ्यांवर गुन्हे दाखल

बीड — दोन दशकापूर्वी काय राव तुम्ही..! धोतराच्या धंद्यात भरपूर कमावलं….!… नादात … गमावलं असं गाणं महाराष्ट्रात धुमाकूळ घालत होतं. या गाण्यासारखीच स्थिती पोलीस अधीक्षक व पवन ऊर्जा कंपन्या यांच्या बाबतीत झाली आहे. पोलीस दलाला शिस्त लावत वेगवेगळे प्रयोग करून कायद्याचा धाक निर्माण करण्यासाठी केलेल्या प्रयत्नाने नवनीत कांवत यांनी महाराष्ट्रात नाव कमवलं. पण पवनचक्क्या कंपन्यांच्या नादी लागून सशुल्क पोलीस संरक्षण देण्याच्या नावाखाली त्यांच्याच कर्मचाऱ्यांनी रजाकारी राजवट ग्रामीण भागात लागू केली. पवनचक्की कंपन्यांच्या गुंडांना संरक्षण द्यायचं, बळजबरी जमिनीवर कब्जा करायचा, शेतकरी धमकवायचा, वेळप्रसंगी पोलीस ठाण्यात नेऊन डांबून टाकायचा, आज तर शेतकरी पिता पुत्रावर खंडणीचा गुन्हा दाखल करण्यापर्यंत मजल गेली. रजाकारी चित्र निर्माण झाल्याने राज्य कायद्याचं की रजाकारांचं असा प्रश्न निर्माण झाला आहे.

जिल्हाधिकारी दावणीला; काय करायचय ते करा गाडे च्या माजाने पा”ठका”चे पितळ उघडे ✒️भाग –5

( ज्या गाडे नावाच्या कर्मचाऱ्याने शेतकऱ्यावर  गुन्हा दाखल केला त्याच्या विरोधात केलेल्या बातमीची दखल देखील पोलीस अधीक्षकांनी घेतली नाही)
पवनचक्की कंपन्यांनी जिल्ह्यात पाय ठेवताच शेतकऱ्यांचे ग्रह फिरले गेले. जिल्ह्यातली बिघडली गेलेली कायदा सुव्यवस्थेची घडी व्यवस्थित बसवण्याची जबाबदारी कर्तव्यदक्ष पोलीस अधीक्षक म्हणून नवनीत कांवत यांच्यावर सोपवण्यात आली. ती घडी बसवण्यासाठी हर संभव प्रयत्न त्यांनी केले. त्यांचे अनेक निर्णय वाखाणले गेले. प्रामाणिक कर्तव्यदक्षतेवर प्रश्नचिन्ह निर्माण करणे सोपे नसले तरी त्या प्रमाणात त्यांचीच यंत्रणा साथ देत नसल्याचे चित्र अनेक वेळा पाहायला मिळालं. पवनचक्की कंपन्यांना सशुल्क संरक्षण देण्याच्या नावाखाली उच्छाद मांडला गेला. पोलिसांकडून शेतकऱ्यांना धमकावण्याचे प्रकार अनेक वेळा समोर आले. संरक्षण देताना कंपनीच्या गुंडांनाही ते दिले गेले. आपल्या माणसावर पूर्ण विश्वास नवनीत कांवत यांनी ठेवला. कायम त्यांच्या पाठीशी भक्कमपणे उभे राहिले. इथेच सगळा घात झाला. कंपनीने इंग्रजांचे फोडा,तोडा राज्य करा या नीतीचा वापर करून पोलीस यंत्रणेचे अधिकारी आपलेसे करून घेतले. कंपनीच्या गुंडांसोबत पोलिसांनी ही दादागिरी केली. मावेजा मागणाऱ्या शेतकऱ्यांना गुन्हे दाखल करण्याचा धमक्या दिल्या गेल्या. धमक्यांनाही न घाबरणाऱ्या शेतकऱ्यांना सराईत गुन्हेगारासारखे पकडून पोलीस ठाण्याला नेऊन डांबून ठेवण्याचे प्रकार घडले. कंपन्यांनी अक्षरशः पोलिसांच्या मदतीने शेतकऱ्यांच्या जमिनीवर दरोडे घातले. उभी पिक वाहनांच्या मदतीने नष्ट केली. शेतकऱ्यांच्या परवानगीशिवाय जमिनीवर कब्जे केले. वेळप्रसंगी कायदा धाब्यावर बसवून पोलीस यंत्रणेने काम केले. याची ओरड प्रसार माध्यमांनी केली. मात्र प्रसारमाध्यम अतिशयोक्ती करतात या भ्रमात त्याची दखल पोलीस अधीक्षकांनी कधी घेतलीच नाही. त्यामुळे संबंधित ठाणे प्रमुख व त्यांचे कर्मचारी यांचे मनोबल वाढत गेले. या सर्व प्रकारात मात्र शेतकरी भरडला गेला. महसूल विभाग तर दावणीलाच बांधला गेला. जिल्हाधिकाऱ्यांवर दलाल म्हणून आरोप केला गेला. एवढं मोठं वस्त्रहरण होत असताना कावत यांनी मात्र सुधारणा करण्यासाठी कुठलेही पाऊल उचललं नाही. इतकंच नाही तर शेतकऱ्यांची बाजू ऐकून घ्यावी असं निवेदन देण्यात आलं होतं. ती बाजू ऐकून घेण्याची तसदी घेण्याची गरज पोलीस अधीक्षकांना वाटली नाही. प्रत्यक्ष शेतकऱ्यांनी तक्रारी केल्या तरी त्याची दखल घेतली नाही. बऱ्याच वेळा हा विषय महसूलचा आहे म्हणून जबाबदारी झटकण्याचं काम केलं गेलं.परिणामी रजाकारी जमान्याचा अनुभव शेतकऱ्यांना आला गेला. निजामाकडे देखील कायदा सुव्यवस्था राखण्याचं काम रजाकरांकडेच होतं. हा इतिहास पुन्हा नव्या रुपाने समोर आला.
रविवारी तर या सर्व प्रकाराची हद्द गाठल्या गेली. पाटोदा तालुक्यातील दासखेड ग्रुप ग्रामपंचायत अंतर्गत बेडूकवाडी येथील शेतकरी शिवाजी बाजीराव शिंदे व त्यांचा मुलगा बालाजी शिंदे या धोका पिता पुत्रांनी मावेजा मिळावा यासाठी कंपनी कर्मचाऱ्यांना शेतात का आले म्हणून जाब विचारला. पोलीस त्यांची मग काय ? या दोघा बाप लेकावर गुन्हा दाखल करण्यात आला. विशेष म्हणजे गुन्ह्याचं समर्थन करताना पोलिसांनी याची शहानिशा केली असं पोलीस अधीक्षक कार्यालयाकडून सांगण्यात आलं. शनिवारी सायंकाळी सातच्या सुमारास कंपनीचे बंदूकधारी कर्मचारी, त्यांनी पाळलेले गुंड, कामगार, जेसीबी सारख्या यंत्रणेला दोघाच जणांनी अडवलं हे बुद्धीला पटणार आहे काय? बाकीच्यांचा द्या हो सोडून आयपीएस अधिकाऱ्याला देखील सारासार विचार विवेक बुद्धीला हे पटतं का? असा प्रश्न देखील विचारला जात आहे. कंपनीचे लोक शेतकऱ्याला खंडणीचा गुन्हा दाखल करूत म्हणून धमकावत होते धक्काबुकी करत होते. त्यावेळी संरक्षण देणारे पोलीस बघ्याची भूमिका का घेत होते हा प्रश्न शेतकऱ्यांकडून विचारला जात आहे. हा सर्व प्रकार म्हणजे ” उलटा चोर कोतवाल को डांटे” असं म्हणण्यासारखा आहे.
पवनचक्की कंपनीचा कर्मचारी मोहन रामा गाडे याच्या तक्रारीवरून कलम 115 (2), 126 (2), 308 (2), 308 (3) (5) अन्वये कामाला विरोध करणे जाणीवपूर्वक हत्येचा प्रयत्न करणे या अंतर्गत शिवाजी शिंदे व बालाजी शिंदे तसेच जेसीबी ऑपरेटर यांच्या विरोधात गुन्हा दाखल करण्यात आला आहे. या प्रकारामुळे मात्र पोलीस अधीक्षक कायदा सुव्यवस्थेचे हाकाटी किती जरी मारत असले तरी शेतकरी मात्र पवनचक्की कंपनींना साथ देऊन भरडून काढण्याचं काम करत आहेत. पोलीस यंत्रणेची प्रतिमा जिल्ह्यातील पवनचक्की बाधित शेतकऱ्यांमध्ये काय झाली आहे याचा आढावा एकदा पोलीस अधीक्षकांनी आवर्जून घ्यावा. म्हणजे प्रतिमा सकारात्मक झाली की नकारात्मक हे कळेल.

या सर्व घटना घडामोडीमुळे मात्र कांवत साहेब…! बीडमध्ये येऊन भरपूर नाव कमावलं; पवनचक्की कंपनीच्या नादात सगळंच गमावलं असं शेतकरी म्हणू लागले आहेत‌ ‌.