बीड — शहरात भाजी विक्रेती महिलेबाबत घडलेल्या घटनेची आ. विजयसिंह पंडित यांनी गांभीर्याने दखल घेत संबंधित अधिकाऱ्यांना जाब विचारला, गरीब, कष्टकरी आणि सामान्य नागरीकांवर अन्याय सहन केला जाणार नाही असा कडक इशारा दिला. यानंतर पालिका प्रशासनाने संबंधित अधिकारी कर्मचाऱ्यांना कारणे दाखवा नोटीस दिल्या आहेत. आ. विजयसिंह पंडित यांच्या सूचनेवरून उपनगराध्यक्ष विनोद मुळूक यांनी संबंधित महिलेची भेट घेऊन तिला आर्थिक मदत व साडी-चोळी देत तिचा सन्मान केला व यापुढे कोणताही त्रास होणार नाही अशी ग्वाही दिली.

बीड शहरातील भाजी मंडई समोर बुधवार, दि.२० मे रोजी अतिक्रमण विरोधी पथकाने केलेल्या कारवाईमध्ये एका वयोवृध्द महिला भाजी विक्रेतीचा भाजीपाला फेकून दिल्याचा व्हिडीओ सध्या सोशल मिडीयावर व्हायरल झाला होता. याची आ. विजयसिंह पंडित यांनी मुंबई मध्ये मंत्रालयीन कामात व्यस्त असतानाही या गंभीर प्रकरणाची दखल घेत नगर परिषदेचे मुख्याधिकारी, नगराध्यक्षा श्रीमती प्रेमलताताई पारवे, उपनगराध्यक्ष विनोद मुळूक, नगराध्यक्ष प्रतिनिधी शेख मुजीब, गटनेते फारुक पटेल यांच्यासह पदाधिकाऱ्यांशी चर्चा केली. सोशल मिडीयावर व्हायरल होत असलेल्या व्हिडीओ मधील प्रकाराच्या अनुषंगाने अशा प्रकारे भाजी विक्रेत्यांचा भाजीपाला फेकून देणे अथवा उचलून घेऊन येण्याच्या कोणत्याही सूचना पालिका प्रशासनाने संबंधितांना दिल्या नसल्याची बाब यामध्ये उघडकीस आली. विशेष म्हणजे सदर अतिक्रमण विरोधी कारवाई होताना स्वच्छता निरीक्षक या घटनेच्या वेळी तेथे उपस्थित नव्हते. त्यामुळे नगर परिषदेने या कारवाईचे समर्थन केले नाही. मात्र अशा प्रकारच्या घटना भविष्यात घडू नयेत या बाबत उपाययोजना करण्याचे निर्देश आ. विजयसिंह पंडित यांनी यावेळी दिले होते.

यानंतर शुक्रवार, दि.२२ मे रोजी आ. विजयसिंह पंडित यांच्या सूचनेवरून बीड नगर पालिकेचे उपनगराध्यक्ष विनोद मुळूक यांनी सदर महिलेची त्यांच्या निवासस्थानी जाऊन भेट घेतली. सदर महिलेच्या व नातेवाईकांच्या भावना समजावून घेतल्या, पालिका प्रशासनातील ज्या अधिकारी कर्मचाऱ्यांनी भाजीपाला उचलून ट्रॅक्टरमध्ये फेकला त्यांच्यावर कारवाई केली जाईल, त्यांना कारणे दाखवा नोटीस देण्यात आल्या असून पुढील कारवाई देखील लवकरच करण्यात येईल असे सांगितले. गरीबांच्या, सामान्य नागरीकांच्या डोळ्यात अश्रू नव्हे तर चेहऱ्यावर हसू दिसले पाहिजे असे सांगत बीड शहराच्या विकासासाठी कणखर, सकारात्मक आणि विकासात्मक भुमिका घेणारे आ. विजयसिंह पंडित आपल्या कुटूंबाच्या पाठिशी असल्याची ग्वाही त्यांनी यावेळी दिली. सदर महिलेला आर्थिक मदत करून साडी-चोळी देत तिचा सन्मान करण्यात आला, भविष्यात यापुढे कोणताही त्रास होणार नाही अशी ग्वाही नगराध्यक्षा श्रीमती प्रेमलता ताई पारवे व पालिका प्रशासनाच्या वतीने उपनगराध्यक्ष विनोद मुळूक व नगरसेवक महेश धांडे यांनी दिली आहे. यावेळी वृध्द महिलेचा मुलगा परशुराम दळवी उपस्थित होता.