अंबाजोगाई (बीड) : बसमध्ये जागा मिळवण्याच्या घाईत धावत गेलेल्या एका प्रवाशाचा दुर्दैवी मृत्यू झाल्याची धक्कादायक घटना अंबाजोगाई बसस्थानकावर घडली आहे. या घटनेचा थरारक सीसीटीव्ही व्हिडिओ समोर आला असून तो सोशल मीडियावर मोठ्या प्रमाणात व्हायरल होत आहे.
मिळालेल्या माहितीनुसार, अंबाजोगाई बसस्थानकातून एसटी बस बाहेर पडत असताना प्रवाशांमध्ये बसमध्ये जागा मिळवण्यासाठी लगबग सुरू होती. काही प्रवासी बसच्या मागे धावत बस पकडण्याचा प्रयत्न करत होते. याचवेळी लातूर जिल्ह्यातील अहमदपूर तालुक्यातील ढळेगाव येथील रहिवासी बालाजी देवकाटे हे बस पकडण्यासाठी धावत असताना अचानक त्यांचा तोल गेला.
तोल गेल्याने ते बसच्या मागील चाकाजवळ पडले आणि या दुर्घटनेत ते गंभीर जखमी झाले. उपचारापूर्वीच त्यांचा मृत्यू झाल्याची माहिती आहे. या घटनेमुळे बसस्थानक परिसरात काही काळ गोंधळाचे वातावरण निर्माण झाले होते.
दरम्यान, काही अधिकाऱ्यांकडून प्राथमिक स्वरूपात हृदयविकाराच्या झटक्याची शक्यता व्यक्त करण्यात आली असली तरी अपघात नेमका कशामुळे झाला, याचा तपास सुरू आहे. बसस्थानकातील सीसीटीव्ही कॅमेऱ्यात संपूर्ण घटना कैद झाली असून त्यातून घटनेची तीव्रता समोर आली आहे.
या दुर्दैवी घटनेनंतर अंबाजोगाई बसस्थानकावरील प्रवाशांच्या सुरक्षेचा प्रश्न पुन्हा एकदा ऐरणीवर आला आहे. प्रवाशांनी बस पकडताना घाई न करता काळजी घेण्याचे आवाहन करण्यात येत आहे.
बस पकडण्याच्या घाईत अंबाजोगाई बसस्थानकावर भीषण दुर्घटना; चाकाखाली येऊन प्रवाशाचा मृत्यू.
