बीड — मुख्यमंत्री रोजगार निर्मिती कार्यक्रम (CMEGP) योजनेअंतर्गत तब्बल 2 कोटी 51 लाख 51 हजार 692 रुपयांच्या कर्ज अनुदान रकमेच्या अपहारप्रकरणी बीड सायबर पोलिसांनी मोठी कारवाई करत आरोपींना अटक केली आहे. या प्रकरणात बनावट कागदपत्रे तयार करून बँकेच्या पोर्टल लॉगिनचा गैरवापर करत शासनाच्या अनुदानावर डल्ला मारण्यात आल्याचे तपासात समोर आले आहे.
या प्रकरणी उद्योग सहसंचालक विभागीय कार्यालय, छत्रपती संभाजीनगर येथील अधिकारी बाळासाहेब त्रिबंक यशवंते यांनी दिलेल्या फिर्यादीवरून बीड शहर पोलीस ठाण्यात गुन्हा दाखल करण्यात आला होता. त्यानंतर तपास सायबर पोलीस ठाणे बीडकडे वर्ग करण्यात आला.
गुन्हा क्रमांक 139/2024 अंतर्गत भारतीय दंड संहितेच्या कलम 420, 465, 467, 468, 471, 409, 34 तसेच आयटी अॅक्टच्या कलम 66(D) अन्वये गुन्हा नोंदविण्यात आला आहे.
सायबर पोलिसांनी तांत्रिक तपासाच्या आधारे आरोपींचा शोध घेत त्यांना अटक केली. या प्रकरणात अपहार झालेल्या रकमेपैकी आतापर्यंत 81 लाख 78 हजार 289 रुपये फ्रिज करण्यात तसेच रक्कम आरोपींकडून वसूल करण्यात पोलिसांना यश आले आहे.
ही कारवाई पोलीस निरीक्षक निलेश केळे यांच्या नेतृत्वाखाली सपोनि संदीप आराक, पोउपनि स्वाती लहाने तसेच सायबर पोलीस ठाण्यातील पथकाने केली.
सायबर पोलिसांनी नागरिकांना ऑनलाईन व्यवहार करताना सावध राहण्याचे आवाहन केले आहे. अनोळखी लिंक, APK फाइल्स, संशयास्पद SMS किंवा फोन कॉलवर विश्वास ठेवू नये, OTP शेअर करू नये तसेच सोशल मीडिया खाती सुरक्षित ठेवावीत, असे आवाहन करण्यात आले आहे.
सायबर फसवणुकीसंदर्भात तक्रार
नोंदवण्यासाठी नागरिकांनी राष्ट्रीय हेल्पलाईन क्रमांक 1930 वर संपर्क साधावा किंवा cybercrime.gov.in या अधिकृत संकेतस्थळावर ऑनलाईन तक्रार नोंदवावी असे आवाहन करण्यात आले आहे.
