केज — तालुक्याचे तत्कालीन तहसीलदार राकेश गिड्डे यांच्या भीषण अपघाती निधनानंतर राज्य शासनाने त्यांच्या कुटुंबाला मोठा दिलासा दिला आहे. गिड्डे यांच्या निधनानंतर अवघ्या दीड महिन्याच्या आत त्यांच्या पत्नी नेहा राकेश गिड्डे यांना अनुकंपा तत्त्वावर ‘गट-क’ मधील शासकीय नोकरी देण्याचा निर्णय घेण्यात आला आहे.
विशेष म्हणजे, नेहा गिड्डे यांच्या कौटुंबिक आणि मानसिक परिस्थितीचा सहानुभूतीपूर्वक विचार करून शासनाने त्यांना बीडऐवजी सांगली जिल्ह्यात नियुक्ती देण्यास मंजुरी दिली आहे. त्यामुळे प्रशासनाकडून दाखविण्यात आलेल्या संवेदनशीलतेची सर्वत्र चर्चा सुरू आहे.
भीषण अपघातात राकेश गिड्डे यांचा मृत्यू
दि. ९ एप्रिल रोजी अंबाजोगाई-लातूर महामार्गावर झालेल्या भीषण कार अपघातात तहसीलदार राकेश गिड्डे यांचा जागीच दुर्दैवी मृत्यू झाला होता. या घटनेमुळे महसूल विभागासह केज तालुक्यात शोककळा पसरली होती.
घटनेनंतर महसूल मंत्री चंद्रशेखर बावनकुळे यांनी गिड्डे कुटुंबाची भेट घेऊन सांत्वन केले होते. यावेळी नेहा गिड्डे यांना अनुकंपा तत्त्वावर तातडीने नोकरी देण्याचे आश्वासन देण्यात आले होते.
शासनाकडे अर्जानंतर हालचालींना वेग
नेहा गिड्डे यांनी दि. २६ एप्रिल रोजी शासनाकडे नोकरीसाठी अधिकृत अर्ज सादर केला होता. त्यानंतर बीड जिल्हाधिकारी कार्यालय आणि छत्रपती संभाजीनगर विभागीय आयुक्त कार्यालयाकडून सकारात्मक अहवाल शासनाकडे पाठविण्यात आला.
यानंतर महसूल व वन विभागाचे उपसचिव महेश वरुडकर यांनी पुणे विभागीय आयुक्त कार्यालयाला पत्र पाठवत सांगली जिल्ह्यात नियुक्ती देण्याचे आदेश जारी केले.
मिरज तहसील कार्यालयातील पद नाकारले
शासनाने नेहा गिड्डे यांना सांगली जिल्ह्यातील मिरज तहसील कार्यालय येथे निवासी नायब तहसीलदार पद देण्याची तयारी दर्शवली होती. मात्र नागरिकांची मोठी गर्दी आणि कामाचा प्रचंड ताण लक्षात घेता, “सध्या अशा पदावर काम करण्याची मानसिक स्थिती नाही,” असे सांगत त्यांनी हे पद स्वीकारण्यास नम्रपणे नकार दिला.
दरम्यान, आता त्यांना ‘गट-क’ मधील त्यांच्या पसंतीच्या रिक्त पदावर नियुक्ती दिली जाणार असल्याची माहिती स्वतः नेहा गिड्डे यांनी दिली आहे.
