संपादक राजेंद्र होळकर यांना पत्नीशोक; सुहासिनी होळकर कालवश

अभिमानचे संपादक राजेंद्र होळकर यांच्या पत्नी सुहासिनी होळकर मागच्या काही दिवसांपासून आजारी होत्या. त्यांच्यावर पुणे येथील रूग्णालयात उपचार सुरू होते. तब्बल 1 महिन्याहून अधिक काळ त्यांनी आजाराशी कडवी झुंज दिली. मात्र बुधवारी पहाटे उपचारादरम्यान त्यांची प्राणज्योत मालवली.
सुहासिनी होळकर यांनी अत्यंत जिद्दीने आणि संघर्षाने जीवन जगले होते, अभिमान परिवार मोठा करण्यात संपादक राजेंद्र होळकर यांना त्यांनी कायम खंबीरसाथ दिली होती. एक संवेदनशील व्यक्ती, कर्तव्यदक्ष गृहीणी, कर्तव्यकठोर माता अशा वेगवेगळ्या भूमिका पार पाडत त्यांनी आयुष्य जगले. मागच्या काही काळात त्या आजारी असतानाही त्यांनी जिद्द सोडली नव्हती. अभिमानच्या वाटचालीत संपादक राजेंद्र होळकर यांच्या पाठीशी खंबीरपणे उभे राहण्याची भूमिका त्या कायम घेत आल्या होत्या. बुधवारी त्यांची प्राणज्योत मालवली. बुधवारी दुपारी पुणे येथे त्यांच्या पार्थिवावर अंत्यसंस्कार करण्यात आले. यावेळी होळकर कुटूंबासोबतच अभिमान परिवारावर प्रेम करणार्‍या अनेकांची उपस्थिती होती.
सुहासिनी होळकर यांच्या निधनाचे वृत्त कळताच जिल्हाभरातून विविध क्षेत्रातील मान्यवरांनी राजेंद्र होळकर यांचे फोनवर सांत्वन केले. सुहासिनी होळकर यांच्या पश्‍चात पती राजेंद्र होळकर, मुलगा डॉ.साहिल असा परिवार आहे. होळकर कुटुंबीयांच्या दुःखात “सह्याद्री माझा” परिवार सहभागी आहे