माजलगाव — बदलापूर अत्याचार प्रकरणा नंतरही परिस्थितीत फारसा बदल झाला नाही. याच प्रकरणाची पुनरावृत्ती माजलगाव मध्ये घडली आहे. पाच वर्षाच्या चिमुकलीवर अंगणवाडीत अत्याचार झाल्याची खळबळ जनक घटना घडली आहे. या प्रकरणी एका अज्ञाताविरुद्ध गुन्हा नोंद करण्यात आला आहे.
शाळकरी मुलींवरील अत्याचाराच्या घटनांमध्ये वाढ झाली असून माजलगाव मध्ये देखील बदलापूर घटनेची पुनरावृत्ती झाल्याने राज्यात खळबळ उडाली आहे. शहरालगत असलेल्या एका शाळेत अंगणवाडी आहे. त्यामध्ये परिसरातील लहान मुले-मुली दररोज येतात. या परिसरातीलच एक पाच वर्षाची चिमुरडी नियमित शाळेत येते. तिच्यावर शाळेतील एका अज्ञात इसमाने 27 सप्टेंबर रोजी मधल्या सुटीतील डबा खाल्यानंतर अत्याचार केला. घटनेनंतर चिमुरडी ताप येऊन आजारी पडली. त्यामुळे तिला दवाखान्यात उपचार करण्यासाठी दाखल करण्यात आले. डॉक्टरने तपासणी केल्यानंतर खरा प्रकार उघडकीस आला. त्यानंतर पालकांनी मुलीला विचारले असता चिमुकलीने शाळेत पांढरे कपडे घातलेल्या व्यक्तीने घाणेरडे कृत्य केल्याचे पालकांना सांगितले. शाळेतील पांढरे कपडे घातलेला त्या माणसाला ओळखत असल्याच चिमुरडीने सांगितले.या माहितीने हादरलेल्या पालकांनी गुरुवारी थेट माजलगाव शहर पोलीस ठाणे गाठत तक्रार दिली. त्यानुसार अज्ञात व्यक्तीविरुद्ध लैंगिक अत्याचार पाॅस्को एक्ट नूसार गून्हा दाखल करण्यात आला आहे. पुढील तपास उपविभागीय अधिकारी धीरजकुमार बच्चू यांच्या मार्गदर्शनाखाली पोलीस निरीक्षक राहुल सूर्यतळ व त्यांचे सहकारी करत आहेत. या घटनेने मात्र जिल्ह्यात खळबळ माजली आहे.
