बीड — नरेगा योजनेअंतर्गत करण्यात आलेल्या शेतविहिरीच्या कामाचे बिल मंजूर करण्यासाठी 61 हजार रुपयांची लाच मागून तडजोडीनंतर 60 हजार रुपये स्वीकारणाऱ्या ग्रामरोजगार सेवकाला लाचलुचपत प्रतिबंधक विभागाच्या पथकाने रंगेहाथ पकडले. सोमवारी झालेल्या या कारवाईने बीड तालुक्यात खळबळ उडाली आहे.
मुकेश सोनाजी भोकरे (वय 47), ग्रामरोजगार सहायक, लिंबारुई, ता. बीड, असे एसीबीच्या कारवाईत पकडण्यात आलेल्या कर्मचाऱ्याचे नाव आहे.
एसीबीकडे प्राप्त झालेल्या तक्रारीनुसार, तक्रारदाराने महात्मा गांधी राष्ट्रीय ग्रामीण रोजगार हमी योजनेअंतर्गत (नरेगा) शेतविहिरीचे काम केले होते. या कामाचे बिल मंजूर करण्यासाठी मुकेश भोकरे याने तक्रारदाराकडे 61 हजार रुपयांची लाच मागितल्याचा आरोप आहे.
तक्रार प्राप्त झाल्यानंतर एसीबीच्या पथकाने मागणीची पडताळणी केली. त्यानंतर झालेल्या तडजोडीत 60 हजार रुपये लाच देण्याचे निश्चित झाले. ठरल्याप्रमाणे लाचेची रक्कम स्वीकारत असताना एसीबीच्या पथकाने भोकरे याला रंगेहाथ ताब्यात घेतले.
या प्रकरणी बीड ग्रामीण पोलीस ठाण्यात गुन्हा दाखल करण्यात आला आहे. पुढील तपास सुरू आहे.
ही कारवाई छत्रपती संभाजीनगर एसीबीच्या अधीक्षक माधुरी कांगणे, अपर अधीक्षक शशिकांत शिंगारे आणि प्रभारी उपअधीक्षक प्रशांत पवार यांच्या मार्गदर्शनाखाली करण्यात आली. उपअधीक्षक बाळासाहेब शिंदे, पोलीस निरीक्षक भास्कर नवले, अनवेज शेख, प्रकाश डोंगरदिवे आणि रामेश्वर ताठे यांच्या पथकाने ही कारवाई केली.
