चौसाळा — राज्यात संभाव्य इंधन तुटवड्याच्या पार्श्वभूमीवर डिझेल चोरीच्या घटनांमध्ये वाढ होत असताना नेकनूर पोलिसांनी मोठी कारवाई करत डिझेल चोरी करणाऱ्या पाच जणांच्या टोळीला ताब्यात घेतले आहे. चौसाळा बायपास परिसरात पहाटेच्या सुमारास संशयित वाहनाचा थरारक पाठलाग करून नेकनूर पोलिसांनी आरोपींना पकडले. या कारवाईत चोरीसाठी वापरण्यात येणारे साहित्य आणि लाखो रुपयांचा मुद्देमाल जप्त करण्यात आला आहे.
मिळालेल्या माहितीनुसार, इराण-इराक आणि अमेरिका यांच्यात निर्माण झालेल्या तणावपूर्ण परिस्थितीमुळे इंधन पुरवठ्यावर परिणाम होण्याची शक्यता व्यक्त केली जात आहे. त्यामुळे काही ठिकाणी डिझेल आणि इतर इंधनाचा साठा करण्याचे प्रकार वाढल्याचे दिसून येत आहे. याच पार्श्वभूमीवर डिझेल चोरी करून त्याची अवैध विक्री करणारी टोळी सक्रिय असल्याची गुप्त माहिती पोलिसांना मिळाली होती.
या माहितीच्या आधारे मंगळवारी (दि. २ जून) पहाटे चौसाळा बायपास परिसरात पोलिसांनी सापळा रचला. पोलीस निरीक्षक साबळे यांच्या मार्गदर्शनाखाली पोलीस हेडकॉन्स्टेबल रामनाथ पुंडे आणि पोलीस शिपाई विलास घुले यांनी संशयित वाहनाचा पाठलाग केला. काही अंतरापर्यंत सुरू असलेल्या थरारक पाठलागानंतर पोलिसांनी वाहन अडवून पाचही संशयितांना ताब्यात घेतले.
कारवाईदरम्यान चोरीसाठी वापरण्यात येणारे साहित्य, डिझेल वाहतुकीसाठी वापरली जाणारी साधने आणि लाखो रुपयांचा मुद्देमाल जप्त करण्यात आला आहे. या प्रकरणी पुढील तपास चौसाळा पोलीस करीत आहेत.
