केज (बीड) — तालुक्यातील सांगवी शिवारात गुरुवारी एक हृदयद्रावक घटना घडली. विहिरीत बुडून १४ वर्षीय मुलाचा दुर्दैवी मृत्यू झाल्याने परिसरात मोठी खळबळ उडाली आहे.
पिंपळगाव (ता. केज) येथील विराज विशाल शिंगारे (वय १४) हा आपल्या मित्रांसोबत पोहायला शिकण्यासाठी सांगवी शिवारातील बाळासाहेब केदार यांच्या शेतातील विहिरीवर गेला होता. पोहण्यासाठी त्याने कमरेला थर्माकोल बांधून विहिरीत उडी मारली. मात्र, थर्माकोल तुटल्याने तो सुमारे ३५ फूट खोल पाण्यात बुडाला.
घटनेची माहिती मिळताच पोलीस निरीक्षक स्वप्नील उनवणे, सहाय्यक फौजदार पी. टी. चव्हाण, कर्मचारी शंभू दराडे व होमगार्ड सुरज भैरट यांनी तत्काळ घटनास्थळी धाव घेतली. सुरुवातीला स्थानिक पातळीवर शोधमोहीम राबवण्यात आली, मात्र यश न आल्याने बाहेरील बचाव पथकाची मदत घेण्यात आली.
पैठण येथील बचाव पथकाने घटनास्थळी पोहोचून सखोल शोधमोहीम राबवली आणि सायंकाळी सुमारे ६.३० वाजता मृतदेह बाहेर काढण्यात आला. त्यानंतर पोलिसांनी मृतदेह उत्तरीय तपासणीसाठी उपजिल्हा रुग्णालयात पाठविला असून पुढील तपास सुरू आहे.
