परळी — घरात बोलावून घेत तोंडात बोळा कोंबून अल्पवयीन मुलीवर दोन नराधमांनी अत्याचार केल्याची खळबळ जनक घटना तालुक्यातील धारावती तांडा येथे घडली. याप्रकरणी परळी ग्रामीण पोलीस ठाण्यात गुन्हा नोंद करण्यात आला आहे.

पीडित मुलगी १६ वर्षांची अल्पवयीन असून दोन जणांनी तिला गोड बोलून आपल्या घरी बोलावले.मुलगी घरात जाताच आरोपींनी घराचा दरवाजा आतून बंद केला. त्यानंतर एका नराधमाने पीडितेचे हात-पाय घट्ट बांधले व ती ओरडू नये म्हणून तिच्या तोंडात कापडाचा बोळा कोंबला. यानंतर दोन्ही नराधमांनी तिच्यावर क्रूरपणे लैंगिक अत्याचार केला.
अत्याचारानंतर पीडितेची सुटका करताना नराधमांनी तिला जीवे मारण्याची धमकी दिली. हा प्रकार कोणाला सांगितल्यास तुला संपवून टाकू, असे म्हणत तिला दहशतीखाली ठेवले. धमकीमुळे प्रचंड घाबरलेल्या मुलीने कशीबशी आपली सुटका करून घर गाठले आणि घडलेला सर्व संतापजनक प्रकार आपल्या आई-वडिलांना सांगितला. पालकांनी घटनेचे गांभीर्य ओळखून तात्काळ परळी ग्रामीण पोलीस ठाणे गाठत फिर्याद दिली.

पोलिसांनी या घटनेची दखल घेत आरोपींविरुद्ध भारतीय न्याय संहिता कलम ६४, १२७(२), ३५१(२), ३५२, ३(५) आणि बालकांचे लैंगिक अपराधापासून संरक्षण अधिनियम (पोक्सो) २०१२ च्या कलम ४ आणि १७ नुसार गुन्हा रजिस्टर नंबर १२५/२०२६ दाखल केला आहे. सध्या दोन्ही आरोपी फरार असून या प्रकरणाचा सखोल तपास अंबाजोगाई उपविभागाचे पिंक पथक आणि सहाय्यक पोलीस निरीक्षक संतोष जाधव करत आहेत.

बीड — इराण अमेरिका युद्धामुळे गॅस टंचाई निर्माण झालेली असतानाच काळाबाजार देखील होऊ लागला आहे. काळाबाजार रोखण्यासाठी पेठ बीड पोलीस व पुरवठा विभागाचे नायब तहसीलदार प्रशांत सुपेकर यांनी इमामपूर रोडवरील शिवनेरी नगर परिसरात शनिवारी रात्री दीडच्या सुमारास छापा मारला. यावेळी वेगवेगळ्या कंपनीच्या 29 सिलेंडर जप्त करण्यात आले.

शिवनेरी नगर भागात नफा कमवण्याच्या उद्देशाने काळाबाजार करण्यासाठी सिलेंडर साठवून ठेवल्याची माहिती मिळाली होती. या माहिती आधारे पोलीस व पुरवठा विभागाने मध्यरात्री दीडच्या सुमारास अजय मोहन घोडके याच्या घरावर छापा मारला. यावेळी घरामध्ये साठवून ठेवलेल्या इंडेन, भारत गॅस, एचपी कंपनीच्या 29 सिलेंडर आढळून आले. 12 व्यावसायिक वापराच्या सिलेंडरांपैकी 1 भरलेला आणि 17 घरगुती सिलेंडरांपैकी 8 भरलेले सिलेंडर असा एकूण 73 हजार 750 रुपयांचा मुद्देमाल जप्त करण्यात आला. दरम्यान ही कारवाई
पेठ बीड पोलिस स्टेशनचे एपीआय नित्यानंद उबाळे यांच्या नेतृत्वाखाली नितीन राठोड, कल्याण जाधव, अंकुश राठोड, पठाण यांनी ही कारवाई केली.तहसीलदार चंद्रकांत शेळके यांच्या मार्गदर्शनाखाली नायब तहसीलदार प्रशांत सुपेकर, कारकून श्रीराम वायभट व संतोष मुळीक यांनी देखील कारवाई सहभाग घेतला. प्राथमिक तपासात सिलेंडर अनधिकृतपणे भरले गेले असल्याचे निदर्शनास आले असून, लाखो रुपयांचे व्यवहार होत असल्याचा संशय आहे. याप्रकरणी पेठ बीड पोलीस ठाण्यात गुन्हा क्रमांक 78/2026 नोंदवला असून, भारतीय न्याय संहिता कलम 287, 288 व अत्यावश्यक वस्तू अधिनियम 1955 चे कलम 3 व 7 अंतर्गत तपास सुरू आहे. पुढील तपास पीएसआय बारगळ करीत आहेत.

तेलगाव — कायद्याचा धाक नसल्याने रोज मारहाणीच्या घटना जिल्ह्यात घडत आहेत. ज्यूस सेंटर मध्ये काम करणाऱ्या मजुराला चार-पाच जणांच्या टोळक्याने क्षूल्लक कारणावरून बेदम मारहाण केल्याची घटना तेलगाव मध्ये घडली आहे

याबाबत मिळालेल्या माहितीनुसार, तेलगाव येथील चौकात असलेल्या त्रिमूर्ती ज्यूस सेंटरमध्ये सागर विजय जाधव हा तरुण वेटरचं काम करतो. नेहमीप्रमाणे तो हॉटेलमधील काम करत असताना ही घटना घडली. सागर जाधव रिकामे ग्लास जिन्यावरून खाली आणत असताना जिन्याजवळ काही तरुण उभे होते. पुढे जाण्यासाठी जागा मिळावी म्हणून त्याने त्या तरुणांना “पायरीवरून थोडे बाजूला व्हा” असे सांगितले.
मात्र यातून गैरसमज करून एका तरुणाने सागर जाधवला अडवले आणि त्याच्याशी वाद घालण्यास सुरुवात केली. काही क्षणांतच या वादाचे रूपांतर मारहाणीत झाले. संबंधित तरुणाने सागरला ज्यूस सेंटरच्या बाहेर खेचले आणि त्याला मारहाण करण्यास सुरुवात केली. त्याच्यासोबत असलेल्या इतर तिघांनीही सागरला लाथाबुक्क्यांनी बेदम मारहाण केली. हा संपूर्ण प्रकार परिसरातील सीसीटीव्ही कॅमेऱ्यात कैद झाला आहे.या मारहाणीत सागर जाधव गंभीर जखमी झाला असून त्याला तातडीने जिल्हा रुग्णालयात दाखल करण्यात आले. घटनेनंतर परिसरात मोठी चर्चा सुरू झाली आहे. किरकोळ कारणावरून तरुणाला अशा प्रकारे मारहाण केल्यामुळे कायद्याचा धाक उरला आहे का, असा प्रश्न उपस्थित केला जात आहे.
दरम्यान, या घटनेनंतर मारहाण करणाऱ्या तरुणांविरोधात कारवाई करण्याची मागणी होत असून पोलिसांकडून या प्रकरणाचा तपास सुरू करण्यात आला आहे. सीसीटीव्ही फुटेजच्या आधारे आरोपींची ओळख पटवून पुढील कारवाई केली जाणार असल्याची माहिती मिळत आहे.

बीड — संतोष देशमुख हत्या प्रकरणानंतर मारहाणीच्या घटना बीड जिल्ह्यात नेहमीच घडत असल्याचं व त्याचे व्हिडिओ व्हायरल झाल्याचं पाहायला मिळतं. असाच एक ऊसतोड कामगाराला बागायतदाराकडून मारहाण झाल्याचा व्हिडिओ व्हायरल होत आहे. ही घटना धारूर तालुक्यातील खारेवाडी भागात घडली. ऊसतोड कामगाराला बेदम मारहाण करत असताना मारू नका ना वं असं म्हणत आक्रोश करताना दिसून येत आहे. या घटनेमुळे जिल्ह्यात खळबळ माजली आहे.

गणेश बाळासाहेब वाघ असं ऊसतोड कामगाराचं नाव आहे. धारूर तालुक्यातील खरेवाडी येथे उसाच्या वाड्याला कांडी का ठेवली असं म्हणत चार ते पाच जणांनी गणेश वाघ याला काठी लाठ्यासह बेदम मारहाण केली. या मारहाणीचा धक्कादायक व्हिडिओ सध्या सोशल मीडियावर व्हायरल होऊ लागला आहे. या व्हायरल व्हिडिओत आरोपींनी गणेश वाघच्या नरड्यावर पाय दिल्याचं दिसत आहे. मारहाण होत असताना त्याची पत्नी मारू नका ना वं असं म्हणून ओरडताना देखील ऐकू येत आहे. याप्रकरणी सिरसाळा पोलीस ठाण्यात गब्बू खाडे, श्रीकांत खाडे, अजय वसंत खाडे यांच्या विरोधात गुन्हा दाखल करण्यात आला आहे. यावेळी ऊसतोड कामगाराच्या भावाला व पत्नीला देखील मारहाण झाल्याचं पोलिसात दिलेल्या तक्रारीत म्हटलं आहे.खारेवाडी भागात घडलेल्या मारहाणीच्या घटनेत ऊसतोड कामगार गंभीर जखमी झाला आहे. त्याच्यावर खासगी रुग्णालयात उपचार सुरू असल्याची माहिती मिळाली आहे.या घटनेमुळे ऊसतोड कामगाराचं संपूर्ण कुटुंब प्रचंड घाबरलेलं आहे. या मारहाणीचा व्हिडिओ व्हायरल झाल्यानंतर पुन्हा एकदा बीड चर्चेत आले असून पोलिसांचा धाक राहिला नसल्याचं बोललं जात आहे.