पुणे — महाराष्ट्र दहशतवादविरोधी पथकाकडून मोठी कारवाई करण्यात आली आहे. महाराष्ट्र एटीएसने अल-कायदा संघटनेशी संबंध असलेल्या झुबेरला अटक केली आहे. एटीएसने पुण्यात १० ठिकाणी छापेमारी करतानाच डझनभर संशयित रडारवर असल्याची माहिती समोर आली आहे.

https://x.com/ANI/status/1982813759837000161

दरम्यान, महाराष्ट्र एटीएसने संशयित दहशतवादी झुबेर हंगारकरला पुण्यातून अटक केली आहे. एटीएसने बेकायदेशीर कारवाया(प्रतिबंध) कायद्या(यूएपीए)अंतर्गत जुबेरला अटक केली आहे. झुबेरचे अल-कायदाशी संबंध असल्याचेही उघड झाले आहे. मीडिया रिपोर्ट्स नुसार, ९ ऑक्टोबर २०२५ पासून, महाराष्ट्र एटीएस दहशतवादाशी संबंधित एका प्रकरणासंदर्भात पुण्यातील विविध ठिकाणी छापे टाकत आहे. या संदर्भात, सोमवार, २७ ऑक्टोबर २०२५ ला एटीएसने झुबेर हंगारकरला अटक केली. या छाप्यांमध्ये असंख्य इलेक्ट्रॉनिक उपकरणे, कागदपत्रे व इतर साहित्य देखील जप्त करण्यात आले.

तपासा दरम्यान सापडलेल्या पुराव्यांच्या आधारे, बेकायदेशीर क्रियाकलाप (प्रतिबंध) कायदा, १९६७ अंतर्गत गुन्हा दाखल करण्यात आला आहे. पुढील तपास सुरू आहे. एटीएस पुणे म्हटले की, दहशतवादाशी संबंधित एका प्रकरणात महाराष्ट्र एटीएसने ९ ऑक्टोबर २०२५ ला पुण्यातील विविध ठिकाणी छापे टाकले. एटीएसच्या कारवाई दरम्यान, अनेक इलेक्ट्रॉनिक वस्तू, कागदपत्रे आणि साहित्य जप्त करण्यात आले. तपासादरम्यान सापडलेल्या पुराव्यांच्या आधारे, बेकायदेशीर क्रियाकलाप (प्रतिबंध) कायदा, १९६७ (२००८ मध्ये सुधारित) अंतर्गत गुन्हा दाखल करण्यात आला. गुन्हा दाखल झाल्यानंतर, २७ ऑक्टोबर २०२५ ला एटीएसने पुण्यातील एका व्यक्तीला अटक केली असून या प्रकरणी पुढील तपास सुरू आहे.

बीड — परळी तालुक्यातील धर्मापुरी येथील सोहेल ऑइल मिल मधील वॉचमन लक्ष्मण चाटे यांचे हातपाय बांधून विद्युत डीपीतील तांब्याची तार, ऑइल स्टील प्लेट चोरून नेल्याची घटना दहा दिवसांपूर्वी घडली होती. या प्रकरणातील आरोपींना स्थानिक गुन्हे शाखेच्या पोलिसांनी मुद्देमालासह जेरबंद करण्यात यश मिळवले आहे.
जिल्ह्यातील चोरी घरफोडी जबरी चोरी दरोडा उघडकीस आणण्याचे आदेश पोलीस अधीक्षक नवनीत कांवत यांनी स्थानिक गुन्हे शाखेला दिले आहेत. या अनुषंगाने 17 ऑक्टोबर रोजी रोजी लक्ष्मण बापुराव चाटे रा. खापरटोन ता. अंबाजोगाई जि.बीड यांनी परळी ग्रामीण पोलीस ठाण्यात फिर्याद दिली होती.ते वाँचमन म्हणुन कामास असलेल्या धर्मापुरी येथील सोहेल आँईल मिलमध्ये डिट्युवर असतांना दि. 17 ऑक्टोबर रोजी रात्री 1 ते पहाटे 4 वाजण्याच्या सुमारास अनोळखी चोरट्याने त्यांचे हात, पाय बांधुन, चाकु व लाकडी काठ्या दाखवुन, धमकी देवुन, मिल मधील लाईटच्या डिपीतील तांब्याची तार, आईल व स्टील प्लेट असा मुद्देमाल बळजबरीने चोरून नेल्याची तक्रार दिली होती. त्यावरून परळी ग्रामिण पोलीस ठाण्यातय कलम 309(4),324(2)351(2) भारतीय न्याय संहिता प्रमाणे गुन्हा दाखल आहे.
या गुन्ह्यातील अनोळखी गुन्हेगाराचा स्थानिक गुन्हे शाखेचे पो नि शिवाजी बंटेवाड यांच्या मार्गदर्शनाखाली पोउनि सुशांत सुतळे, रामचंद्र केकान, विष्णु सानप, गोविंद भताने, सचिन आंधळे असे शोध घेत असतांना गुप्त बातमीदारा मार्फत माहिती मिळाली की, वरील गुन्ह्यातील तांब्याची तार बाळु उर्फ संतोष सोपान कांबळे रा. मिलींदनगर परळी नजमोद्दीन बशीर शेख रा.बरकत नगर परळी यांनी व त्यांच्या साथीदाराने चोरून त्यांच्या राहत्या घराच्या पाठीमागे लपवून ठेवली आहे. मिळालेली माहिती पो नि शिवाजी बंटेवाड यांना देवुन आरोपीस ताब्यात घेवुन त्याच्याकडे विचारपुस केली असता त्यांनी सदर गुन्ह्यातील तांब्याची तार, त्यांचे इतर साथीदार सतिष रघुनाथ मुंडे रा. नागदरा ता. परळी,सलीम शेख रा. केज या चौघांनी मिळुन चोरी केल्याची कबुली देवुन चोरीतील मुद्देमाल काढुन दिल्याने त्यांच्याकडुन चोरीस गेलेल्या मुद्देमालापैकी 140 किलो तांब्याची अंदाजे 1लाख 26 हजार रुपये किमतीची तार जप्त करण्यात आली आहे.
दरम्यान ही कारवाई पोलीस अधीक्षक नवनीत काँवत,अप्पर पोलीस अधीक्षक चेतना तिडके व स्थागुशा चे पोलीस निरीक्षक शिवाजी बंटेवाड यांच्या मार्गदर्शनाखाली पोउपनि सुशांत सुतळे, रामचंद्र केकान, विष्णु सानप, गोविंद भताने, सचिन आंधळे यांनी केली आहे.

धारूर — तालुक्यातील देवदहिफळ येथील अडीच वर्षीय आरोही विशाल बडे या चिमुकलीचा कर्नाटक राज्यातील कोल्हार जवळ ट्रॅक्टरच्या ट्रॉलीखाली चिरडून मृत्यू झाल्याची घटना घटना रविवारी साडेदहा वाजता घडली. एकुलती एक लेक अपघातात गमावल्याने बडे कुटुंबावर दुःखाचा डोंगर कोसळला आहे.
याबाबत मिळालेल्या माहितीनुसार, देवदहिफळ येथील महादेव बडे हे ऊसतोड मुकादम आहेत. त्यांचा मुलगा विशाल बडे हा कर्नाटक राज्यातील बैलहोंगल तालुक्यात सोमेश्वर सहकारी साखर कारखान्याकडे ऊस वाहतुकीचं काम पाहतो. शुक्रवारी रात्री विशाल बडे हा पत्नी आरती, मुलगा अविराज आणि मुलगी आरोहीसह ट्रॅक्टरने कर्नाटकला कामासाठी संपूर्ण कुटुंबासोबत निघाले होते. यावेळी मोठा अनर्थ घडला आणि काही क्षणात होत्याचं नव्हतं झालं.
रविवार सकाळी कोल्हारजवळ नाश्ता, चहापाणी करुन हे कुटुंब पुन्हा साखर कारखान्याच्या दिशेने निघालं होतं. यावेळी आरोही तिच्या आईकडे समोरील ट्रॉलीत आपल्या आईच्या कुशीत बसली होती. मात्र, काही कळायच्या आत अचानक ती आईच्या हातातून निसटली. हातातून निसटून ती पाठीमागील ट्रॉलीच्या चाकाखाली आली.ट्रॉलीच्या चाकाखाली आल्यामुळे आरोहीचा तिथेच जागीच मृत्यू झाला. या घटनेनंतर आई-वडिलांनी केलेला टाहो हृदय पिळवटून टाकणारा होता. आपल्या डोळ्यांसमोर त्यांच्या लेकीचा जीव गेला. एका क्षणात, डोळ्यांदेखत त्यांचा छोटासा संसार उधळला गेला. चिमुकलीला नंतर कोल्हार येथील सरकारी दवाखान्यात शवविच्छेदन झाल्यानंतर रविवारी मध्यरात्री शोकाकुल वातावरणात देवदहिफळ येथे आरोहीवर अंत्यसंस्कार करण्यात आले. या घटनेमुळे बडे कुटुंबावर तसंच देवदहिफळ गावावर शोककळा पसरली आहे. ऊसतोड कामगारांच्या स्थलांतराचा धोका आणि मुलांच्या सुरक्षेचा प्रश्न पुन्हा एकदा ऐरणीवर आला आहे