बंजारा समाजाचा एसटी प्रवर्गात समावेश करा; तरुणाची गळफास घेऊन आत्महत्या

गेवराई —  बंजारा समाजाचा अनुसूचित जमाती (एसटी) प्रवर्गात समावेश करण्यात येत नसल्याच्या निषेधार्थ सोशल मिडियावर व्हिडिओ शेअर करत गळफास घेऊन केकत पांगरी च्या तरुणाने आत्महत्या केल्याची धक्कादायक घटना मंगळवारी सकाळी उघडकीस आली.

प्रविण बाबुराव जाधव (वय ३५) रा. केकत पांगरी, ता. गेवराई,जि.बीड असे मृताचे नाव आहे. प्रविण जाधव यांनी आत्महत्येपूर्वी सोशल मिडियावर एक व्हिडिओ पोस्ट केला. त्यात त्यांनी “बंजारा समाजाचा एसटी प्रवर्गात समावेश होत नसल्याने मी आत्महत्या करत आहे.

प्रविण बाबुराव जाधव वय ३५ वर्ष रा. केकत पांगरी, ता. गेवराई,जि.बीड असे मृताचे नाव आहे. प्रविण जाधव यांनी आत्महत्येपूर्वी सोशल मिडियावर एक व्हिडिओ पोस्ट केला. त्यात त्यांनी “बंजारा समाजाचा एसटी प्रवर्गात समावेश होत नसल्याने मी आत्महत्या करत आहे.

माझ्या मृत्यूला सरकार जबाबदार राहील,” असे वक्तव्य केले होते. त्यानंतर त्यांनी गावाच्या शिवारात रोहिदास चव्हाण यांच्या शेतात ट्रॅक्टरच्या टोचन ब्लेडला गळफास घेऊन जीवन संपविले.

घटनेची माहिती मिळताच गेवराई पोलिसांनी घटनास्थळी धाव घेत पंचनामा केला. मृतदेह उत्तरीय तपासणीसाठी गेवराई उपजिल्हा रुग्णालयात पाठविण्यात आला. प्रविण जाधव यांच्या मागे आई-वडील, पत्नी आणि दोन लहान मुलांचा परिवार आहे.

दरम्यान, या घटनेच्या निषेधार्थ गेवराई-बीड रस्त्यावर संतप्त नागरिकांनी व समाजबांधवांनी रास्ता रोको आंदोलन केले. पोलिसांनी घटनास्थळी मोठा बंदोबस्त ठेवत परिस्थिती नियंत्रणात आणली. दरम्यान महसूल विभाग , पोलिस प्रशासन यांनी निवेदन स्वीकारले असून संबंधितांनी यावेळी समाजाचा अंत न पाहता आरक्षण देण्यात यावे तसेच कुटुंबायांना आर्थिक मदत करावी अशी मागणी करण्यात आली आहे.