मुंबई — महाराष्ट्राच्या राजकारणात पुन्हा एकदा  अजित पवार विरोधात वादळ उठण्याची शक्यता निर्माण झाली आहे. पुण्यामधील वादग्रस्त जमीन व्यवहाराच्या पार्श्वभूमीवर सामाजिक कार्यकर्त्या अंजली दमानिया यांनी थेट उपमुख्यमंत्री अजित पवारांना पदाचा राजीनामा द्यावा, अशी मागणी केली आहे.पुण्याचे पालकमंत्री असलेल्या अजित पवारांच्या कार्यक्षेत्रातच हा गैरव्यवहार झाला असल्याने चौकशी निष्पक्ष होणार नाही,” असा ठाम आरोप करत त्यांनी प्रशासनालाही धारेवर धरले आहे.

दमानिया म्हणाल्या, “मुंढवा येथील जमीन ही गायकवाड कुटुंबाची महार वतन जमीन होती. नोंदणी न झालेल्या पॉवर ऑफ ॲटर्नीवरून शितल तेजवानीने केलेला व्यवहार बेकायदेशीर आहे. या प्रकरणाची माहिती जिल्हाधिकाऱ्यांना देण्यात आली होती, पण त्यांनी कोणतीही कारवाई केली नाही. त्यामुळे जिल्हाधिकाऱ्यांचे निलंबन व्हायला हवे.त्यांनी पुढे सांगितले की, “खोट्या कागदपत्रांच्या आधारे व्यवहार करणे हा गंभीर गुन्हा आहे. अशा प्रकरणात सात वर्षांपर्यंत तुरुंगवासाची तरतूद आहे. ‘आमेडिया’ ही लिमिटेड लायबलिटी पार्टनरशिप कंपनी असून पार्थ पवार यांचा त्यात ९९ टक्के हिस्सा आहे. त्यामुळे त्यांना सर्व माहिती असणे स्वाभाविक आहे. मात्र एफआयआरमध्ये त्यांचे नावच नाही, हे त्यांना वाचवण्याचे डावपेच असल्याचे स्पष्ट दिसते.

आता या प्रकरणावरून राज्यात राजकीय तापमान चांगलेच वाढले असून, दमानिया यांनी अजित पवार-पार्थ पवार यांच्या ६९ कंपन्यांच्या सर्व जमीन व्यवहारांचा तपशील “मालिका स्वरूपात” उघड करण्याचा इशारा दिला आहे. त्यांच्या या वक्तव्यामुळे ‘पवार विरुद्ध दमानिया’ अशी नवी राजकीय लढाई पेटण्याची चिन्हे दिसत आहेत

मुंबई — शिवसेना पक्ष आणि धनुष्यबाण चिन्हाबाबत सुप्रीम कोर्टात दाखल याचिके संदर्भात मोठी बातमी समोर आली आहे. शिवसेना उद्धव बाळासाहेब ठाकरे पक्षाचे प्रमुख उद्धव ठाकरे यांनी ही याचिका दाखल केली आहे.मागील काही महिन्यांपासून ही याचिका सुनावणीच्या प्रतिक्षेत आहे. आता त्यावर 12 नोव्हेंबरला बुधवारी सुनावणी होणार आहे.

उद्धव ठाकरे यांच्या पक्षाची बाजू लढविणारे वकील असीम सरोदे यांनी ही माहिती सोशल मीडियातून दिली आहे. सरोदे यांची सनद महाराष्ट्र आणि गोवा बार असोसिएशनने तीन महिन्यांसाठी रद्द केली आहे. त्यामुळे त्यांना कोणत्याही कोर्टात केस लढता येणार नाही. कोर्टाविषयी केलेल्या विधानावर ठपका ठेवत असोसिएशनने ही कारवाई केली आहे.

दरम्यान, सरोदे यांनी सोशल मीडियातून दिलेल्या माहितीनुसार, धनुष्यबाण पक्षचिन्ह प्रकरणी 12 नोव्हेंबरला 19 नंबरला न्यायमूर्ती सूर्यकांत यांच्या बेंच समोर सुनावणी होईल, असे कामकाज यादीवरून दिसते. पक्षचिन्ह आणि अपात्रतेबाबत याचिकांची सुनावणी एकत्र होईल, असेही दिसते.
असीम सरोदे यांनी याचिकेवरील सुनावणी लांबत असल्याने नाराजीही व्यक्त केली आहे. त्यांनी म्हटले आहे की, पुन्हा पुन्हा तारीख मिळणे व या संविधानिक विषयांवरील सुनावणी पुढे ढकलली जाणे दुःखद आहे. सर्वोच्च न्यायालयात वारंवार तारीख मिळणे याचा अर्थ कोणतीच न्यायिक-शिस्त नसणे असा आहे.

‘तारीख पे तारीख’ च्या ऐवजी ‘तारीख पे न्याय’ असे झाले तर न्यायव्यवस्थेवरील लोकांचा विश्वास टिकून राहील. काय द्यायचा तो निर्णय द्या. निकाल देतांना सकारण आणि स्पष्टीकरणांसह द्यावा, हे न्याय तत्व नक्की पाळा, अशी अपेक्षा असीम सरोदे यांनी सोशल मीडियातील पोस्टमध्ये व्यक्त केली आहे.
दरम्यान, आमदारांच्या अपात्रतेबाबतही उद्याच सुनावणी होण्याची शक्यता सरोदे यांनी व्यक्त केली आहे. ही याचिका ठाकरेंच्या सेनेचे आमदार सुनील प्रभू यांनी दाखल केली आहे. एकनाथ शिंदे यांच्या शिवसेनेतील आमदारांना विधानसभा अध्यक्ष राहुल नार्वेकर यांनी पात्र ठरविल्याविरोधात ही याचिका दाखल करण्यात आली आहे. शिंदेंच्या सेनेकडूनही ठाकरेंच्या आमदारांना पात्र ठरविल्याविरोधात नार्वेकरांच्या निकालाला हायकोर्टात आव्हान देण्यात आले आहे.

मुंबई — सामाजिक कार्यकर्त्या अंजली दमानिया यांना जीवे मारण्याची धमकी मिळाल्याची धक्कादायक माहिती समोर आली आहे. स्वतः दमानिया यांनीच ही बाब उघड सांगितली. त्या म्हणाल्या की, काही विश्वसनीय सूत्रांकडून “माझा गेम केला जाणार” असा गंभीर इशारा मिळाल्याची माहिती त्यांना एका वरिष्ठ अधिकाऱ्यांनी दिली आहे.

अंजली दमानिया म्हणाल्या की, “मी अमेरिकेत असताना मला एका सीनियर अधिकाऱ्यांचा फोन आला. त्यांनी सांगितले की त्यांच्या हाताला काही इनपुट मिळाले आहेत की तुमचा गेम केला जाणार आहे. काही लोकांना वाटतंय की ‘यांच अति होतोय, यांचा गेम करायचाच’, अशा चर्चा त्यांच्या कानावर आल्या आहेत.” त्या पुढे म्हणाल्या की, “मला सांगण्यात आलं की तुम्ही प्रवासादरम्यान गाड्या बदलून वापरा, गाडी चालवताना फोन बंद ठेवा. फोन स्विच ऑफ ठेवलात तर चांगलं, असे स्पष्ट निर्देश मला देण्यात आले.”

या प्रकरणाची माहिती संबंधित अधिकाऱ्यांनी मुख्यमंत्री देवेंद्र फडणवीस यांनाही दिली असून त्यांनी तत्काळ राज्य सरकारला याबाबत सावधगिरीचे निर्देश दिल्याचे दमानिया यांनी सांगितले. त्यांनी पुढे उघड केले की, “सामाजिक कार्यकर्ते मनोज जरांगे पाटलांना जीवे मारण्याची धमकी मिळाली त्या फोनच्या आदल्या दिवशीच मला हा इशारा मिळाला होता.”

धमकीचे गांभीर्य लक्षात घेता अधिकाऱ्यांनी त्यांना सुरक्षा घेण्याचा सल्ला दिला असला तरी दमानिया यांनी ती नाकारली आहे. त्या म्हणाल्या, “मला सिक्युरिटी घ्यायला सांगितलं आहे. मी एकदा नाही, दोनदा लिहून दिलं आहे की मला सिक्युरिटी नको आहे. मी सिक्युरिटी घेणार नाही. मी माझं काम सुरू ठेवणार.”