माजलगाव — जळगाव जिल्ह्यातील सुमारे 30 ऊसतोड मजुरांना माजलगाव तालुक्यातील कवडगावथडी येथे डांबून ठेवल्याचा प्रकार उघडकीस आला आहे. या मजुरांकडून जबरदस्तीने वेठबिगारी करून घेतली जात होती आणि त्यांना धमक्या दिल्या जात होत्या. पोलिसांनी या प्रकरणी गुन्हा दाखल केला आहे
जळगावच्या मजुरांना डांबून ठेवण्यात आल्याची माहिती जिल्हा पोलिस अधीक्षकांना मिळताच त्यांच्या निर्देशानुसार तातडीने मोहिम राबवून सर्व मजुरांची सुटका करण्यात आली आहे. या प्रकरणात तक्रारदार सखाराम तुकाराम सोनवणे वय 25 वर्ष, रा. धरणगाव जि. जळगाव, सध्या रा. कवडगावथड यांनी पोलिसांत दिलेल्या तक्रारीत म्हटले आहे की ते पत्नी, दोन मुली, आई यांच्यासह मजुरी करून उपजीविका चालवतात. दसऱ्यानंतर दोन दिवसांनी ऊसतोड मुकादम बाळु मगरे रा. पाथरवाडा, जि. जालना यांनी त्यांचा भाऊ देवाजी सोनवणे याला ऊसतोडीसाठी नेले. त्यानंतर सखाराम यांना फोन करून “तुम्ही कवडगाव येथे लगेच या, नाही आलात तर तुमचा भाऊ सोडणार नाही.”अशी धमकी दिली. यानंतर सखाराम यांच्यासह कुटुंबातील ज्योती, संगीता, पद्माबाई, दिपाली, रुपाली सोनवणे यांसह इतर 8-10 जणांनी 6 ऑक्टोबर रोजी कवडगावथडी गाठले. तिथे आधीपासून देवाजी सोनवणे आणि इतर 20-22 जणांसह एकूण तीस मजूर डांबून ठेवलेले होते.तेथे सोमेश्वर आबा आणि त्याचा मुलगा गणेश यांनी “ट्रॅक्टर भरा, काम करा, नाही तर हातपाय बांधून गंगेत फेकून देऊ.” अशा धमक्या देत शिवीगाळ केली. मजुरांना जेवणही दिले नाही. फड मालकांनी दिलेलेच जेवण खाऊन त्यांना काम करावे लागत होते. मुकादम बाळु मगरे उचल रक्कम न देता मजुरांना सतत कामाला लावत होता. सोबत असलेल्या लहान मुलांनाही ऊसतोडीचे काम करायला लावण्यात आले.
दरम्यान 14 नोव्हेंबर रोजी काम सुरु असताना तहसिलदार, पोलीस अधिकारी, जळगावमधील अधिकारी तसेच महिला पोलिसांनी घटनास्थळी पंचनामा करून तीसही मजूरांची सुटका करून तहसील कार्यालयात सुरक्षितपणे हलवले.
या प्रकरणी ग्रामीण पोलीस ठाण्यात मुकादम बाळु मगरे, ट्रॅक्टर मालक सोमेश्वर आबा, त्याचा मुलगा गणेश अशा तिघांवर गुन्हा दाखल करण्यात आला आहे. या प्रकरणाचा पुढील तपास पोलीस उपनिरीक्षक पवन निंबाळकर करीत आहेत.

आष्टी — ग्रामपंचायत कार्यालयाचे कुलूप तोडून आत प्रवेश करत कागदपत्र पेटवून दिल्याची घटना शुक्रवारी रात्री आष्टी तालुक्यातील सुलेमान देवळा येथे उघडकीस आली. या आगीत महत्त्वाचे दस्तऐवज फाईल व 40 ते 45 रजिस्टर जळून खाक झाले. दारूच्या नशेत हा प्रकार घडला असल्याचं सांगितलं जात असून अज्ञात व्यक्तीने हे कृत्य केल्याचं सांगण्यात येत आहे ‌
सुलेमान देवळा येथील एका दारूने झिंगलेल्या व्यक्तीने शुक्रवारी रात्री हातात कुर्‍हाड घेऊन ग्रामपंचायतीचे कुलूप तोडून आतमध्ये प्रवेश केला.महत्त्वाचे दस्तऐवज अस्ताव्यस्त करत पेटवून दिले. या लावलेल्या आगीत 40ते 45 रजिस्टर व महत्वाचे दस्तऐवज,फाइल जळून खाक झाले. अशी माहिती गावकऱ्यांनी ग्रामविकास अधिकारी त्र्यंबक मुळीक यांना दिली.दरम्यान, आज ग्रामविकास अधिकारी मुळीक, सरपंच दादा यदु घोडके, अतुल पोपट घोडके, भिमराव सुखदेव भादवे, सचिन भगवान खोरदे, नवनाथ,एकनाथ भोजे या पंचाच्या उपस्थितीत नुकसानीचा पंचनामा करण्यात आला. या प्रकरणी गुन्हा दाखल करण्यात येणार असल्याचे ग्रामविकास अधिकारी मुळीक यांनी सांगितले.सरपंचाकडून आर्थिक पिळवणूक
येथील सरपंच हे वैयक्तिक कामासाठी व घरकुलाच्या हप्त्यापोटी पैशाची मागणी केल्याशिवाय हप्ता देत नाहीत. त्याच्याकडून सातत्याने मनमानी कारभार सुरू आहे. तसेच गेल्या तीन वर्षापासून ग्रामसभा न झाल्यामुळे, आपली व्यथा मांडायची कोणापुढे या भावनेतून कदाचित एखाद्या ग्रामस्थांने हि घटना केली असावी, असे समाजसेवक परमेश्वर घोडके यांनी सांगितले.

बीड — बैलजोडी चोरीला गेली आहे असा बनाव तयार करून पोलिसात खोटी तक्रार देणाऱ्या पिंपरखेड येथील दोन भावा विरोधात वडवणी पोलिसात गुन्हा दाखल करण्यात आला आहे.
. जिल्ह्यात खोट्या तक्रारी देऊन पोलिसांना कामाला लावण्याचे प्रकार उघडकिस आल्यानंतर पोलिसांनीही फिर्यादीवरच गुन्हे दाखल केल्यामुळे अशा प्रकारांना आळा बसला होता. दरम्यान वडवणी पोलिसांमध्ये पुन्हा असाच काहीसा प्रकार घडला आहे. पिंपरखेड येथील संपत त्रिंबक निपटे व त्याचा भाऊ मदन निपटे यांनी दीड लाख रुपये किमतीची बैलजोडी चोरीला गेली असल्याची तक्रार दाखल केली. चोरीची घटना घडून इतके दिवस तुम्ही तक्रार देण्यासाठी का आला नाहीत तसेच बैल जोडी संदर्भात आर्थिक व्यवहार काही होता का? अशी विचारणा देखील एपीआय वर्षा व्हगाडे यांनी वारंवार तक्रारदाराकडे केली होती.
पोलिसांनी याप्रकरणी तपासाची चक्र फिरवली असता सदर बैलजोडी ही श्रीकांत चंद्रकांत मगर, राहणार भावठाणा , तालुका आंबेजोगाई,बीड या शेतकऱ्याकडे असल्याची गोपनीय माहिती मिळाली. पोलिसांनी त्यास समक्ष पोलीस ठाणे येथे बैल जोडीसह आणले. यावेळी श्रीकांत मगर यांनी ही बैल जोडी बाबाराव डाके, राहणार टकारवाडी, तालुका माजलगाव, याचे कडून विकत घेतल्याचे सांगितले, त्यानंतर पोलिसांनी मध्यरात्री टकारवाडी,येथे जावून बाबाराव डाके यांचेकडे चौकशी केली असता, त्याने ही बैल जोडी तक्रारदार संपत निपटे
राहणार पिंपरखेड,यास पैसे देऊन विकत घेतली, असे सांगितले त्यानंतर पोलिसांनी पुन्हा विश्वासात घेऊन तक्रारदाराची चौकशी केली असता त्यानेच हा बैलचोरीचा खोटा बनाव केल्याचे तपासात निष्पन्न झाले. त्यामुळे सदर तक्रारदार संपत नीपटे व त्यांचे भाऊ मदन निपटे यांचे विरोधात पोलीस ठाणे वडवणी येथे पोलीस अंमलदार नितीन काकडे यांचे सरकारतर्फे फिर्यादीवरून “सर्व परिस्थिती माहिती असताना देखील पोलिसांचे कायदेशीर अधिकाराचा गैरवापर करण्यासाठी पोलिसांना खोटी माहिती देवून त्यांची दिशाभूल करने या कलमांतर्गत गुन्हा दाखल करण्यात आला आहे. यानंतर पोलिसांनी श्रीकांत मगर या शेतकऱ्यास ही बैलजोडी परत केल्याने त्याने त्यांनी व त्यांचे कुटुंबीयांनी वडवणी पोलिसांचे आभार मानले व कोणत्याही नागरिकांनी स्वतःच्या फायद्यासाठी खोट्या तक्रारी दाखल करू नये, असे आवाहन वडवणी पोलिसांनी केले आहेत.

सोने चांदी नगदी सह साडेपाच लाखाचा मुद्देमाल जप्त

बीड — दिवसाढवळ्या घरफोडीसह दरोडा चोरी खून यासारख्या 20 हून अधिक गुन्हे दाखल असलेला अट्टल गुन्हेगाराला जेरबंद करण्यात स्थानिक गुन्हे शाखेला मोठे यश आले आहे. त्याच्याकडून पाच घरफोडीचे गुन्हे उघड झाले असून चोरीचा साडेपाच लाख रुपये किमतीचा मुद्देमाल जप्त करण्यात आला आहे ‌
याबाबत अधिक माहिती अशी की, विविध गुन्ह्यांमध्ये पोलिसांना हवा असलेला तसेच यापूर्वी मकोका अंतर्गत कारवाई झालेला आरोपी संदीप ईश्वर भोसले रा. बेलगाव ता. कर्जत जि.अहिल्यानगर हा गेवराई तालुक्यातील राक्षस भुवन फाटा येथील हॉटेलवर जेवणाचे पार्सल घेण्यासाठी येणार असल्याची खात्रीलायक माहिती स्थानिक गुन्हे शाखेचे पोलीस निरीक्षक शिवाजी बंटेवाड यांना मिळाली. तात्काळ त्यांनी पोउपनि. श्रीराम खटावकर यांची टीम रवाना केली. या ठिकाणी पोलिसांनी सापळा लावला असता संदीप भोसले हा जेवणाचे पार्सल घेण्यासाठी आला. मात्र पोलिसांचा संशय आल्यामुळे त्याने पळून जाण्याचा प्रयत्न केला. मात्र पोलिसांनी तात्काळ झडप घालत त्याला जेरबंद केले.परंतु संदीप भोसले याला मोटार सायकल वरून घेऊन आलेला भगवान ईश्वर भोसले याने उसाच्या शेताचा आधार घेत पळून जाण्यात यश मिळवले. पकडलेल्या संदीप भोसले ला पोलिसांनी विचारणा केली असता पिंपळनेर, नेकनूर व शिरूर भागात आपला भाऊ भगवान भोसले च्या मदतीने दिवसा घरफोडी केल्याचे कबूल केले. आरोपी संदीप भोसले याच्याकडून चोरून नेलेल्या मुद्देमाला पैकी चार लाख 41 हजार 100 रुपये किमतीचे सोने व चांदीचे दागिने व नगदी तसेच गुन्ह्यात वापरलेली 90 हजार रुपये किमतीची मोटार सायकल हस्तगत करण्यात आली. पुढील तपास कामी पिंपळनेर पोलिसांच्या स्वाधीन करण्यात आले आहे.‌ पिंपळनेर पोलीस ठाण्यात संदीप भोसले याच्यावर दोन गुन्हे दाखल आहेत.
दरम्यान पोलीस अधीक्षक नवनीत कावत पोलीस उपाधीक्षक सचिन पांडकर, पोनि शिवाजी बंटेवाड यांच्या मार्गदर्शनाखाली सपोनि धनराज जारवाल,पोनि श्रीराम खटावकर, पोह. सोमनाथ गायकवाड अशोक दुबाले बाळू सानप राहुल शिंदे विकास राठोड अंकुश वरपे आश्पाक सय्यद मनोज परजणे विकी सुरवसे नितीन वडमारे सिद्धार्थ मांजरे या स्थानिक गुन्हे शाखेच्या पथकाने कामगिरी पार पाडली. या प्रकरणाचा पुढील तपास पिंपळनेर पोलीस करत आहेत.

माझगाव — दिवाणी सत्र न्यायालयातल्या लिपिकाने 15 लाख रुपयांची लाच स्वीकारली. याशिवाय लिपिकानं अतिरिक्त सत्र न्यायाधीशांना काॅल करून‌ रक्कम स्वीकारू का विचारलं, त्यावर न्यायाधीशांनी देखील संमती दिली.यामुळे आता लिपिकासह न्यायाधीशांवरही गुन्हा दाखल करण्यात आला आहे. लिपिकासह न्यायाधीश लाच प्रकरणात एसीबीच्या जाळ्यात अडकल्याने खळबळ उडाली आहे.
याबाबत मिळालेली माहिती अशी की, लाचलुचपत प्रतिबंधक विभागानं लिपिक चंद्रकांत हनमंत वासुदेव याला 15 लाख रुपयांची लाच घेताना अटक केली. तक्रारदाराच्या बाजूनं निकाल लावण्यासाठी क्लार्कने 25 लाखांची मागणी केली होती. त्यानं पैसे घेताच फोन लावला आणि न्यायाधीशांनीही ते घेण्यासाठी संमती दिली. आता या प्रकरणी न्यायाधीशांच्या अटकेसाठी प्रयत्न सुरू आहेत.
तक्रारदाराच्या पत्नीच्या कंपनीची जागा बळजबरीने ताब्यात घेतल्याचा वाद गेल्या 10 वर्षांपासून न्यायालयात चालू आहे. याची याचिका उच्च न्यायालयात दाखल केली आहे पण केस दिवाणी सत्र न्यायालयात वर्ग केली होती. 9 सप्टेंबरला कोर्टात गेल्यावर लिपिकानं तक्रारदाराशी संपर्क साधला. यानंतर निकाल बाजूने लावण्यासाठी 25 लाख रुपयांची मागणी केली.
न्यायाधीशांच्या माध्यमातून निकाल तुमच्या बाजूने लावतो म्हणून २५ लाख मागितले. यातले १० लाख मला आणि १५ लाख न्यायाधीशांना द्यावे लागतील असं सांगितलं. यानंतर सतत कॉल करून पैशांची मागणी केली. पण इतके पैसे देणं शक्य नसल्यानं तक्रारदाराने थेट एसीबीकडे तक्रार केली.
लिपिक वासुदेव यानं शेवटी 25 ऐवजी 15 लाखांवर तडजोड केली. यासाठी सापळा रचून 11 नोव्हेंबरला त्याला अटक केली. अटकेनंतर वासुदेवनं न्यायाधीश एजाजुद्दीन सलाउद्दीन काझी यांना कॉल करत लाचेची रक्कम स्वीकारल्याचं सांगितलं. न्यायाधीशांनी संमती दर्शवताच पोलिसांनी वासुदेवसह काझींविरोधात गुन्हा दाखल केला. पोलिसांनी न्यायाधीशांच्या अटकेसह घराची झडती घेण्यासाठी परवानगी मागितली आहे. परवानगी मिळाल्यानंतर पुढील कारवाई केली जाणार असल्याचं सांगण्यात येत आहे

आष्टी — हिंगणी जवळील सिना नदीपात्रात महसूल पथकाने छापा टाकल्यानंतर आणि बेकायदेशीर उत्खननात सहभागी असलेल्या वाहनांना जप्त केल्यानंतर वाळू माफियांनी एका महिला अधिकाऱ्यासह महसूल विभागाच्या पथकावर हल्ला केला आहे.बुधवारी सायंकाळी ५.४५ च्या सुमारास ही घटना घडली. हल्लेखोरांनी एका अधिकाऱ्याला लोडर वाहनाखाली चिरडण्याचा प्रयत्न केला, परंतु त्याच्या सहकाऱ्यांनी त्याला वेळीच वाचवले. याप्रकरणी नऊ जणांविरोधात गुन्हा दाखल करण्यात आला असून दोन आरोपींना अटक करण्यात आली आहे.

आष्टी तालुक्यातील हिंगणीजवळील सीना नदीच्या पात्रातून बेकायदेशीर वाळू उत्खनन होत असल्याची माहिती मिळाल्यानंतर तहसीलदार वैशाली पाटील यांनी त्यांच्या पथकासह छापा टाकला. कारवाईदरम्यान, एक बॅकहो लोडर मशीन, तीन ट्रॅक्टर, एक ट्रॅक्टर ट्रॉली आणि ३० ब्रास वाळू जप्त करण्यात आली. ज्यांची एकूण किंमत ५१ लाख रुपयांपेक्षा जास्त आहे. जप्त केलेल्या वस्तू महसूल विभागाचे पथक तहसील कार्यालयात नेत असताना, आष्टी शहरात एका पांढऱ्या कारने त्यांचा मार्ग अडवला.

जप्त केलेली वाहने आणि साहित्य परत मिळवण्यासाठी तीन जणांनी गाडीतून उतरून तहसीलदार पाटील आणि इतर कर्मचाऱ्यांवर हल्ला केला. एका हल्लेखोराने बॅकहो लोडर वाहन चालवणाऱ्या तलाठी सचिन तेलंग यांना ढकलले. तर, दुसऱ्याने साक्षीदार सूरज कोकणे यांना ढकलले. त्यानंतर त्यांच्या तिसऱ्या साथीदाराने लोडर वाहन थेट तेलंगकडे वळवून त्याला मारण्याचा प्रयत्न केला. तथापि, महसूल पथकाच्या इतर सदस्यांनी त्यांना सुरक्षित ठिकाणी नेल्याने ते वाचले.

दरम्यान, दोन कारमधून आणखी चार जण घटनास्थळी पोहोचले आणि जप्त केलेले ट्रॅक्टर रोखण्यासाठी प्रयत्न केला. त्यानंतर झालेल्या गोंधळात हल्लेखोरांनी तलाठी प्रवीण शिंदे यांच्याकडून जप्त केलेला एक ट्रॅक्टर जबरदस्तीने घेऊन जाण्यात यश मिळवले. पोलिसांच्या माहीतीनुसार, महसूल पथकाला अखेर बॅकहो लोडर वाहन आणि त्याचा चालक महेश आसावर यांना पकडण्यात यश आले. याप्रकरणी नऊ जणांविरोधात गुन्हा दाखल करण्यात आला आहे