विकासाचे टायमिंग साधणाऱ्या घड्याळाला मतदान करा

गेवराई —  गेवराई चे पवार हे दलित व मुस्लिम समाजाचा द्वेष करणारे आहे. मागील जिल्हा परिषद व पंचायत समिती निवडणुकीसाठी समाजला ४ जागा सुटल्या असताना या दलित द्वेषी पवारांनी आंबेडकरी समाजाला प्रतिनिधित्व दिले नव्हते. तसेच आता ही सौ. वैशाली किशोर कांडेकर यांची उमेदवारी मागे घेण्यासाठी या पवारांनी पप्पू कागदे यांचे पाय धरले आशा या दलित आणि मुस्लिम यांचा द्वेष करणाऱ्या पंडित-पवार युतीला पराभूत करा व माजी आ. अमरसिंह पंडित व आ. विजायसिंह पंडित यांचे हात बळकट करण्यासाठी विकासाचे टायमिंग साधण्यासाठी घड्याळाला मतदान करा असे आवाहन आरपीआयचे तालुकाध्यक्ष किशोर कांडेकर यांनी केले.

गेवराई नगर परिषद निवडणुकीतील राष्ट्रवादी काँग्रेस पार्टीच्या नगराध्यक्षा व नगरसेवक पदाच्या उमेदवाराच्या प्रचारार्थ आयोजित सभेमध्ये ते बोलत होते. पुढे बोलताना ते म्हणाले की, या पवारांनी नेहमीच दलित व मुस्लिम द्वेषाची भुमिका घेतलेली आहे. याचा प्रत्यय मागील जिल्हा परिषद व पंचायत समिती निवडणुकीत आला होता. यांनी ४ जागा दलित समाजाला सुटल्या असताना एका ही जागेवर आंबेडकरी समाजाला प्रतिनिधित्व दिले नव्हते. तसेच नगराध्यक्ष पदावर मुस्लिम उमेदवार निवडून येऊ नये यासाठी ही प्रयत्न केले होते. हेच पवार आता १० वर्ष आमदारकी भोगून स्वतः च्या भावजयीला नगराध्यक्षा करण्यासाठी विकासाचे ढोंग करत आहेत. यांचा विकास म्हणजे नगरपरिषद चा निधी स्वतः च्या शेतात वापरून स्वतः च्या जमीनीचे भाव वाढवणे होय.

पुढे बोलताना ते म्हणाले की, गेवराई शहराची निवडून असताना पवार मात्र केलेल्या विकास कामावर व शहराच्या विकासाच्या व्हिजन वर बोलण्या ऐवजी पोथी-पुराण व ग्रामीण भागातील गप्पा मारत भाषण ठोकत आहेत. ही निवडणूक शहरातील मुद्द्यांची असल्याचे भान पवारांनी ठेवले पाहिजे. असे प्रतिपादन त्यांनी केले.

याउलट माजी आमदार अमरसिंह पंडित व विजयसिंह पंडित यांनी नेहमीच सर्व जाती धर्मातील लोकांना सोबत घेऊन विकासाचे राजकारण केलेले आहे. भैय्यासाहेब यांनीच आरक्षित जागेवर बंजारा उमेदवार देऊन निवडून ही आणलेला आहे. मुजीब भाई सारख्या अल्पसंख्याक समाजातील तरुणाना बाजार समितीचे सभापती केले. कुमारराव ढाकणे, जगन पाटील काळे व जगन्नाथराव काळे यांसारख्यांना पदे देऊन सामाजिक बांधिलकी जोपासली आहे.त्यामुळे या स्वार्थ व ढोंगी पवारांना पराभूत करण्यासाठी व शहराचा सर्वसमावेशक विकास करण्यासाठी घड्याळाला मतदान करून राष्ट्रवादी काँग्रेस पार्टीच्या नगराध्यक्षा व नगरसेवक पदाच्या सर्व उमेदवारांना भरघोस मतांनी निवडून द्या. असे आवाहन त्यांनी केले.

राष्ट्रवादी आणि मित्रपक्षाच्या उमेदवारांच्या प्रचारार्थ बीडच्या बशीरगंजमध्ये विराट जाहिर सभा

बीड — मी तुम्हाला समजून सांगायला आलोय, तुम्हाला ऐकायचे असेल तर एैका, मी बारामतीत करून दाखवले आहे, मी पिंपरी चिंचवडमध्ये करून दाखवले आहे ते मला बीडमध्ये करायचे आहे. तुमची साथ असेल तर मी बीडमध्ये विकास करून दाखवेन, हा अजित पवारचा शब्द आहे आणि मी शब्दाला पक्का आहे, मी करून दाखवतो, मला फक्त संधी द्या. इथल्या सत्ताधाऱ्यांनी 35 वर्षे आपल्या लोकांना वाऱ्यावर सोडून इथले मुलभूत प्रश्न रखडत ठेवले, आत्मपरिक्षण करा, डोळे उघडा, आता चांगली संधी आलेली आहे. माझ्या विचाराच्या माणसाला निवडून द्या, काळजी करू नका स्वतः उभे आहात असे समजून सद्सद्‌‍ विवेक बुध्दीने मतदान करून मला बीडचा चेहरा-मोहरा बदलण्याची संधी मला द्या असे आवाहन उपमुख्यमंत्री तथा बीड जिल्ह्याचे पालकमंत्री ना. अजितदादा पवार यांनी केले. राष्ट्रवादी काँग्रेस-शिवसेना-शिवसंग्राम-सपा व मित्रपक्षाच्या उमेदवारांच्या प्रचारार्थ आयोजित केलेल्या जाहिर सभेत ते बोलत होते. यावेळी विराट संख्येने उपस्थिती असल्यामुळे राष्ट्रवादी व मित्रपक्षांच्या उमेदवारांचा विजय निश्चित झाला आहे.

बीड नगर परिषद निवडणुकीतील राष्ट्रवादी काँग्रेस पक्ष-शिवसेना-शिवसंग्राम-सपा मित्रपक्षाच्या नगराध्यक्ष पदाच्या उमेदवार श्रीमती प्रेमलता पारवे यांच्यासह नगरसेवक पदाच्या 52 उमेदवारांच्या प्रचारार्थ ना.अजितदादा पवार यांच्या प्रमुख उपस्थितीत शहरातील बशीरगंज चौक येथे जाहिर सभेचे आयोजन करण्यात आले होते. यावेळी माजीमंत्री नवाब मलिक, आ. विजयसिंह पंडित, राष्ट्रवादी काँग्रेस पक्षाचे जिल्हाध्यक्ष राजेश्वर चव्हाण, राष्ट्रवादी काँग्रेस पक्षाचे निरीक्षक संजय दौड, शिवसंग्रामच्या राष्ट्रीय नेत्या श्रीमती ज्योतीताई मेटे, शिवसेना शिंदे गटाचे जिल्हा प्रमुख अनिल जगताप, राष्ट्रवादी युवकचे जिल्हाध्यक्ष बळीराम गवते, सावता परिषदेचे संस्थापक अध्यक्ष कल्याण आखाडे, अल्पसंख्यांक आघाडीचे शेख निजाम, राष्ट्रवादी काँग्रेसचे शहराध्यक्ष अमर नाईकवाडे, तालुकाध्यक्ष राजेंद्र राऊत, माजी नगरसेवक फारुक पटेल, राष्ट्रवादीच्या महिला आघाडीच्या जिल्हाध्यक्षा सौ.प्रज्ञाताई खोसरे, राष्ट्रवादीच्या युवती अध्यक्षा प्रिया डोईफोडे, रेखा फड, माजी नगराध्यक्ष मोईन मास्टर, दिलीप गोरे, झुंजार धांडे, सुहास पाटील, भागवत तावरे, पांडुरंग आवारे, सुनिल मगरे, गोरक्ष लोखंडे यांच्यासह नगराध्यक्ष पदाच्या उमेदवार श्रीमती प्रेमलता पारवे तसेच सर्व नगरसेवक पदाचे उमेदवार, पदाधिकारी, कार्यकर्ते मोठ्या संख्येने उपस्थित होते.

पुढे बोलताना ना. अजितदादा पवार म्हणाले की, बीड शहरात अनेक प्रश्न रखडत पडलेले आहेत. रस्ते नाहीत, नाल्या नाहीत, रस्त्याच्या मधोमध विद्युत खांब आहेत, मुला-मुलींना खेळण्यासाठी क्रीडांगण नाही, उद्यान नाही, आलेला निधी खर्च केलेला नाही, रस्त्याच्या बाजूला झाडे लावलेली नाहीत असे अनेक प्रश्न प्रलंबित आहेत. विरोधकांनी 35 वर्षे बीडची अवस्था बकाल करून टाकली, बारामती, पिंपरी चिंचवडचा विकास होवू शकतो मग बीडचा का नाही होवू शकत नाही ? असा प्रश्न उपस्थत करून तिकडे व्हिजन असणारे लोक आहेत आणि इकडे लोकांना वाऱ्यावर सोडून स्वतःचे घर भरणारे लोक असल्यामुळे आपली अवस्था अशी झालेली आहे. या भागातील खासदार झाले, आमदार झाले यांनी आत्तापर्यंत काय केले ? झोपा काढल्या का ? असा सवालही त्यांनी उपस्थित केला. ज्ञानराधा, साईराम, माँसाहेब आणि छत्रपती अशा पतसंस्थांच्या कुटे, परभणे, शिंदे आणि भंडारी या लोकांनी सामान्य लोकांचा पैसा लुटला. त्यातल्या तिघांना आम्ही जेलमध्ये पाठवले, एक फरार आहे. चुकीला माफी नाही, काम करत असताना काही कठोर निर्णय घ्यावे लागतील तेंव्हा सुधारणा होतील आणि सुधारणा करण्यासाठी आपल्या विचाराची माणसं नगर परिषदेत पाठवावी लागतील. तुम्ही कचरा निर्माण करणाऱ्या माणसाला निवडून द्याल तर या बीडचा कचरा होईल स्वच्छता करणाऱ्या स्वच्छ विचाराच्या माझ्या माणसांना विजयी करा असे सांगून हावसे-नवसे-गवसे येतील, रात्रीतून गडबड करतील त्यांच्या भुलथापांना बळी पडू नका, येणाऱ्या 2 तारखेला घडी आणि धनुष्यबाण या चिन्हासमोरचे बटन दाबून मला काम करण्याची संधी द्या असे कळकळीचे आवाहन ना. अजितदादा पवार यांनी केले.
यावेळी बोलताना माजीमंत्री नवाब मलिक म्हणाले की, ही निवडणुक बीडचे भविष्य बदलणारी निवडणुक आहे, मनात किंतु-परंतु न ठेवता, प्रशासकीय अनुभव असणाऱ्या प्रेमलता पारवे यांच्यासह मित्रपक्षाचे सर्वच्या सर्व उमेदवार प्रचंड मताधिक्याने विजयी करा. ना. अजितदादा पवार यांच्यासारखा विकास पुरुष आपल्या पाठिशी आहे, त्यांच्या माध्यमातून बीडची बारामती करा, सर्व धर्म समभाव विचार घेऊन आम्ही, सर्व जाती-धर्माच्या लोकांना सोबत घेऊन काम करत आहोत, तेंव्हा आपल्या विचाराची माणसं सत्तेत पाठवा असे आवाहन त्यांनी यावेळी केले.

यावेळी बोलताना डॉ.ज्यातीताई मेटे म्हणाल्या की, विरोधकाने नगर पालिकेचा वापर स्वार्थी राजकारण करण्यासाठी केला, अटल अमृत योजनेचा निधी कुठे गेला ? याचा जबाब तुम्ही त्यांना विचारला पाहिजे. विकासाचा ताळेबंद घेऊन चर्चा करा, बीड नगर परिषदेमध्ये परिवर्तन करण्याची संधी चालून आलेली आहे. त्यासाठी घड्याळ चिन्हासमोरचे बटन दाबून सर्व उमेदवारांना विजय करा असे आवाहन त्यांनी यावेळी केले.

यावेळी दिलीप गोरे व भागवत तावरे यांनीही मनोगत व्यक्त केले. तसेच सतिष क्षीरसागर, गौतम मोरे, आरेफ खान, फेरोज खान यांनी ना. अजितदादा पवार यांच्या उपस्थितीत राष्ट्रवादी काँग्रेस पक्षात जाहिर प्रवेश केला.

अजित पवार यांच्या माजलगाव, धारुर येथील जाहिर सभा झाल्यानंतर त्यांनी बशीरगंज चौकात जाहिर सभेच्या ठिकाणी आगमन होताच लगेच भाषणाला सुरुवात केली. आपल्या भाषणात त्यांनी बीडमध्ये काय करायचे आहे याचा विकास आराखडाच मांडला. त्यांच्या या सभेला महिला, पुरुष मतदार व कार्यकर्त्यांनी प्रचंड गर्दी केली होती. सभास्थळी मिळालेला उत्स्फुर्त प्रतिसाद आणि उत्साह राष्ट्रवादी आणि मित्रपक्षाच्या सर्व उमेदवारांच्या विजयावर शिक्कामोर्तब झाला आहे.

बीड — मुस्लिम मतांमध्ये फूट, ब्राह्मण मारवाडी दावणीलाच बांधलेला, ओबीसी तर आपलाच, मराठा समाज दोन्ही राष्ट्रवादीत विभक्त होणार गल्ली ते दिल्ली आपलीच सत्ता, बीडची जनता निव्वळ दूधखुळीच, उगाच 35 वर्ष सत्ता आपल्याला दिली नाही. या अशाच गृहीतकाच्या “पप्पू” राजकारणामुळे विधानसभेत जनतेने फटका देऊनही पुन्हा नगरपालिका आपलीच असं म्हणत “राष्ट्रीय पक्षाच धरलं बोट तिथेच दिसली नियतीतली खोट” असं म्हणताना जनतेने देखील योगेश क्षीरसागर कडे पाठ फिरवत आहे.
धर्मनिरपेक्षतेची कौटुंबिक परंपरा चालवणारे योगेश क्षीरसागर अचानक धार्मिक राजकारण करणाऱ्या पक्षात जाऊन भविष्यात पक्ष धोरणानुसार गरळ ओकणार नाहीत याची शाश्वती कोणीच देणार नाही. शेवटी स्वार्थाच राजकारण महत्त्वाचं बीडची जनता दुधखूळीच ती आपल्या मागे येणारच उगाच 35 वर्ष जनतेने नगरपालिकेचे सत्ता दिली नव्हती. ती आताही देणारच याचा ठाम विश्वास बीडकरांचा बळी गेला तर गेला. आपण भले आपलं स्वार्थी राजकारण भले एवढाच फंडा योगेश क्षीरसागरांनी वापरला. स्वार्थासाठी एका क्षणात धर्मांध पक्षाचं बोट धरताना गणित ही विजय मिळणारच अशी मांडली. बीडच्या राजकारणात एमआयएमच्या प्रवेशाने मुस्लिम मतं एम आय एम कडेच जाणार , ब्राह्मण मारवाडी तर भाजपच्या दावणीला बांधलेला आपल्याही तो हक्काचाच! ओबीसी मतं देखील आपलीच मराठा समाजाची मतं दोन्ही राष्ट्रवादीत विभक्त होणार तोडा फोडा राज्य करा या नीतीचा फायदा आपल्याला नक्कीच होणार? बीडच्या जनतेला कळतचं काय? आपण नगरपालिकेचे राजकुमार जनता आपल्यालाच कौल देणार! जनता लोकशाहीत नाही तर आपल्याच राजेशाहीची मांडलिक आहे.असं मांडलेलं गृहीतक बीडच्या जनतेला मात्र रुचलं नाही. ब्राह्मण आपलेच ते कुठेच जाणार नाहीत असं ग्राह्य धरून त्यांना रामराम घालायची देखील गरज नाही. असं म्हणत योगेश क्षीरसागरांची प्रचाराची मोहीम अगदी जोरात सुरू आहे.तीच स्थिती मारवाडी समाजाची देखील आहे. भाजपचा मूळचा कार्यकर्ता तर सतरंज्या उचलायला जन्माला आला आहे. त्यामुळे मिळत असलेली हीन भावना असंतोषाला कारणीभूत ठरत आहे.
मुस्लिम परिसरात सभा घेतली की ते आपोआपच एम आय एम कडे जाणार यासारखी गणित मांडून बुद्धिबळाचा “पप्पू” पट योगेश क्षीरसागरांनी खेळायला सुरुवात केली आहे.
बीडची जनता देखील “वस्ताद” आहे. डोक्यावर घेण्याची जनतेची ताकत आहे तर पायाखाली घेण्याची देखील तयारी ठेवली जाते. हा कौटुंबिक इतिहास गृहीतकाच्या राजकारणात योगेश क्षीरसागर पार विसरले. त्यांचेच काका जयदत्त क्षीरसागर या इतिहासाचे ज्वलंत साक्षीदार आहेत. त्यांना मानणारा वर्ग मोठा असला तरी धर्मांध पक्षाला जयदत्त क्षीरसागर देत असलेली साथ त्यांच्या सहकार्यांना देखील पटलेली नाही. जन्मभर भाजपच्या नावाने खडे फोडले आता कुठल्या तोंडाने भाजपला मत मागायची असा प्रश्न त्यांच्या पुढे पडला आहे. तो सहाजिकच आहे.
जनतेने दिलेल्या फटक्यामुळे राजकारणाचा सूर आजही त्यांना गवसण अवघड चालल आहे. हे मात्र लक्षात घेतलं गेलं नाही. विधानसभेत बीडच्या जनतेने योगेश क्षीरसागर यांना याची चुणूक दाखविली. मात्र नगरपालिका आपली जहागिरी आहे ती आपल्याच ताब्यात जनता देणार हा आत्मविश्वास वाखाणण्याजोगा असल्याचं पाहायला मिळत आहे. एकंदरच योगेश क्षीरसागर यांच्या भाजप प्रवेशानंतर आलेली उत्साहाची लाट ओसरली आहे. जनतेमध्ये नाराजीचा उमटत असलेला सूर बडवायला लावणार आहे उर असं म्हणण्याची वेळ आली आहे.

श्रीमती प्रेमलता पारवे यांच्यासह सर्व उमेदवारांच्या प्रचारार्थ

बहुसंख्येने उपस्थित राहण्याचे आवाहन

बीड — राष्ट्रवादी काँग्रेस पक्ष-शिवसेना-शिवसंग्राम-सपा व मित्रपक्ष आघाडीच्या नगराध्यक्ष पदाच्या उमेदवार श्रीमती प्रेमलताताई पारवे यांच्यासह सर्व नगरसेवक पदाच्या उमेदवारांच्या प्रचारार्थ उपमुख्यमंत्री तथा बीड जिल्ह्याचे पालकमंत्री ना. अजितदादा पवार यांच्या जाहिर सभेचे आयोजन बीड येथे करण्यात आले असून यावेळी बहुसंख्येने उपस्थित राहण्याचे आवाहन राष्ट्रवादी काँग्रेस पक्ष-शिवसेना-शिवसंग्राम-सपा व मित्रपक्षाच्या वतीने करण्यात आले आहे.

प्रचाराच्या अंतिम टप्प्यात नगराध्यक्ष पदाच्या उमेदवार श्रीमती प्रेमलताताई पारवे यांच्यासह सर्व उमेदवारांनी आघाडी घेतली असून त्यांच्या प्रचारार्थ बीड जिल्ह्याचे पालकमंत्री ना. अजितदादा पवार दुसऱ्यांदा बीड जिल्ह्याच्या दौऱ्यावर येत आहेत. प्रचाराच्या पहिल्या टप्प्यात ना. अजितदादा पवार यांनी आपल्या जाहिर सभेत विकासाचे व्हिजन मांडल्यामुळे बीड शहरात राष्ट्रवादी काँग्रेस पक्ष आणि मित्रपक्षाच्या कार्यकर्त्यासह मतदारांमध्ये उत्साह भरला होता. प्रचाराच्या अंतिम टप्प्यात ना. अजितदादा पवार यांच्या जाहिर सभेचे आयोजन करण्यात आले आहे. बीड शहरातील बशीरगंज चौक येथे आज सायं. ५.३० वाजता होणाऱ्या या सभेची जय्यत तयारी करण्यात आली असून या सभेने राष्ट्रवादी काँग्रेस व मित्रपक्षाच्या नगराध्यक्ष पदासह सर्व ५२ नगरसेवक पदाच्या उमेदवारांच्या विजयावर शिक्का मोर्तब होणार आहे.

उपमुख्यमंत्री तथा बीड जिल्ह्याचे पालकमंत्री ना. अजितदादा पवार यांच्यासह विविध मान्यवर यावेळी उपस्थित राहणार असून या जाहिर सभेस बहुसंख्येने उपस्थित राहण्याचे आवाहन आ. विजयसिंह पंडित, डॉ.ज्योतीताई मेटे, अनिलदादा जगताप, खमरूल इमान यांच्यासह कल्याणराव आखाडे, दिलीप गोरे, शेख मुजीब, अमर नाईकवाडे, फारुक पटेल, बळीराम गवते, अशफाक इनामदार, झुंजार धांडे, शेख निजाम, भिमराव वाघचौरे, विनोद मुळूक, बाळासाहेब गुंजाळ, रामसिंग टाक, विनोद हातागळे यांच्यासह राष्ट्रवादी काँग्रेस-शिवेसना-शिवसंग्राम-सपा आणि मित्रपक्षाच्या कार्यकर्त्यानी उपस्थित राहण्याचे आवाहन केले आहे.