1. बीड — स्थानिक गुन्हे शाखेच्या पथकाने माजलगाव तालुक्यातील पात्रुड येथे सापळा रचून एका इसमाला तब्बल ३३ किलो गांजासह रंगेहाथ पकडले. या कारवाईत गांजा आणि दुचाकीसह एकूण ७ लाख ४६ हजार रुपयांचा मुद्देमाल जप्त करण्यात आला आहे.

दिनांक २३ जानेवारी २०२६ रोजी स्थानिक गुन्हे शाखेच्या पथकाला गुप्त बातमीदाराकडून माहिती मिळाली की, एक इसम बजाज मोटार सायकलवरून गांजा विक्रीसाठी पात्रुड (ता. माजलगाव) येथे येत आहे. या माहितीवरून पोलीस उपनिरीक्षक सुशांत सुतळे यांच्या पथकाने पात्रुड परिसरात सापळा लावला. संशयित दुचाकी येताच पोलिसांनी अडवून झडती घेतली. त्याच्याकडे असलेल्या सॅक मध्ये ३३ किलो गांजा मिळून आला.
पकडलेल्या आरोपीचे नाव सय्यद अत्तार रहेमान सय्यद नौमान वय ३५ वर्षे, रा. परळी, जि. बीड असे आहे. आहे. पोलिसांनी घटनास्थळावरून गांजा आणि गुन्ह्यात वापरलेली दुचाकी असा एकूण ७ लाख ४६ हजार रुपयांचा मुद्देमाल जप्त केला आहे. आरोपीविरुद्ध माजलगाव ग्रामीण पोलीस ठाण्यात गुन्हा रजिस्टर क्रमांक २७/२०२६ नुसार कलम ८ (क) आणि २० (ब) गुंगीकारक औषधी द्रव्य, मनो व्यापारावर परिणाम करणारे पदार्थ अधिनियम 1985 अन्वये गुन्हा दाखल करण्यात आला आहे. या प्रकरणाचा पुढील तपास पोलीस निरीक्षक राहुल सूर्यतळ करत आहेत.
ही कामगिरी पोलीस अधीक्षक नवनीत काँवत, अपर पोलीस अधीक्षक श्रीमती चेतना तिडके, स्थानिक गुन्हे शाखेचे पोलीस निरीक्षक शिवाजी बंटेवाड आणि पोलीस निरीक्षक राहुल सूर्यतळ यांच्या मार्गदर्शनाखाली करण्यात आली. पथकात पीएसआय सुशांत सुतळे, हवालदार मारोती कांबळे, सुनील अलगट, रामचंद्र केकान, गोविंद भताने, सचिन आंधळे, बिभीषण
चव्हाण आणि चालक अतल हराळे यांचा सहभाग होता.

अंबाजोगाई — शेतात सालगडी म्हणून काम करणाऱ्याने पत्नीचा डोक्यात काठीने वार करून निर्घृण खून केला. त्यानंतर तिचा मृत्यू हृदयविकाराच्या झटक्याने झाल्याचा बनाव रचून मृतदेह अंत्यसंस्कारासाठी गावी नेला.मात्र, बर्दापूर पोलिसांच्या सतर्कतेमुळे हा बनाव उघड झाला.
अंत्यविधीच्या पूर्वीच मृतदेहासह बनाव करणाऱ्या पतीला ताब्यात घेण्यात आले आहे.
ही खळबळजनक घटना अंबाजोगाई तालुक्यातील बर्दापूर पोलीस ठाण्याच्या हद्दीतील हातोला शिवारात घडली आहे. शीलाबाई सुरेश शेरफुले वय 45 वर्ष, रा. आलुरा, ता. देगलूर, जि. नांदेड असे मृत महिलेचे नाव आहे. या घटनेने परिसरात मोठी खळबळ उडाली आहे.

मिळालेल्या माहितीनुसार, सुरेश शेरफुले हा हातोला येथील एका शेतकऱ्याच्या शेतात सालगडी म्हणून काम करण्यासाठी त्याच्या पत्नीसह राहत होता. मागील 3-4 दिवसांपासून तो गावाकडे जाऊ म्हणून पत्नीकडे आग्रह धरत होता, परंतु ती तयार नव्हती. याच कारणावरून दोघांत तीव्र वाद झाला असल्याची चर्चा आहे. रागाच्या भरात सुरेशने जाड भरीव काठीने शीलाबाईच्या डोक्यात एकामागून एक अनेक वार केले. या हल्ल्यात शीलाबाई रक्ताच्या थारोळ्यात कोसळल्या आणि त्यांचा जागीच मृत्यू झाला. त्यानंतर सुरेशने हा खून पचवण्यासाठी परिसरातील लोकांना आणि गावाकडे नातेवाईकांना शीलाबाईचा हृदयविकाराने मृत्यू झाल्याचे खोटे सांगितले.

गुन्हा लपवण्यासाठी सुरेशने तातडीने एक क्रुझर गाडी भाड्याने केली आणि मृतदेह घेऊन थेट देगलूर तालुक्यातील आलुरा गाठले. मात्र, बर्दापूर पोलिसांना या संशयास्पद मृत्यूची गुप्त माहिती मिळाली. बर्दापूर पोलीस ठाण्याचे सहायक पोलीस निरीक्षक कांबळे यांनी वेळ न घालवता देगलूर पोलिसांशी संपर्क साधला. देगलूरचे पोलीस उपनिरीक्षक गोपाळ सूर्यवंशी यांनी तातडीने आलुरा गाव गाठले. तिथे शीलाबाईच्या माहेरच्या लोकांनाही डोक्यावरील जखमा पाहून संशय आला होता. पोलिसांनी अंत्यसंस्कारापूर्वीच मृतदेह ताब्यात घेऊन पती सुरेशला ताब्यात घेतले.

सुरेश शेरफुले हा सध्या संशयित आरोपी हा अखेर बर्दापूर पोलिसांच्या ताब्यात असून मृतदेह शवविच्छेदनासाठी अंबाजोगाई येथील स्वाराती रुग्णालयात पाठवण्यात आला आहे. गुन्हा नोंदविण्याची प्रक्रिया सुरु असून त्यानंतर या गुन्ह्यात आणखी खुलासे समोर येतात का तसेच या घटनेमागचे नेमके कारण स्पष्ट होऊ शकलेले नाही. या घटनेचा अधिक तपास बर्दापूर पोलीस करित आहेत.

आष्टी — येथील तहसील कार्यालयातून वाळू माफियांनी चक्क जप्त केलेला वाळूचा टेम्पो पळवून नेल्याची खळबळजनक घटना गुरुवारी रात्री घडली. तहसीलदार वैशाली पाटील या रजेवर जाताच संधी साधून ६ ते ८ जणांच्या टोळीने कर्तव्यावर असलेल्या कर्मचाऱ्यांना धक्काबुक्की करत हा प्रताप केला आहे. आश्चर्य म्हणजे तहसीलच्या आवारातच ही घटना घडली आहे.
तहसीलदार वैशाली पाटील यांनी काही दिवसांपूर्वी अवैध वाळू वाहतूक करणारा एक टेम्पो पकडून तहसील कार्यालयात लावला होता. गुरुवारी वैशाली पाटील रजेवर गेल्या आणि प्रभारी तहसीलदार म्हणून विनोद रणविरे यांनी पदभार घेतला. रात्री ८:३० च्या सुमारे ८ वाळू माफिया तहसील कार्यालयाच्या पाठीमागील भिंतीवरून आत शिरले. त्यांनी तिथे कर्तव्यावर असलेल्या दोन कोतवालांना धक्काबुक्की करत हुज्जत घातली.माफियांनी जप्त केलेला टेम्पो चालू करून तो पळवण्यास सुरुवात केली. यावेळी कर्मचाऱ्यांनी त्यांना रोखण्याचा प्रयत्न केला असता, त्यांच्या अंगावर वाहन घालण्याचा प्रयत्न करण्यात आला. माफियांच्या या दहशतीमुळे कर्मचारी बाजूला झाले आणि त्यांनी टेम्पो पळवून नेला. माफियांचा दुसरा एक ट्रक पळवण्याचा प्रयत्न मात्र फसला.या सर्व घटनेचा थरार तहसील कार्यालयातील सीसीटीव्ही कॅमेऱ्यात कैद झाला असण्याची शक्यता आहे. या प्रकरणाची माहिती तात्काळ नायब तहसीलदार आणि जमाबंदी विभागाला देण्यात आली आहे. प्रभारी तहसीलदार विनोद रणविरे यांनी या घटनेला दुजोरा दिला असून, संबंधित गुंडांवर कठोर गुन्हे दाखल करण्यासाठी पोलिसांना पत्र देण्यात येणार असल्याचे सांगितले. आता या प्रकरणातील आरोपींना पोलीस कधी बेड्या ठोकतात, याकडे सर्वांचे लक्ष लागले आहे.

बीड — कडक शिस्तीचे कर्तव्यदक्ष, राजकीय दबावाला बळी न पडता काम करणारे म्हणून प्रतिमा असलेले पोलीस अधीक्षक नवनीत कांवत जीएसटी अधिकाऱ्याच्या आत्महत्ये प्रकरणात हतबल असल्याचं त्यांच्या कार्यपद्धतीला फाटेने फाट्यावर मारल्याचं बीडच्या जनतेने पाहिलं. जेवढी बीडमध्ये इज्जत कमावली ती मूदीराज च्या नादी लागून आमदाराच्या दबावा खाली येऊन मातीत घातली. जाधवर आत्महत्याप्रकरणी सात दिवसानंतरही कुटुंब एसपींची भेट घेतं. बीड ग्रामीण पोलीस ठाण्यासमोर धरण देतं. तरीही गुन्हा दाखल करायला वेळ घेतला जातो.एवढा शेळपटलेला कारभार सर्वसामान्य जनतेला काय न्याय देणार हा प्रश्न विचारला जाऊ लागला आहे.
आपल्याच महतीचा डंका वाजवायचा कायदा सुव्यवस्था निर्माण केली म्हणून सांगायचं पण वास्तव पाहतांना मात्र धृतराष्ट्रासारखी आंधळी भूमिका घ्यायची हीच पोलीस अधीक्षकांची कर्तव्यदक्षता असल्याचे चित्र जिल्ह्यात तरी पाहायला मिळत आहे.
सचिन जाधवर या जीएसटी अधिकाऱ्याचा संशयास्पदरीत्या आठ दिवसापूर्वी मृत्यू झाला. त्यांचा मृतदेह कपिलधार वाडीकडे जाणाऱ्या रस्त्याच्या कमानीजवळ कार मध्ये आढळला. शवविच्छेदन करण्यासाठी घेऊन जात असताना त्यांच्या खिशात पोलिसांना सुसाईड नोट आढळली. यामध्ये वरिष्ठ अधिकाऱ्याच्या त्रासाला कंटाळून आत्महत्या करीत असल्याचं तसेच प्रदीप फाटे या अधिकाऱ्याचं नाव
त्यांनी मृत्यूपूर्वी लिहिलं होतं. घटना घडल्याच्या दिवशीच त्यांची पत्नी मयुरी सचिन जाधवर गुन्हा दाखल करण्यासाठी ग्रामीण पोलीस ठाण्यात आल्या. त्यावेळी ठाणे प्रमुख मूदीराज यांनी गुन्हा दाखल करण्यास टाळाटाळ केली. वाटलं नंतर तरी गुन्हा दाखल होईल.मयुरी जाधवर दुःखात आहेत म्हणून कदाचित मूदीराज मधली माणुसकी जागी असेल म्हणून झाला नसेल असं वाटलं. त्यानंतरही मयुरी जाधवर व त्यांचे नातेवाईक वारंवार गुन्हा दाखल करण्यासाठी ग्रामीण पोलीस ठाण्याचे उंबरे झिजवत बसले.पण ठाणे प्रमुख मूदीराज यांना पाझर फुटलाच नाही. माणुसकीचं दर्शन झालच नाही. सुसाईड नोट मध्ये ज्या “प्रदीप फाटे” नावाच्या अधिकाऱ्याचं नाव आढळून आलं त्या फाटेला बोलावून घेत विचारपूस करण्याचा फार्स केला गेला. तपास होत नाही तोपर्यंत बीड सोडायचं नाही असं त्याला सांगितलं असल्याचं पोलीस सांगू लागले. या सुसाईड नोट मध्ये जीएसटी अधिकारी सचिन जाधवर यांनी काय लिहिलं आहे कोणाकोणाची नाव आहेत याची माहिती कुटुंबीयांना देणं गरजेचं होतं. पण ती देखील मोदीराज ने दिली नाही.कायद्यापेक्षा आपण श्रेष्ठ आहोत असं म्हणत आरोपी पुढे गोंडा घोळण्याचे काम केलं गेलं. न्यायासाठी मयुरी जाधवर यांनी पोलीस अधीक्षक नवनीत कावत यांची आठ दिवसानंतर आज भेट घेतली. काळीज पिळवटून टाकेल अशी दर्द भरी कहानी एसपींना सांगितली. हीच कहाणी मयुरी जाधववर यांनी माध्यमांसमोरही सांगितली गेल्या एक महिन्यापासून ते प्रचंड मानसिक तणावात होते, मला ऑफीसचं टेन्शन आहे असे ते सांगायचे. एवढेच नव्हे तर या घटनेच्या ८-१० दिवसा पुर्वी माझ्या मुलाचे शाळेतून अपहरण करण्याचा प्रयत्न झाल्याचेही जाधवर यांच्या पत्नीने माध्यमांना सांगितले. ऑफीसच्या बाहेर सुध्दा एका इनोव्हा गाडीला धक्का लागल्याच्या कारणावरून शिवीगाळ झाली होती, एवढेच नव्हे तर थांब तुला बघतो अशी धमकी दिल्याचा दावा देखील जाधवर यांच्या पत्नीने केला. अशा घटनांमधुन त्यांना जाणिवपुर्वक मानसिक त्रास दिला गेला. यामागे नेमकं काय होतं ? याची चौकशी होणे आवश्यक असल्याचे त्यांनी सांगितले. कार्यालयात नेमकं काय सुरू होतं ? याचाही तपास होणे गरजेचे असल्याच्या त्या म्हणाल्या. प्रदिप फाटे व कार्यालयातील त्याच्यासोबत आणखी दोन-तीन लोकं आहेत. त्यांची सुध्दा सखोल चौकशी झाली पाहिजे. सुसाईड नोटमध्येही प्रदिप फाटे याच्यासह त्याच्यासोबतचे कर्मचारी असा उल्लेख असल्याचे त्यांनी सांगितले.
मुलाच्या अपहरणासारखे धक्कादायक खुलासे मयुरी जाधवर यांनी नवनीत कावत यांच्यासह माध्यमांसमोर केले असले तरी फारसा फरक पडला नाही. या संदर्भात सुसाईड नोट सोबतच पोस्टमार्टम रिपोर्ट मिळावा अशी मागणी देखील मयुरी यांनी केली. या प्रकरणात गुन्हा दाखल व्हावा यासाठी नातेवाईकांनी पुन्हा ग्रामीण पोलीस ठाण्याकडे येऊन विनंती अर्जव केले.पण मूदीराज खुर्चीवर स्थितप्रज्ञपणाने नातेवाईकांकडे पहात बसले.पाषाणाला ही पाझर फुटला असता पण ठाणे प्रमुखाला पाझर फुटलाच नाही. या प्रकरणात नुसता गुन्हा दाखल करण्यात येईल असं सांगून वाटी लावण्याचा वारंवार प्रयत्न त्यांनी केला. नातेवाईकांनी दुपारपासून ग्रामीण पोलीस ठाण्यासमोर ठिय्या मांडला. रात्री साडेआठ पर्यंत या प्रकरणात गुन्हा दाखल करण्यात आला नव्हता नातेवाईक मात्र ठाण मांडून तिथेच होते.
याची भनक एसपींना लागली नाही का? एसपींनी पोलीस ठाणे आधुनिक करायचे म्हणून गाजावाजा केला.पण पीडित कुटुंब ठिय्या मांडून बसलय ही बाब एसपीना कशी कळाली नाही.
एस पी साहेब….!
प्रामाणिक कर्तव्यदक्ष जीएसटी अधिकारी सचिन जाधवर यांच्या कुटुंबीयांची ही वाताहात तुम्ही व तुमचे पोलीस ठाणे करीत असतील तर सर्वसामान्य गोरगरिबांचं काय? पोलीस अधीक्षक धुतल्या तांदळासारखे पण भातात लागणाऱ्या खड्यासारखे
असून जनतेला उपयोग काय? तुमच्या आधुनिकीकरणाचा जनतेला उपयोग काय? मूदीराज सारखा अधिकारी तुमचा ऐकत नाही काय? राजकीय दबावाला बळी पडणारे तुम्हीही निघालात काय? माध्यमावर जाधवर आत्महत्या प्रकरणात छापून आलेल्या घटना वर तुमचं लक्ष नाही काय? एवढ्या मोठ्या घटनेवर तुमचं लक्ष नाही तर गोरगरिबांचा काय? अवैध धंदे नाकावर टिच्चून चालू आहेत त्याचं काय? जाधवर कुटुंबीयांना न्याय मिळणार का? कायदा असाच फाट्यावर मारला जाणार का? यासारखे अनेक प्रश्न जाधवर कुटुंबासह सर्वसामान्य जनतेकडून विचारले जाऊ लागले आहेत.

अंबाजोगाई — तालुक्यातील सायगाव येथे विनापरवाना बेकायदेशीररीत्या रिवाल्वर बाळगून मध्यरात्रीच्या सुमारास गोळीबार करून दहशत निर्माण करणाऱ्या 35 वर्षीय तरुणाला बर्दापूर पोलिसांनी तात्काळ अटक केली. यावेळी पोलिसांनी दोन पिस्तूल, जिवंत काडतुसे आणि एक मोटारसायकल असा एकूण 1 लाख 33 हजार रुपयांचा मुद्देमाल जप्त केला आहे.
या प्रकरणी मिळालेली माहिती अशी की, अंबाजोगाई तालुक्यातील सायगाव येथे बुधवार दि.21 जानेवारी रोजी मध्यरात्री दोनच्या सुमारास सय्यद अहमदअली मुब्बशीरअली हाशमी वय 35 वर्ष याने बेकायदेशीररीत्या रिवाल्वर बाळगली,तसेच गोळीबार केला.घटनेची माहिती मिळताच बर्दापूर पोलिसांनी तात्काळ हालचाली करून आरोपीला ताब्यात घेतले.
पो.ह. गणेश विक्रम तांदळे यांनी दिलेल्या फिर्यादीवरून आरोपीविरुद्ध बर्दापूर पोलीस ठाण्यात गुन्हा दाखल करण्यात आला आहे. चौकशी व झाडाझडती दरम्यान आरोपीकडे एक विदेशी यु एस ए बनावटीची 9 एमएम पिस्टल, एक ‘जपान बनावटीची सिल्वर रंगाची रिवॉल्वर, तीन जिवंत काडतुसे, गुन्ह्यात वापरलेली टीव्हीएस स्टार सिटी मोटारसायकल क्र. MH 23 R 0317 असा एकूण एक लाख 33 हजाराचा मुद्देमाल मिळून आला आहे.
बर्दापूर पोलीस ठाण्याचे प्रभारी अधिकारी सपोनि कांबळे आणि पोलीस उपनिरीक्षक घुले यांनी सहकाऱ्यांसह घटनास्थळाला भेट देऊन पंचनामा केला. आरोपीविरुद्ध शस्त्र अधिनियम आणि भारतीय न्याय संहिता बी एन एस कलम 110 अन्वये गुन्हा दाखल करण्यात आला आहे. सदर कारवाई पोलीस अधीक्षक, अपर पोलीस अधीक्षक आणि उपविभागीय पोलीस अधिकारी यांच्या मार्गदर्शनाखाली करण्यात आली. सध्या गावात शांतता असून, आरोपीकडे ही शस्त्रे कोठून आली याचा अधिक तपास पोलीस उपनिरीक्षक घुले करत आहेत.या कारवाईत पोलिसांनी दोन पिस्तूल, जिवंत काडतुसे आणि एक मोटारसायकल असा एकूण १ लाख ३३ हजार रुपयांचा मुद्देमाल जप्त केला असून या घटनेमुळे परिसरात खळबळ उडाली आहे

केज — पत्नीचे परपुरुषासोबत अनैतिक संबंध, तसेच पत्नी, सासू आणि पत्नीच्या प्रियकराकडून होत असलेला शारीरिक व मानसिक छळ सहन न झाल्याने केज येथील ४० वर्षीय तरुणाने गळफास घेऊन जीवन संपविल्याची घटना घडली आहे.या प्रकरणी जनांविरुद्ध गुन्हा दाखल करण्यात आला आहे. पत्नीच्या प्रियकरावर ॲट्रॉसिटीअंतर्गतही गुन्हा नोंदविण्यात आला आहे.

आश्रुबा उर्फ उत्तम शिवाजी जाधव (वय ४०, रा. हाउसिंग कॉलनी, केज) असे मृताचे नाव आहे.

पोलिसांनी दिलेल्या माहितीनुसार, आश्रुबा जाधव यांच्या पत्नी मनीषा जाधव हिचे केज येथील मयूर पाटील देशमुख या परजातीतील अविवाहित तरुणाशी मागील एक वर्षापासून अनैतिक संबंध होते. मयूर देशमुख याने मनीषासाठी धारूर रोड परिसरात एक खोली भाड्याने घेतली होती. त्या ठिकाणी मनीषा, तिचा प्रियकर आणि आश्रुबा यांची दोन मुले हे पती-पत्नीप्रमाणे राहत होते.

दि. १९ जानेवारी २०२६ रोजी आश्रुबा जाधव हे धारूर रोड येथील त्या खोलीवर गेले असता, पत्नी मनीषा, तिचा प्रियकर मयूर देशमुख आणि सासू मंगल भारत खाडे यांनी त्यांना धक्काबुक्की करत जातीवाचक शिवीगाळ केली. तसेच मारहाण करून जीवे मारण्याची धमकी देत त्यांना तेथून हाकलून दिल्याचा आरोप आहे.

या सततच्या अपमान, छळ आणि पत्नीच्या अनैतिक संबंधाला कंटाळून आश्रुबा जाधव यांनी दि. २० जानेवारी रोजी हाउसिंग कॉलनीतील आपल्या राहत्या घरी लोखंडी आडुला साडीने गळफास घेऊन आत्महत्या केली.या प्रकरणी मयताचे भाऊ युवराज जाधव यांनी दिलेल्या तक्रारीवरून केज पोलीस ठाण्यात मयूर प्रताप पाटील देशमुख, पत्नी मनीषा जाधव आणि सासू मंगल भारत खाडे यांच्याविरुद्ध विविध कलमान्वये गुन्हा दाखल करण्यात आला आहे. याप्रकरणी पोलिसांनी गुन्हा दाखल होताच तीनही आरोपींना पकडले आहे.प्रकरणाचा तपास सहाय्यक पोलीस अधीक्षक व्यंकटराम हे करीत आहेत.