मुंबई — राज्याचे माजी मंत्री बाबा सिद्दिकी यांची दसऱ्याच्या दिवशी गोळ्या घालून हत्या करण्यात आली. हत्येमागे लॉरेन्स बिश्नोई गँगचा सहभाग असल्याचा पोलिसांचा संशय असून त्या दृष्टीने त्यांचा तपास सुरू आहे.

शनिवारी रात्री म्हणजेच दसऱ्याच्या रात्री ही गोळीबाराची घटना घडली. दरम्यान, या प्रकरणी मोठी अपडेट समोर आली असून या गोळीबाराची जबाबदारी अनमोल बिश्नोईने घेतली आहे. दाऊदचे निकटवर्तीय असल्याने हत्या केल्याचा उल्लेख सोशल मीडियावर व्हायरल होत असलेल्या पोस्टमध्ये करण्यात आला आहे.
बाबा सिद्दीकी यांचे पुत्र झिशान सिद्दिकी यांच्या कार्यालया समोरच शनिवारी रात्री सिद्दिकी यांच्यावर तीन व्यक्तींनी गोळीबार केला. या प्रकरणात दोघांना ताब्यात घेण्यात आले असून या तिसऱ्या आरोपीची ओळख पोलिसांना पटल्याची माहिती समोर येत आहे. करनैल सिंह आणि धर्मराज कश्यप अशी ताब्यात घेण्यात आलेल्या दोन आरोपींची नावे आहेत. तर तिसऱ्या आरोपीचा शोध सुरू आहे. या हत्येच्या तपासासाठी जवळपास पाच ते सहा पथक गुन्हे शाखेकडून तयार करण्यात आल्याची माहिती समोर येत आहे.
बाबा सिद्दिकी यांच्यावर झालेल्या गोळीबारानंतर हा हल्ला कोणी केला असेल, यामागे कारण काय आहे, याबाबत अनेक तर्कवितर्क लढवले जात होते. एसआरएच्या प्रकल्पासंबंधीच्या कथित वादामुळे त्यांची हत्या झाली असावी असाही अनेकांचा दावा होता. मात्र, आता लॉरेन्स बिश्नोई गँगने या हत्येची जबाबदारी स्वीकारली आहे. हिंदी भाषेतील पोस्ट टाकून बिश्नोई गँगने ही हत्या आम्ही केल्याचं म्हटलं आहे.
आम्हाला सलमान खानसोबत कोणतेही युद्ध नको होते, पण बाबा सिद्दीकींच्या हत्येचे कारण त्यांचे दाऊद इब्राहिम यांच्याशी असलेले संबंध होते. बाबा सिद्दीकी यांची कथित शालीनता हा निव्वळ भ्रम आहे. यापूर्वी दाऊद इब्राहिम सोबत मकोका कायद्यातही त्याचा सहभाग असल्याचे पुरावे आहेत. सलमान खान आणि दाऊदच्या टोळीला जो कोणी मदत करेल त्याला त्याची किंमत मोजावी लागेल, असा दावा बिश्नोई गँगने केला आहे.

6 कोटी 9 लाख रूपये दंडाची रक्कम वसूल

छ. संभाजीनगर — महावितरण छत्रपती संभाजीनगर प्रादेशिक कार्यालयाच्यामराठवाडयातील आठ जिल्हयात माहे एप्रिल 2024 ते 30 सप्टेंबर 2024 या सहा महिन्यात कालावधीत वीज चोरांविरूध्द धडक मोहीम राबविण्यात आली. यामध्ये 2,673 वीज मिटरची तपासणी करण्यात आली. यात 1,451 मिटरमध्ये वीज चोरी आढळून आली. यात 14013697 युनिट वीज चोरी प्रकरणी 10 कोटी 10 लाख रूपयांच्या अनुमानित वीज बिल दंडाच्या रक्कमेची आकारणी करण्यात आली आहे. तर 6 कोटी 9 लाख 86 हजार रूपये वसूल करण्यात आले आहेत.व 65 जणांवर गुन्हे दाखल करण्यात आले आहे.

वीज चोरीची रक्कम लाख रूपयांमध्ये पुढील प्रमाणे
वीज चोरी पथक ग्राहक वीज चोरीची रक्कम
छत्रपती संभाजीनगर शहर 328 229
छत्रपती संभाजीनगर ग्रामीण 151 150
जालना 199 152
छत्रपती संभाजीनगर 678 531
परिमंडल

बीड 85 59
धाराशिव 115 72
लातूर 219 148
लातूर परिमंडल 419 279

नांदेड 165 88
हिंगोली 76 34
परभणी 113 78
नांदेड परिमंडल 354 200
मराठवाडा एकूण 1451 1010

मराठवाडयातील छत्रपती संभाजीनगर, जालना, परभणी, हिंगोली, नांदेड, लातूर,धाराशिव व बीड जिल्हयात एप्रिल 2024 ते 30 सप्टेंबर 2024 या कालावधीत भरारी पथक आणि दक्षता व सुरक्षा अंमलबजावणी विभागामार्फत वीज चोरांविरूध्द धडक मोहीम राबविली. विघुत कायदा 2003 नुसार कलम 126 अंतर्गत शेजा—याकडून अनधिकृत वीज घेणे, मंजूर भारापेक्षा अधिक क्षमतेच्या भाराचा वापर करणे, मंजूर वर्गवारीतून दुस—या वर्गवारीसाठी अनधिकृत विजेचा वापर करणे याचा समावेश होतो. तसेच कलम 135 मध्ये मिटरची छेडछाड करणे, आकडा टाकून विजेचा वापर करणे, सव्हिेसवायर टॅप करणे व कलम 138 मध्ये महावितरणचे मिटर, वायरसह इतर वस्तु चोरी करणे इत्यादी बाबींचा समावेश होतो. वीज चोरी पकडण्याची मोहीम यापुढेही चालू राहणार आहे. अनधिकृत विजेचा वापर करू नये. अनधिकृतपणे विजेचा वापर करतांना आढळून आल्यास विघुत कायदयानुसार कडक कारवाई करण्याचे आदेश संबंधितांना देण्यात आले आहेत. वीज ग्राहकांनी अधिकृत वीज जोडणी घेवूनच विजेचा वापर करण्याचे आवाहन महावितरणने केले आहे.
आगामी काळात वीज चोराच्या विरोधात मोठ्या प्रमाणात वीज चोरी शोध मोहीम राबविण्याचे निर्देश महावितरणचे प्रादेशिक कार्यालयाचे सह व्यवस्थापकीय संचालक राहुल गुप्ता यांनी दिले आहेत.

बीड — महात्मा फुले अर्बन बँकेच्या माध्यमातून १४ कोटींच्या अपहारप्रकरणात ४१ जणांवर गुन्हे दाखल करण्यात आले असून यातील मुख्य आरोपी असलेल्या सत्यभामा बांगर यांना आज सकाळी राहत्या घरातून अटक करण्यात आली आहे. सपोनि बाळराजे दराडे यांनी ही अटक केल्याची माहिती असून आज श्रीमती बांगरला न्यायालयात हजर केले जाणार आहे.

बीड जिल्ह्यात मागच्या काही दिवसांपासून मल्टीस्टेट आणि सहकार क्षेत्रातील भोंगळ कारभार उजेडात येत आहे. महात्मा फुले बँकेसह चौदा सहकारी संस्था मध्ये चौदा कोटी रुपयांचा अपहार केल्याचे दोन दिवसापूर्वी उघडं झाले होते. बांगर यांच्यासह ४१ लोकांवर गुन्हे दाखल झाले असून सत्यभामा बांगर यांना यात अटक झाली आहे.रामकृष्ण बांगर, सत्यभामा बांगर, बाळा बांगर यांनी महात्मा फुले अर्बन बँक, डेअरी, शैक्षणिक संस्था स्थापन केल्या होत्या. मागील तीस चाळीस वर्षेपासून बांगर यांचे साम्राज्य अबधित होते. वेगवेगळ्या राजकीय पक्षाच्या आशीर्वादाने बांगर यांनी करोडो रुपयांचा अपहार केला. मात्र त्यांच्यावर कारवाई झाली नव्हती. अखेर हा सर्व गैरभार उजेडात आल्यानंतर बांगर कुटुंबीय फरार झाले होते. सत्यभामा बांगर तुळजापूरला दर्शन घेऊन रात्री मध्यरात्री घरी आल्या होत्या. याची माहिती पोलिसांना मिळाल्यानंतर आज सकाळी सपोनि बाळराजे दराडे यांनी सापळा रचून आरोपीला ताब्यात घेतले आहे. सध्या सत्यभामा बांगर यांची वैद्यकीय तपासणी करण्यासाठी घेऊन जाण्यात येत असून त्यानंतर न्यायालयात हजर केले जाणार आहे.

अहमदनगर — धारधार कोयत्याने वार करत सख्ख्या दिराने दोन भाऊजयांचा खून केल्याची धक्कादायक घटना समोर आली आहे. अहमदनगर जिल्ह्यातील अकोले तालुक्यातील बेलापूर बदगी गावात ही घटना घडली आहे. जमिनीच्या आणि पैशाच्या किरकोळ वादातून दिराने भाऊजयांचा निर्घृण खून केल्याची माहिती समोर आली आहे. आरोपी कोयता हातात घेऊन फिरत असल्याची घटना गावातील सीसीटीव्ही कॅमेऱ्यात कैद झाली आहे.

विशेष म्हणजे ही घटना गावातील मुख्य बाजारपेठेच्या चौकापासून काही अंतरावर घडली. घटनास्थळी रक्ताचे मृतदेह अक्षरक्षः रक्ताच्या थारोळ्यात पडले होते.
दत्तात्रय प्रकाश फापाळे वय 50 वर्षे याने सख्खी लहान भावजयी उज्ज्वला अशोक फापाळे वय 38, चुलत भावजयी वैशाली संदीप फापाळे वय 40 वर्ष यांचा सोमवारी दुपारी अडीच वाजता धारदार कोयत्याने हत्या केली. आरोपी दत्तात्रय फापाळे ऊर्फ बापू हा अविवाहित आहे. लहान भाऊ अशोक याचे लग्न झाले होते. मात्र दोन वर्षांपूर्वी त्याचे निधन झाले. त्याची पत्नी मृत उज्ज्वला आणि दोन मुले आळंदी येथे मोलमजुरीचे काम करत उदरनिर्वाह करतात. फाफळे कुटुंबाची बदगी गावात शेती आहे. त्या शेतीमध्ये दत्तात्रय आणि उज्ज्वला वर्षाआड शेती पीक घ्यायचे. शेतातील सोयाबीन काढण्यासाठी उज्ज्वला आली होती. उज्ज्वला गावाला आल्यापासून दीर दत्तात्रयचे भावाच्या दहाव्याला दिलेल्या पैशावरून वाद व्हायचे. याच रागातून दत्तात्रय याने आधीच घरात कोयता आणला होता.

वैशाली व उज्ज्वला एकाच भावकीतल्या होत्या. उज्ज्वला दोन दिवसांपूर्वी गावी आली होती. वैशाली घटनास्थळाशेजारील दवाखान्यात उपचार घेऊन उज्ज्वलाशी गप्पा मारत होती. उज्ज्वलावर पहिला वार होताच ती सोडवायला गेली आणि तिच्यावरही सपासप तीन वार झाले आणि त्यातच तिचा जीव गेला, दोघींचे देह रक्ताच्या थारोळ्यात पडले. खुनाची घटना झाली त्यावेळी या महिला किंचाळत होत्या. त्यानंतर तो भर गावातून जंगलाच्या वाटेने निघून गेला. घटनेनंतर गावादेखत आरोपी पायी गेला. दरम्यान कोयता हातात घेऊन गावातून फिरत असताना सीसीटीव्ही कॅमेऱ्यात आरोपी काय झाला आहे कोयता घेऊन फिरत असताना एकाही व्यक्तीने त्याला अडवले नाही की त्याचा कोणी पाठलाग केला नाही. सध्या पोलीस तपास करत आहेत.

केज — एका 43 वर्षीय मूकबधीर महिलेवर नात्यातील व्यक्तीनेच अत्याचार केल्याची घटना सोमवारी दुपारी तीनच्या सुमारास केज तालुक्यात घडली.

या बाबतची माहिती अशी, केज तालुक्यातील एका गावात एक विवाहित मूकबधीर महिला आपल्या आई-वडिलांबरोबर राहते. तिचे आई-वडील शेतमजुरीचे काम करत असून सोमवारी दि सात ऑक्टोबर रोजी सोयाबीनची कापणी करण्यासाठी ते दुसऱ्याच्या शेतात गेले होते. यादरम्यान ही महिला घरात एकटीच असल्याचे पाहून नात्यातील एका नराधमाने दुपारच्या सुमारास घरात घुसून तिच्यावर अत्याचार केला. ही बाब पीडितेच्या चुलतीच्या निदर्शनास येताच नराधम तेथून पसार झाला. त्यानंतर पिडीतेच्या चुलतीने दिलेल्या फिर्यादीवरून केज पोलिस ठाण्यात नात्यातील एका नराधमाविरूद्ध गुन्हा दाखल करण्यात आला. पोलीस निरीक्षक प्रशांत महाजन यांच्या मार्गदर्शनाखाली पोलिस उपनिरक्षक आनंद शिंदे हे पुढील तपास करत आहेत.