बीड — परप्रांतीय शहरात येतो, पोलिसांच्या नाकावर टिच्चून गंडवण्याचा गोरख धंदा वाजत गाजत चालू करतो. पोलिसांकडे तक्रारी येतात तरीही त्याकडे दुर्लक्ष केले जाते. शेवटी कोट्यावधी रुपयांचा चुना लावून तो फरार होतो. ही फिल्मी कहानी नाहीतर सत्य हकीकत आहे. या सर्व प्रकारावर पांघरून घालणारे बल्लाळच गुंतवणूकदारांचे भल्लाळ देव बनले आहेत.
पतसंस्थांनी करोडो रुपयाला गंडा घातल्यानंतर अरेबियन ज्वेलर्स च्या नावाखाली जनतेला लुटण्याचा गोरख धंदा सुरू केला गेला. धमाका ऑफर च्या नावाखाली फ्लॅट, चार चाकी गाडी, बुलेट सारख्या गाड्यांच आमीष लोकांना दाखवलं जात होतं. सारासार विचार बुद्धीचा वापर करणारा प्रत्येक जण ही फसवणूक असल्याचं सांगत होता. पण बीड शहर पोलिसांनी याकडे दुर्लक्ष केलं. साडेचार हजार रुपये नोंदणी फीस घेऊन अडीच हजाराहून अधिक सभासद या योजनेमध्ये सहभागी करून घेतले. दर महिन्यासाठी लकी ड्रॉ च्या नावाखाली पैसे जमा केले जायचे. दोन-तीन कार्यक्रमात शहरातील प्रतिष्ठांच्या हस्ते बक्षीसांच वितरण केलं. दरम्यान याच वेळी स्वाभिमान संघटनेचे जिल्हाप्रमुख तथा ठेवीदार संघर्ष कृती समितीचे प्रा. सचिन उबाळे यांनी पोलिसांनी जनतेला गंडवणाऱ्या या महाभागाला आळा घालावा अशी मागणी निवेदन देऊन केली. नेहमीच्या सवयीने बल्लाळांची “लाळ“इथे देखील टपकली. त्यांनी कारवाई केलीच नाही. इतकच नाही तर शॉप ॲक्टच लायसन घेऊन हा गोरख धंदा उभा केला होता याची शहानिशा करण्याची देखील तसदी घेतली नाही. गोरगरिबांना लुटतोय लुटू द्या; या प्रकारात बल्लाळ यांनी स्वतःचा फायदा बघितला त्यात गोरगरीब मात्र बुके कंगाल झाला. “माया” आणि “काया” यासाठी वाटेल ते ऽऽ! असं म्हणणाऱ्या माणसाकडून जनतेचे भलं होईल, गुन्हेगारीला आळा बसेल अशी अपेक्षा तरी कशी धरणार ?
बरं ही जनतेची लूटमार सुरू असताना काही संपादक म्हणवून घेत विश्वाचे नायक असल्याचे सिद्ध करणाऱ्यांनी अरेबियन ज्वेलर्स विरोधात तक्रार करणाऱ्या प्रा. सचिन उबाळे यांच्यावरच चिखल फेक करत. बिल बिल करून सोडलं होतं. त्यावेळी बल्लाळ देवाची बाजू देखील घेण्यात आली होती. हे वास्तव नाकारून कसं चालेल? मीडिया मॅनेजमेंट करण्यात देखील अनेकांचा सहभाग होता. खूप मोठ् रॅकेट बंगाली बाबू ने सक्रिय केलं होतं. अनेकांनी अरेबियन ज्वेलर्स च्या नावाखाली फसवणूक होत असल्याचे वृत्त देखील दिले होते. त्यामध्ये “सह्याद्री माझा” ने देखील पोलिसांच्या निदर्शनास येण्यासाठी पोलिसांवर टीका केली होती. मात्र त्याकडे देखील बल्लाळानी सवयीप्रमाणे दुर्लक्ष केलं.
बरं विशेष बाब म्हणजे एका ज्वेलर्स‌ मालकाला अरेबियन ज्वेलर्स चा मेहबूब रहमान या बंगाली बाबुने धनादेश दिला होता. हा धनादेश बँकेत वठला नाही म्हणून या ज्वेलर्स मालकाने फसवणूक झाल्याची तक्रार दोन अडीच महिन्यापूर्वी शहर पोलीस ठाण्यात दिली होती. यावर देखील बल्लाळ देवाने कुठलीच कारवाई केली नाही. जिल्ह्यात आयजी येणार म्हटल्यानंतर दुकानावर जाऊन चौकशी करावी याची उपरती झाली.बल्लाळानी दोन महिने फसवणूक करणाऱ्या बंगाली बाबुला पळून जाण्यासाठी वेळ दिला. तो पळून जाण्यात यशस्वी झाला. बीडच्या जनतेला गंडा घालून पळालेला हा बंगाली बाबू खरंच स्वतःच्या संसाराला हा पैसा वापरणार आहे का? की त्या पैशाचा वापर इतर समाजविघातक कृत्यासाठी वापरणार? हे येणारा काळच ठरवणार आहे. काहीही असो बंगाली बाबुला पळून जाण्यास पुरेसा वेळ बल्लाळांनी दिल्यामुळे बीडच्या गोरगरिबांच्या लेखी ते भल्लाळ देव बनले आहेत.

बीड –निवडणुकाच्या तोंडावर राज्यातील पोलीस विभागाच्या बदल्या सुरु झाल्यानंतर बीडमधील एलसीबीचे उस्मान शेख यांची लातूरला बदली करण्यात आली. त्यांच्या जागी कोण हा प्रश्न अनेकांना पडला असताना आता एलसीबीला एसपी साहेब आपल्या कानाखाली राहणारा आणि स्वभावाने अतिशय शांत असणाऱ्या माणसाच्या शोधात असल्याची माहिती मिळत आहे. पण या अधिकाऱ्याच्या निवडीनंतर जिल्ह्यात कायदा आणि सुव्यवस्था ढासळणार हे मात्र निश्चित आहे.

दरम्यान सध्या आयजी साहेब आणि एसपी यांच्यामध्ये बदल्याचे खलबते सुरु झाले असून थोडयावेळात नाव अंतिम होणार आहे.

एलसीबीत घनशाम पाळवदे यांच्यानंतर गुन्हेगारांना जरब बसावी अश्या एकाही अधिकाऱ्याची नियुक्ती झालेली नाही हे वास्तव आहे. आता पोलीस अधिक्षक खमक्या अधिकाऱ्याला या ठिकाणी नियुक्ती देतील असे वाटतं असताना एका दुसऱ्याच अधिकाऱ्याचे नाव आघाडीवर असल्याचे कळते.
बीडमध्ये जेंव्हा जाळपोळीची घटना घडली तेंव्हा सामान्यांमध्ये भीतीचे वातावरण निर्माण झाले होते.लोक घराबाहेर येताना भीत होते. यावेळी गुन्हेगारांना पकडण्यासाठी पोलीस रस्त्यावर उतरले. त्यावेळी काही पोलीस अधिकाऱ्यांनी सर्वात पाहिले जाळपोळ करणाऱ्या आंदोलकांचा ताफा पाहुन पळ काढला होता.एखाद्या मॅरेथॉन स्पर्धेला लाजवेल असं चित्र त्यावेळी निर्माण झालं होतं. पार्श्वभागाला पाय लावून पळणारे पोलीस अधिकारी बीडकरांनी इतिहासात पहिल्यांदाच पाहिले होते. पाय लावून पळणाऱ्या अधिकाऱ्याचे नाव आता एलसीबी साठी आघाडीवर घेतले जात असल्याने आश्चर्य व्यक्त होत आहे. ढीला ढाला माणूस या पदावर बसवून बळीचा बकरा बनवण्याची खेळी खेळली जात आहे. ज्या पद्धतीने पोलीस अधीक्षकांनी आपली प्रतिमा जिल्ह्यात बनवली आहे. त्या प्रतिमेला मात्र ढिल्ल्या माणसामुळे तडा जायला देखील वेळ लागणार नाही.बीडमध्ये आधीच कायदा आणि व्यवस्था अस्तित्वात नसल्याच्या चर्चा आहेत.
उस्मान शेख यांची कारकीर्द देखील वांझोटीच राहिली हे वास्तव आहे. या जागेवर आता कानाखालचा माणूस पाहिजे म्हणून मेरिटच्या अधिकाऱ्यांना डावलंण्यात येणार असेल तर ते पोलीस दलासाठी चिंतेची बाब आहे. एलसीबीत आतापर्यंत वशिलेबाजी आणि लाळ घोटेपणावरच नियुक्त्या मिळाल्या होत्या. आता कुठे राजकीय पाठबळ नसणारे आणि आपल्या कामात अव्व्ल असणाऱ्या सामान्य अधिकाऱ्याला एलसीबीचे अधुरे स्वप्न पूर्ण होईल असे वाटतं असताना एसपी साहेब भ्रमनिरास करतायत की काय असे वाटू लागले आहे. शेवटी घटक प्रमुखांनीच अधिकारी निवडायचे असतात पण ते निवडताना जिल्ह्यात अप्पर पोलीस अधिक्षक यांची बदली, डीवायएसपी यांची बदली आणि ते स्वतः नवीन असताना कायदा योग्य हाताळणाऱ्या माणसाची निवड ही करणे महत्वाचे आहे. नाही तर कावळ्याच्या हाती दिला दरबार….! अशी स्थिती व्हायला वेळ लागणार नाही.

बीड — स्थानिक गुन्हे शाखेचे प्रमुख उस्मान शेख यांची लातूरच्या प्रशिक्षण केंद्रात बदली करण्यात आली आहे. त्यांच्या जागेवर कोणाची नियुक्ती होणार याकडे सगळ्यांचे लक्ष लागले आहे.
संतोष देशमुख हत्या प्रकरणादरम्यान भाजप आमदार सुरेश धस यांनी पोलीस निरीक्षक उस्मान शेख यांच्यावर गंभीर आरोप केले होते. पोलीस निरीक्षक उस्मान शेख हे परळी पोलीस स्टेशनला होते. पोलीस निरीक्षक उस्मान शेख यांची बदली वाल्मीक कराडच्या सांगण्यावरून झाल्याचा आरोप झाला होता.आ. सुरेश धस यांच्यासोबतच सामाजिक कार्यकर्त्या अंजली दमानिया आणि तृप्ती देसाई यांनीही गंभीर आरोप केले होते. उस्मान शेख यांची स्थानिक गुन्हे शाखेची कामगिरी अतिशय खराब राहिली. स्थानिक गुन्हे शाखा नावाचा प्रकार पोलीस दलात असतो याचा विसर देखील जनतेला पडला होता. किरकोळ गुन्ह्याची प्रकरणा हाताळून माध्यमामधून त्याची हाकाटी मारण्याचे काम केलं जात होतं. गंभीर व दरोड्या सारखे मोठमोठे गुन्हे उघडकीस आणायचं हे कर्तव्य आहे याचा विसर पडला होता. परिणामी स्थानिक गुन्हे शाखेचा गुन्हेगारीवरचा अंकुश पूर्ण नाहीसा झाला होता. उस्मान शेख यांना कर्तव्याचा विसर पडत असल्याच्या तक्रारी पोलीस अधीक्षकांकडे येत होत्या. एवढी मोठी जबाबदारी खांद्यावर घेत असताना साजेस काम होत नसल्याने त्यांनीच पोलीस अधीक्षकांकडे बदलीची विनंती केली होती.दरम्यान उस्मान शेख यांची लातूरच्या प्रशिक्षण केंद्रावर बदली झाली आहे.यांच्या जागी पोलीस अधीक्षक कोणाची नियुक्ती करतात याकडे जनतेचे लक्ष लागले आहे.

बीड — सरपंच संतोष देशमुख यांच्या हत्या प्रकरणातील मुख्य आरोपी वाल्मिक कराड याला बीड कारागृहात व्हीआयपी ट्रीटमेंट दिलं जात असल्याचा गंभीर आरोप बडतर्फ पोलीस उपनिरीक्षक रणजित कासले याने केला होता. कराडसाठी तुरुंगात विशेष चहा आणि चांगल्या प्रतीच्या चपात्यांची व्यवस्था केली जाते. इतकंच नव्हे, तर तो स्वतःसह इतर कैद्यांच्या नावावर तुरुंगातील कँटीनमधून दरमहा तब्बल 25 हजार रुपयांची खरेदी करत असल्याचा दावाही कासलेने व्हिडिओ व्हायरल करत केला आहे. यामुळे एकच खळबळ उडाली होती. आता वाल्मिक कराडला मिळत असलेल्या व्हीआयपी ट्रीटमेंटच्या आरोपानंतर कारागृह अधीक्षकांची बदली करण्यात आली आहे.
बडतर्फ पोलीस अधिकारी रणजीत कासले याच्यासह देशमुख कुटुंबातील सदस्यांनी वाल्मिक कराडसह इतर आरोपींना जेलमध्ये व्हीआयपी ट्रीटमेंट दिल्याचा आरोप केला होता. यानंतर कारागृह अधीक्षक बक्सार मुलानी हे चर्चेत आले होते. आता कारागृह अधीक्षक बक्सार मुलानी यांची बदली झाली. आता कारागृह अधीक्षकपदी रत्नागिरीहून रामराजे चांदणे रुजू होणार असल्याची माहिती समोर येत आहे. दरम्यान, बडतर्फ पोलीस अधिकारी रणजीत कासले याने केलेल्या आरोपानंतर तत्काळ कारागृह अधीक्षकांची बदली झाल्याने चर्चांना उधाण आले आहे.
बडतर्फ पोलीस अधिकारी रणजीत कासले याला आठवडाभरापूर्वी जामीन मिळाला होता. जामीन मिळाल्यानंतर त्याने सोशल मीडियावर व्हिडिओ शेअर करत त्याने आपले आरोप सत्र सुरू ठेवले आहे. शनिवारी (25 मे) रणजित कासले याने एक व्हिडीओ सोशल मीडियावर शेअर केला. या व्हिडीओत त्याने म्हटले होते की, कराडला तुरुंगात खास चहा दिला जातो, तसेच त्याच्या जेवणात चांगल्या प्रतीच्या चपात्यांची विशेष व्यवस्था केली जाते. इतकंच नाही, तर तो स्वतःसह इतर कैद्यांच्या नावावर तुरुंगातील कँटीनमधून दरमहा तब्बल 25 हजार रुपयांची खरेदी करत असल्याचा दावा त्याने केला आहे. त्याचबरोबर, इतर कैद्यांना केवळ पांघरण्यासाठी कपडे पुरवले जात असताना, कराडला एक नव्हे तर तब्बल सहा ब्लँकेट दिले गेले असून, त्याचा वापर तो गादीसारखा करतो. कँटीन खरेदीसाठी इतर कैद्यांवर कडक निर्बंध असतानाही कराडकडून स्वतंत्रपणे 10 हजार आणि इतर कैद्यांच्या नावावरून आणखी 10 ते 15 हजारांची खरेदी होत असल्याचा आरोपही त्याने व्हिडीओत केला आहे.

बीड — ‌ माजलगाव मतदार संघाचे माजी आमदार व भाजपचे ज्येष्ठ नेते आर टी देशमुख यांची गाडी लातूर औसा रस्त्यावरील बेलकुंडी गावाजवळ अपघातग्रस्त झाली. उपचारासाठी त्यांना लातूर येथे घेऊन जात असताना रस्त्यातच त्यांचे निधन झाले.

माजलगाव चे माजी आमदार आर.टी.देशमुख हे सोमवारी गाडी क्रमांक एम एच 44 ए डी 27 97 ने लातूर औसा या मार्गावरून प्रवास करत होते. दुपारच्या वेळी बेलकुंड गावाजवळ गाडी आली असता रस्त्याच्या कडेला जमा झालेल्या पाण्यामुळे गाडी स्लीप होऊन चालकाचे नियंत्रण सुटले व रस्त्याच्या कडेला गाडीने पलटी मारली. यावेळी गाडीत त्यांच्यासोबत अंगरक्षक व चालक हे प्रवास करत होते. या रस्ता अपघातात तिघेही जखमी झाले. जखमी आर् टी. देशमुख यांना लातूर येथील खाजगी दवाखान्यामध्ये उपचारासाठी घेऊन जात असतानाच त्यांचा मृत्यू झाला. स्वर्गीय गोपीनाथ मुंडे यांचे ते निकटवर्तीय मानले जात होते. भाजपच्या जिल्हाध्यक्षपदी त्यांनी केलेले संघटनात्मक कार्य मोलाचे ठरले पंचायत समिती सदस्य, प.स.सभापती, जि प सदस्य भाजपचे प्रदेश सरचिटणीस आदी पदावरही त्यांनी काम केले 2009 च्या विधानसभा निवडणुकीत त्यांना प्रकाश सोळंके यांच्याकडून पराभव स्वीकारावा लागला होता. मात्र 2014 च्या निवडणुकीत प्रकाश सोळंके यांचा पराभव करून त्यांनी पराभवाची परतफेड केली होती. राज्याच्या पंचायत राज समितीचे सदस्य देखील आर टी देशमुख आहेत. राजकारणातला सुसंस्कृत चेहरा म्हणून त्यांची ओळख होती. लोकनेते स्व. गोपीनाथ मुंडे, माजी आमदार विनायक मेटे यांच्यानंतर माजी आमदार आर टी देशमुख यांचे देखील रस्ता अपघातात निधन झाल्यामुळे सर्वत्र हळहळ व्यक्त करण्यात येत असून शोक कळा पसरली आहे.

परिवारातला सदस्य गमावला – धनंजय मुंडे
माझ्या राजकीय व सामाजिक जडणघडणीत जिजा भाऊंचे एक अढळ स्थान आहे. मुंडे आणि देशमुख कुटुंबाचे पिढीजात नाते आहे. आज त्या नात्यातील आणखी एक छाया आम्हाला पोरके करून गेली. जिजा भाऊंच्या अकाली निधनाने आम्ही एक मार्गदर्शक नेतृत्वास मुकलो आहोत, त्याचबरोबर जिल्ह्यातील सामाजिक व राजकीय क्षेत्राची मोठी हानी झाली आहे.
या दुःखद प्रसंगी मी संपूर्ण देशमुख कुटुंबियांच्या दुःखात सहभागी आहे. भावपूर्ण श्रद्धांजली…!